Каляфутбола. Развітанне з камандай нашай маладосці

Некалькі дзён таму на паштовую скрыню прыйшоў ліст аб тым, што з 1 ліпеня спыняюць сваё існаванне блогі tut.by. У пару, калі безлімітны інтэрнэт быў раскошай, тутбаеўская благасфера, якая працавала на "гасцявым" доступе (карыстальнікі byfly павінны мяне зразумець), была сапраўдным аазісам, дзе можна было знайсці сайт на любы густ: з фільмамі, музыкай і нават змесцівам для дарослых. 

У мяне таксама быў (да 1 ліпеня яшчэ ёсць) свой інтэрнет-дзённік з нетрывіяльнай назвай Бл.Я.Ха.  Яго я вёў дастаткова актыўна з 2009 па 2013 гады і напісаў больш за 1000 пастоў. Потым з навалай сацыяльных сетак, дзе дзяліцца думкамі было зручней, блог быў закінуты. Адной з ягоных "фішак" былі фотаагляды матчаў ФК "Слуцксахар" у другой лізе, якія я рабіў летам 2010 года. Я проста прыходзіў на матчы са сваёй мыльніцай і рабіў фотаздымкі, пасля чаго выкідваў іх у інтэрнет. Атрымлівалася, можа, не вельмі цікава, але аператыўна. Калі мясцовыя газеты давалі інфармацыю праз некалькі дзён, то мае фотаздымкі былі ўжо праз некалькі гадзін пасля фінальнага свістку.

Нейкай журналісцкай каштоўнасці ў тых аглядах мала - своеасаблівая мова плюс эксперыменты з фотаздымкамі (быў перыяд, калі мне здавалася, што завалены гарызонт - гэта крута). Але асабіста для мяне тыя матэрыялы дарагія тым, што яны пра тую каманду, па якой я зараз сумую - пра другалігавы "Слуцксахар".

Карыстацца правам пераехаць на асобны домен не бачу сэнсу, бо той блог я весці не збіраюся. Таму проста прапаную зацікаўлены ў апошні раз прагледзець тыя матэрыялы. Можа, каму падасца цікавым!

Спасылка на блог: http://realism.blog.tut.by/

Тэг "Слуцксахар": http://realism.blog.tut.by/tag/slucksaxar/

Тэг "футбол": http://realism.blog.tut.by/tag/futbol/