Самыя беларускамоўныя футбольныя клубы Беларусі

«ФК „Белшына“ практыкуе і будзе далей пашыраць ужываньне беларускай мовы. З усёй адказнасьцю і разуменьнем робім і будзем гэта рабіць, каб не забываць, хто мы і хто нашы дзяды і прадзеды», — так адказаў на прапанову пашырыць выкарыстаньне беларускай мовы генэральны дырэктар ФК «Белшына», былы старшыня Бабруйскага гарадзкога выканаўчага камітэту Міхаіл Бандарэнка.

Хоць «Белшына» і самы беларускамоўны футбольны клюб, ён яшчэ і самы бедны клюб Вышэйшай лігі беларускага чэмпіянату. Многія іншыя клюбы, да якіх я зьвяртаўся з прапановамі «беларусізацыі», апраўдваліся, што ня могуць з-за абмежаванасьці ў сродках. Досьвед «Белшыны» паказвае, што праблема ня ў сродках, а жаданьні.

Галоўным канкурэнтам «Белшыны» за ганаровае званьне «Самы беларускамоўны спартовы клюб» ёсьць ФК «Гомель». Ён гэтаксама гуляе ў Вышэйшай лізе.

Клюб ад 2012 г. ціхай сапай беларусізуецца. Намесьнік дырэктара «Гомеля» Віталь Кушнер у 2013 годзе па-расейску пісаў: «В 2012 году озвучивание матча проводилось на белорусском языке и практика прошлого года по дикторскому сопровождению на белорусском языке сохраниться и в сезоне 2013 года».

Дырэктар клюбу Яўген Пабалавец паабяцаў яшчэ і навіны рабіць на беларускай мове: «У сэзоне 2013 агучваньне пад час матчаў каманды на стадыёне „Цэнтральны“ працягнецца на беларускай мове, а таксама мы паспрабуем на афіцыйным сайце пачаць друкаваньне навінаў на беларускай мове».

Цікава, што Яўген Пабалавец, як і Міхаіл Бандарэнка, таксама ў мінулым чыноўнік. Да прыходу ў ФК «Гомель» працаваў у Гомельскім абласным выканаўчым камітэце. Як бачым, ня ўсе беларускія чыноўнікі грэбліва адносяцца да беларускай мовы і культуры.

Падрабязнасці, фота, сканы дакументаў па спасылцы