ФК Нёман абраны самым беларускамоўным футбольным клубам Беларусі - 2016

Футбольны клуб Нёман паводле выбару карыстальнікаў Укантакце заняў 1-е месца ў апытанні "Самы беларускамоўны футбольны клуб Беларусі - 2016". 

Здаецца, гэта ганарова - быць самым беларускамоўным клубам Беларусі, асабліва калі такім клуб абралі не эксперты, а беларускія заўзятары, бо яны абіралі не толькі розумам, але і сэрцам.

Гэта было народнае галасаванне, у якім бралі ўдзел клубы ўсіх трох ліг беларускага чэмпіянату. Праз сіта папярэдніх адбораў-галасаванняў у фінал патрапілі Нёман, Гомель, Крумкачы і Дынама Мінск.

Безумоўна, усе фіналісты годна і шырока выкарыстоўвалі беларускую мову - выпадковых каманд карыстальнікі Укантакце ў фінал не правялі, што вельмі радуе, бо гэтая сацыяльная сетка славіцца сваімі недобрасумленнымі падыходамі.

Калі вяртацца да Нёмана і беларускай мовы, то нельга не ўзгадаць, што нацыянальная мова і культура з'яўляюцца адным з падмуркаў беларускай дзяржаўнасці і тое, што ў клубе гэта разумеюць і яе выкарыстоўваюць і падтрымліваюць кажа аб тым, што Нёман сапраўды беларускі футбольны клуб, а працуюць у іх сапраўдныя беларусы.

Падаецца, што шырокае выкарыстанне беларускай мовы ў клубе і тое, што клуб паводле апытання з даволі вялікім адрывам перамог сведчыць аб тым, што клуб мае добрую падтрымку і любоў сярод фанатаў і заўзятараў не толькі Гародні, але і іншых куточкаў Беларусі.

Клуб правёў цяжкі сезон, ледзьве ўтрымаўся ў Вышэйшай лізе, але шмат у чым і праз беларускую мову, напрацягу ўсяго сезона да яго было добрае стаўленне, беларуская мова працавала на пазітыўны імідж клуба, магчыма, у нечым і дапамагла яму застацца ў эліце - той жа Граніт прынцыпова адмаўляўся ад беларускай мовы і вылецеў у Першую лігу, хоць па гульні не так ужо і саступаў Нёману. Супадзенне? Не думаю.

У гэтым годзе, нажаль, праз брак часу і магчымасцяў не атрымалася зрабіць Рэйтынг "Самы беларускамоўны спартовы клуб", які складаўся ў 2014 і 2015 гадах па вызначаных крытэрах і які безэмацыйны - перамагаў той, хто большую колькасць балаў набраў. У 2015 годзе Нёман заняў даволі высокае месца - 7-е з 120 клубаў Беларусі.

Разам з тым, у 2015 годзе клуб не трапіў у фінал апытання ў Укантакце. Сёлета ён не толькі ў ім, але і перамог, што ўскосна падцвярджае тое, што клуб сапраўды дамогся вялікага прагрэсу ў галіне беларусізацыі.

Калі пералічваць, то беларуская мова ў Нёмане выкарыстоўвалася ў наступных выпадках: 

- Дыктар на хатніх матчах:

 - Клубны аўтобус; 

- Камплект футболак; 

- Прэс-канферэнцыі; 

- Версія сайта; 

- Суполка заўзятараў ФК Нёман ВК; 

- Старонкі клуба ў Twitter, Facebook, Instagram; 

- Канал на YouTube; 

- Электроннае табло; 

- Відэаагляды матчаў; 

- Футбольны слоўнік; 

- Іміджавыя відэаролікі; 

- Дзейнасць фанацкага руху і ГА "Клуб Заўзятараў".  

Усё гэта ФК Нёман робіць па-беларуску  - ў мінулым годзе гэты пералік быў меншы ў два разы.    Здаецца, што такімі тэмпамі беларусізацыю нарошчавала ў гэтым годзе толькі АБФФ - таму федэрацыі трэба звярнуць на клуб увагу і неяк адзначыць гэтыя дасягненні, бо і федэрацыя і Нёман крочаць у адным накірунку і ў адным тэмпе - робяць наш футбол па-сапраўднаму нацыянальным і беларускім.   

Наогул, было б цудоўна,  каб на цырымоніі закрыцця футбольнага сезону "Зорны мяч 2017" з'явілася яшчэ і намінацыя "Самы беларускаарыентаваны" ці "Самы патрыятычны" футбольны клуб, або нейкая іншая намінацыя, якая ўганароўвала б клуб, што найбольш выкарыстоўваў беларускую мову і культуру ў сезоне.  

Зараз шмат якія клубы пачалі больш шырока ўжываць беларускую мову і выбіраць будзе з каго. З'яўленне такой намінацыі вельмі важнае, бо стымулявала б развіццё нацыянальнай культуры ў нацыянальным футболе.

Для АБФФ гэта толькі дадатковы дыплом і статуэтка, а для клуба - вельмі ганаровая ўзнагарода, маральны кошт якой надзвычай вялікі.   

Упэўнены, што Нёман і надалей будзе толькі павялічваць ужыванне беларускай мовы і культуры ў сваёй дзейнасці, бо ў ім працуюць зараз цудоўныя беларускаарыентаваныя супрацоўнікі, у клуба шчырыя і моцныя беларускаарыентаваныя фанаты і заўзятары.

