Беларус беларусу не роўны. Чаму варта наведаць матч «Цмокаў» з «Ніжнім Ноўгарадам»

26 студзеня а 19.00 «Цмокі-Мінск» сустрэнуцца з «Ніжнім Ноўгарадам» у рамках Адзінай лігі ВТБ. Прыезд лепшага баскетбаліста Беларусі мінулага года, навінка ад групы падтрымкі, успаміны пра папярэдні двубой і добрыя весткі ад «драконаў» – сярод прычын, па якіх у панядзелак варта наведацца на Мінск-Арэну.

Прыезд Парахоўскага

Панядзелкавым вечарам мінскія аматары баскетбола змогуць на свае вочы паназіраць за лепшым баскетбалістам Беларусі мінулага года – Арцёмам Парахоўскім. Перабраўшыся ў «Ніжні Ноўгарад» у міжсезонне, цэнтравы без цяжкасцяў стаў асноўным пятым нумарам, а таксама . Напрыклад, у лізе ВТБ волат займае трэцяе месца ў дружыне па выніковасці (14,7 ачка за матч), другое – па падборах (7,4) і першае – па блок-шотах (1,9). Акрамя таго, з’яўляецца надзейным абарончым слупам, які выконвае асноўную долю чарнавой працы. Апошні раз мы бачылі Парахоўскага на сталічных пляцоўках яшчэ летам 2013-га – у перыяд адбору да чэмпіянату Еўропы. На клубным жа ўзроўні Арцём у Мінску дагэтуль не выступаў.

Лепшыя з лепшых

Што цікава, у панядзелак на паркет выйдуць адразу тры лепшых баскетбаліста краіны за апошнія пяць гадоў. Бо па іншы бок барыкад з Парахоўскім будуць біцца форвард «Цмокаў» Павел Ульянка, які атрымаў аналагічнае прызнанне ў 2010-м, і абаронца «драконаў» Аляксандр Кудраўцаў, які ўтрымліваў пальму першынства з 2011-га па 2013-ы.

Удзельнік Топ-16 Еўралігі

Пры гэтым дуэт беларускіх ветэранаў разам з партнёрамі па калектыве будзе змагацца супраць аднаго з 16 наймацнейшых калектываў Старога Свету. Ганаровае званне «Ніжні Ноўгарад» заслужыў нечаканым, але справядлівым выхадам у Топ-16 Еўралігі. Квіток на прэстыжную стадыю расейцы літаральна вырвалі з рук канкурэнтаў. У прыватнасці, у перадапошнім туры адолелі ўзначалены Душанам Іўкавічам «Анадалу Эфес», а ў заключным – нашпігаваны зоркамі УНІКС, тым самым пакінуўшы казанцаў за бортам турніру. Поспех жа падапечных Багатскіса каштоўны яшчэ і тым, што ў згаданых паядынках яны абыходзіліся без траўмаванага лідара Тэйлара Рочэсці.

Прага рэваншу

Пашкоджанне Тэйлар атрымаў у снежаньскай дуэлі з «Рэалам», якая адбылася перад сустрэчай з «Цмокамі». Негатыўны эфект ад недахопу плэймэйкера апынуўся настолькі моцным, што расейцы ледзь не пацярпелі першае на той момант фіяска ў «банкаўскім» турніры, за хвіліну з невялікім і зусім саступаючы ў ліку. Праўда, актыўнасць згаданага Парахоўскага разам з якаснай абаронай дазволілі намінальнаму фаварыту ўзяць верх, а заадно і нажыць прынцыповага суперніка. Бо дзве крыўдныя паразы за тры апошніх сезона ўсялілі ў мінчукоў вострае жаданне рэваншу.

«Доўгатэрміновы» Мараш

У папярэднім жа матчы форвард «драконаў» Іван Мараш ледзь не сабраў дабл-дабл, а таксама стаў лепшым у складзе мінчукоў па паказчыку «+/-». У апошніх жа сустрэчах чарнагорац і зусім перакваліфікаваўся ў галоўную ўдарную сілу клуба. У прыватнасці, у гульнях з «Лока» і «Хімкамі» ён настраляў аж 39 ачкоў. Таму заўзятары клуба напэўна задаволеныя тым, што форвард падоўжыў кантракт на наступны сезон – і зараз могуць глядзець на яго не як на чарговага легіянера, які не затрымаецца ў сталіцы, а як на апору калектыву на бліжэйшыя паўтара года.

Навінка ад групы падтрымкі

Група падтрымкі «драконаў», безумоўна, дасць фору большасці завочных канкурэнтаў у «банкаўскім» турніры. Аднак хлопцы і дзяўчаты, якія ўносяць разнастайнасць у кароткія перапынкі, не спыняюцца на дасягнутым – і, каб пазбегнуць стагнацыі, на матчы з «Ніжнім Ноўгарадам» прадэманструюць заўзятарам чарговы новы нумар.

Адсутнасць альтэрнатывы

Традыцыйна панядзелак – дзень не толькі цяжкі, але і сумны. Шэраг забаўляльных мерапрыемстваў, якія напаўняюць выходныя, знікае. Таму няпроста знайсці магчымасці для забавак пасля складанага працоўнага дня. Як вынік, за пачаткам працоўнага тыдня нярэдка ідзе знаходжанне на пятай кропцы ў хатніх умовах. Добра, што на гэты раз у аматараў спорту з’явілася выдатная альтэрнатыва – бачыць суперніцтва беларускага флагмана з адной з лепшых каманд Еўропы.

Фота: БК «Ніжні Ноўгарад», БК «Цмокі-Мінск», Беларуская федэрацыя баскетбола