🤮 Канадскага трыятланіста званітавала ў прамым эфіры Алімпійскіх гульняў – усё праз ваду ў Сене

Заплыў трыятланістаў у Сене суправаджаўся пастаянным абмеркаваннем крытычнага стану вады ў рацэ. Забруджванне і сур'ёзная колькасць бактэрый кішачнай палачкі ператварылі яе ў небяспечнае асяроддзе, што і пацвердзіў канадскі атлет.

Тайлер Міслаўчук удзельнічаў у спаборніцтве па трыятлоне і прыйшоў дзявятым. Але не гэта зрабіла спартсмена шырока вядомым. Пасля таго, як ён выйшаў з Сены, яго званітавала ажно дзесяць разоў. Момант патрапіў у прамы эфір трансляцыі Алімпійскіх гульняў. Пасля эпізоду з апаражненнем страўніка Тайлер сказаў: «Я прыехаў сюды не для таго, каб увайсці ў дзясятку лідараў, але я аддаў усё, што меў. Я зрабіў усё для гэтага і не шкадую».

Яшчэ ў аўторак ранішняя праверка Сены стала прычынай пераносу спаборніцтва на сераду 31 ліпеня – спачатку вада была недастаткова чыстай. На наступны дзень трыятланістам дазволілі зрабіць заплыў, бо аналіз вадаёма быў прымальны.

Некаторыя атлеты выказалі сваё абурэнне наконт стану ракі. Так, бельгіец Мартэн ван Рыэль лічыць, што спартсменамі скарысталіся як лялькамі ў лялечным доміку. І дадаў да гэтага яшчэ і такое: «Калі б прыярытэтам было нашае здароўе, гэтае мерапрыемства даўно б перанеслі ў іншае месца».

Крыніца: SPORTbible