Федэрацыя футбола таксма праводзіць беларусізацыю.   Таму я спакойны за беларускую мову ў гарадзенскім клубе - яе там будзе толькі больш. І я буду спадзявацца, што наогул у Беларусі і не толькі ў спорце ў 2017 годзе беларуская мова будзе пашырацца.    

А вось што лічыць Павел Кулік, адданы заўзятар ФК Нёман, які вядзе статыстыку клуба, актыўны беларусізатар:

"Людзі абралі наш Нёман самым беларускамоўным футбольным клубам краіны, таму што гарадзенскі клуб сапраўды прыклаў шмат намаганняў у гэтым накірунку.

Прычым ініцыятыва ішла як ад заўзятараў, так і ад супрацоўнікаў клуба.

Так, у гэтым годзе ў Дзень роднай мовы (21 лютага) у Нёмана з'явілася беларускамоўная версія сайту, і ўсе навіны цяпер дублююцца на абедзвюх дзяржаўных мовах.

Быў запісаны відэаролік з віншаваннямі заўзятараў, дзе футбалісты асноўнага складу зачытвалі верш Янкі Купалы:https://www.youtube.com/watch?v=xfaVsyOvcg8

Гэты ролік натхніў заўзятараў на аб'яднанне агульных намаганняў, што вылілася ў актывізацыю грамадскай ініцыятывы "Клуб Заўзятараў ФК Нёман", усё справаводства якога таксама вядзецца па-беларуску.

У сваю чаргу, прэс-служба клуба не засталася ў баку ад пачаўшагася працэса беларусізацыі і таксама прапанавала свае ініцыятывы:

- Дыктар на хатніх матчах працуе на роднай мове, роўна як і адбываецца праца падчас пасляматчавых прэс-канферэнцый;

- Служба відэааператараў вядзе канал клуба на YouTube, афармляе відэаагляды матчаў на нашай мове;

- Амаль ва ўсіх сацыяльных сетках (акрамя ВК) старонкі вядуцца на беларускай мове, дзе напрыклад усе афішы надыходзячых матчаў робяцца беларускімі. Недахоп беларускай мовы ў ВК запаўняе суполка, якую вядуць заўзятары ў ВК неафіцыйна;

- Прыемным дадаткам стаў футбольны слоўнік у малюнках, які трансляваўся на экране падчас матчаў і на сайце. Асноўныя моманты, звязаныя з футболам, падаваліся ў фота з рускім і беларускім подпісам.

Беларускамоўная дзейнасць, мяркую, працягнецца і ў 2017 годзе. Наколькі я ведаю, ёсць планы рабіць праграмкі да матчаў на беларускай мове.

Усё што ўжо зроблена, застанецца ў цяперашнім выглядзе.Такім чынам, футбольны клуб з самага беларускага горада краіны стаў самым беларускім у нашым чэмпіянаце, і гэта справядліва. Гэта прыемны вынік для жыхароў Гродна, а таксама для яго гасцей, у тым ліку і замежных, якія цяпер могуць наведваць горад без візы."

Футбольны клуб Гомель паводле выбару карыстальнікаў Укантакце заняў 3-е месца ў апытанні "Самы беларускамоўны футбольны клуб Беларусі - 2016". 

У апытанні здзельнічалі ўсе футбольныя клубы Беларусі Вышэйшай, Першай і Другой ліг.  Апытанне праводзіцца чацьвёрты раз з 2013 году і Гомель з'яўляецца адзіным клубам, які трапляў у фінал усіх 4-х апытанняў (у фінал трапляе 3-4 клубы).

Апытанне набрала рэкордную колькасць прагаласаваўшых за ўсе чатыры гады. У 2013-2014 годзе Гомель займаў 1-е месца, у 2015 - другое, у 2016 - трэцяе.

Трэба адзначыць, што ў параўнанні з 2013 годам, за апошнія гады беларуская мова ў футболе надзвычай пашырылася і канкурэнцыя сярод каманд за права быць самым беларускім футбольным клубам істотна ўзрасла. Успомніў пераможцаў і фіналістаў 2013-2016 гадоў.

У 2013 годзе пераможцам быў Гомель. На 2-м месцы Дынама Брэст, 3-е - БАТЭ.

Фінал-2014 у арозненні ад Фінала-2013 складаўся з 4-х каманд. У 2014 годзе пераможцам быў таксама Гомель, а Дынама Брэст і БАТЭ у фінал не патрапілі, саступіўшы месцы Белшыне, Славіі і Тарпеда Мінск. 

Склад фіналістаў-2015 на 3/4 не змяніўся з 2014 года - толькі замест мазырскага Арла Славіі прыляцеў мінскі Крумкач Крумкачоў. 

Па выніках фіналу-2015 Гомель заняў 2-е месца, саступіўшы 1-е мінскім Крумкачам. Тарпеда Мінск заняло 3-е месца, а Белшына - 4-е. Фіналісты 2016 года змяніліся напалову - замест Белшыны і Тарпеда Мінск упершыню ў фінал патрапілі Нёман і мінскае Дынама. 

На гэты раз пераможцаў стаў Нёман, Крумкачы занялі 2-е месца, Гомель - 3-е, а мінскае Дынама - 4-е месца.

Прыемна, што Гомель застаецца стабільна адным з самых беларускамоўных клубаў Беларусі, а беларуская мова з кожным годам усё больш і больш пашыраецца ў беларускім футболе, што і зразумела - калі чэмпіянат беларускі, то і мова ў ім павінна дамінаваць беларуская.