Філіпенка – у чорным спісе, а яго жонка – хросная ў сям'і, якая прасоўвае музыку нявесткі Лукашэнкі і рэжымных спевакоў
Кіслякі і Стасевічы таксама побач.
Нядаўна жонка Ягора Філіпенкі Кацярына Рудзько адзначала дзень нараджэнне. У сторыз дзяўчына рэпосціла віншаванні з іншых акаўнтаў, сярод якіх былі цёплыя словы ад яе сяброўкі Сіны. Як аказалася, Рудзько з’яўляецца хроснай маці яе сына Роберта.
Наогул, у Сіны сяброўскія адносіны з многімі жонкамі беларускіх футбалістаў. У яе профілі ёсць сумесная фатаграфія з Юліяй Кісляк – жонкай Сяргея Кісляка. Фотасесіі для яе і сына рабіла Аляксандра Стасевіч – жонка Ігара Стасевіча, а каментуе пасты, пакідаючы пазітыўныя смайлікі, жонка Арцёма Гурэнкі – Лізавета.
У самой Сіны армянскія карані і нават ёсць пашпарт гэтай краіны. У профілі дзяўчыны ў інстаграме пазначана, што яна з’яўляецца кіраўніком кавярні «Рэдакцыя», якая размешчаная ў Мінску. А яшчэ Сіна стыліст. Яна, напрыклад, адказвала за касцюмы ў кліпе беларускага блогера SIVCHIK, вядомага яшчэ як Дзім Дзімыч (сёння яго выкарыстоўваюць для прапаганды лукашызму), на песню «Кубікі-рубікі». Відэа, у якім Сіна знялася і сама (на адзнацы 2:12 фарбуе машыну), сабрала больш за 23,3 мільёна праглядаў на YouTube.
Гэта адзін з самых прагледжаных кліпаў на YouTube-канале музычнага лэйбла Flagman Music. Яго заснавалі муж Сіны Кірыл Брэзанскі і Андрэй Паўловіч. Паводле інфармацыі партала KYKY, першага ў 2007 годзе асудзілі да трох гадоў «хіміі» за спробу рабавання з ужываннем гвалту, а другі ў 2013-м быў асуджаны на два гады «хіміі» за махлярства – тады ён узначальваў рэкламную кампанію «Белборд».
Кампанія Flagman Music з’явілася ў лістападзе 2020 года якраз тады, калі ў Беларусі пачалі забараняць папулярных выканаўцаў, якія выступілі супраць рэжыму. У той час на «Беларусь 1» мусіў стартаваць першы сезон «Фактар.BY» (першапачаткова шоў называлася «Х-фактар. Беларусь»), але прэм’еру фармальна праз кавід перанеслі на наступны год.
На фота: Брэзанскі (злева) з кліентамі Flagman Music.
Flagman Music стаў падпісваць маладых выканаўцаў з «Фактор.BY», які пачаў выходзіць у эфір з кастрычніка 2021 года, кшталту Мікіты Бялько і Насці Краўчанкі. У творчасці гэтых дваіх шмат агульнага: адны і тыя ж тэмы, паўтараюцца мелодыі, нават вокладкі трэкаў падобныя. Аднак у каталогу лэйбла ёсць не толькі выхадцы з «Фактар.BY». Гэты ж лэйбл выпусціў трэк «Ах, Аляксандр!», які Лукашэнку прысвяціла яго нявестка Ганна Сялук, жонка сярэдняга сына Дзмітрыя. Там жа выходзіў і «Бульба-дэнс» з удзелам Лукашэнкі і футбалістаў БАТЭ:
Сялук з’яўляецца аўтаркай шмат якіх трэкаў. Паводле «Люстэрка», на лістапад 2023-га ў каталогу інтэлектуальнай уласнасці значыліся 106 яе песень. Падобна, раскруціць усё гэта Flagman проста фізічна не змог – і частка «твораў» Сялук стала выходзіць у лэйбла «Музычная медыякампанія», якую заснавалі Палац Рэспублікі, які ўваходзіць ва Упраўленне справамі Лукашэнкі, і кампанія «АНСЛ прадакшн», абрывіятура якой сугучна з ініцыяламі Ганны Сялук.
Цікава, што кліенты ў двух лэйблаў практычна адны і тыя ж: Вікторыя Алешко, Руслан Аляхно, Зінаіда Фурор, выканаўца «Ах, Аляксандр!» Аляксандра Мелех і зноў-такі ўдзельнікі «Фактар.BY» – Андрэй Коласаў і Іван Дзятлаў. Паводле інфармацыі КУКУ, абодва праекты фінансуюцца з бюджэту. Характэрна, што сястра Сялук – Таццяна Кулакова – з’яўляецца адным з кіраўнікоў «Музычнай медыякампаніі».
Вось так у Беларусі спрабуюць замяніць музыкаў, якіх абурылі фальсіфікацыі і гвалт пасля выбараў-2020. Цікава, што сем’і Стасевіча і Філіпенкі таксама зведалі рэпрэсіі – абодва футбалісты трапілі ў чорны спіс рэжымнага міністэрства па спорце і ім фактычна забаронена займацца футболам у Беларусі.
Другие посты пользователя
