Менеджэр па маркетынгу «Тарпеда-БелАЗ»: «У гэтым сезоне каманда будзе гуляць у футболках з надпісамі на беларускай мове»

Менеджэр па працы з грамадскасцю і маркетынгу Віктар Глушко распавёў аб рашэнні пісаць прозвішчы на майка гульцоў на беларускай мове.

«Дырэктар клуба казаў, што вызначацца трэба гульнёй, а не надпісамі на майках. Чаму такі быў адказ? Апошнім часам беларуская мова стала нейкім сродкам дасягнення таннай папулярнасці: ты можаш гуляць ніяк, запрашаць у каманду абы-каго, але калі ты напісаў на беларускай мове – усе будуць казаць, што ты прыгажун і ціснуць падабайкі ў Інтэрнэце. З кропкі гледжання маркетынга гэта, мусіць, і добра, але са спартыўнага боку – неяк прыкра. Але ў апошніх сезонах наша каманда даказала, што яна заслугоўвае пашаны менавіта сваімі спартыўнымі дасягненнямі, і ужо ніхто пра яе не скажа: «ну… затое ў іх надпісы на беларускай мове». А калі так, дык мы з чыстым сэрцам вярнуліся да гэтага пытання, на працягу сезона і ў міжсезонні цікавіліся ў людзей, як яны паставяцца да такіх змяненняў, высветлілі, што гэта не выкліча ні у каго абурэння ці неразумення.

Недзе ў лютым ці напачатку сакавіка правялі апытанне ў самой камандзе. Думаю, вам будзе цікава, што ўсе гульцы адзінагалосна выказаліся за тое, што яны не супраць, каб іх прозвішчы пісаліся на беларускай мове. Таму так таму і быць – у гэтым сезоне каманда будзе гуляць у футболках з надпісамі на беларускай мове. А каб быць паслядоўнымі, афішы і анонсы да гульняў мы таксама ўжо робім па-беларуску», – сказаў Глушко.

Нагадаем, што прозвішчы на майках гульцоў мінскага «Дынама» таксама напісаны на беларускай мове.