Цела 25-гадовага Аляксея Дзямідава, які быў удзельнікам фанацкага руху мінскага «Дынама», знайшлі на ўскрайку мікрараёна Серабранка раніцай 5 верасня.

«Аляксей жыў з бацькамі ў Бараўлянах, працаваў на аўтамыйцы ва Уруччы. 4 верасня выйшаў на працу. Позна ўвечары маці званіла яму, усё было нармальна, але ўжо праз гадзіну то ніхто не браў слухаўку, то выклік скідвалі. А раніцай 5 верасня нам паведамілі, што знайшлі цела Аляксея.

Цялесныя пашкоджанні былі. На галаве гематома, на барадзе нібыта кавалкі скуры выдраныя. Пальцы збітыя, косткі збітыя на руках. Нага неяк перакручаная – нібы зламаная. Брудная вопратка… Выглядае, што была бойка ці нешта такое. Афіцыйнае заключэнне аб смерці будзе праз месяц. А ў папярэднім, кажуць, напісалі, што прычына смерці — атручванне невыяўленым рэчывам.

Таксама зніклі яго рэчы. У моргу казалі, што яны ў міліцыі, у міліцыі — што ў моргу. А ў выніку тэлефона і заплечніка проста няма», — расказаў стрыечны брат хлопца Аляксандр.

Следчы камітэт пракаментаваў гэты выпадак так: «Па факце смерці праводзіцца праверка, дакладныя абставіны высвятляюцца. Для вызначэння дакладнай прычыны смерці прызначаныя судова-медыцынскія экспертызы». Па словах следчых, цела было знойдзена без бачных цялесных пашкоджанняў.

Пахавалі Аляксея Дзямідава 7 верасня.

Гэта ўжо другая загадкавая смерць маладога хлопца, звязанага з фанацкім рухам. 22 жніўня на вуліцы Парніковай у Мінску знайшлі павешаным цела Мікіты Крыўцова, які 10 дзён лічыўся зніклым. Крыўцоў быў фанатам ФК «Маладзечна».

Автор: Михаил Тимофеев

Источник: Наша ніва

Происшествия

Болельщики