Плюшавы талісман “Іслачы” за матч фатаграфуецца больш за 1000 разоў

Тыя, хто быў на першай дамашняй гульні “Іслачы” заўважылі, што настрой гледачам на трыбунах ствараў талісман каманды – воўк Вулфі. 

– Вулфыч, – так і прадставіўся малады чалавек у касцюме ваўка. Але пазней “воўк” прызнаўся, што завуць яго Ігарам і што ён з’яўляецца заўзятарам “Іслачы” даўно.

– Спачатку прыйшоў у каманду як балельшчык, ездзіў на ўсе выезды каманды. Відаць, заслужыў, – смяецца хлопец, – што мне даверылі такую важную місію.

А місія, як прызнаецца Ігар, насамрэч вельмі важная: падымаць настрой гледачам на трыбунах.

– Футбол – гэта ж такая непрадказальная гульня, бывае, што каманда і прайграе. Гледачы злуюцца, лаюцца на футбалістаў. А тут з’яўляюся я. І ўсе ўсміхаюцца, усім весела.

– Ці цяжкая гэта работа – працаваць “ваўком”?

– Ну, па-першае, гэта работа прыемная, а потым ужо цяжкая. За матч даводзіцца фатаграфавацца з тысяччу людзей. Сёння ў Маладзечне, здаецца, ужо сфатаграфаваўся 5000 разоў, некаторыя ж па некалькі разоў фатаграфуюцца.

Ваўка завуць Вулфі, так вырашылі балельшчыкі клуба “Іслач” падчас галасавання.

У спадзяванні пачуць доўгую і цікавую гісторыю з’яўлення імя Вулфі, мы звярнуліся да таго, хто прапанаваў назваць так ваўка – балельшчыка ФК “Іслач”  Цімура Кульмуратава.

– З іменем Вулфі ўсё проста – ад англійскага слова Вулф, якое і перакладаецца як воўк. Таму вымушаны расчараваць – легенды і гісторыі ніякай няма. Прастата – заклад поспеху.

Лагатып каманды – воўк які вышчарыўся , быў створаны ў 2010 годзе.  Гэты звер быў абраны па некалькіх прычынах.

Па-першае, воўк ўвасабляе бясстрашнасць, стойкасць і мужнасць, з'яўляецца сімвалам высокай маральнасці, справядлівасці і гонару. У любой сутычцы воўк змагаецца да перамогі. Воўк – гэта мудры, хітры, адважны, вынослівы звер, які варты павагі. Ён можа быць велікадушным, прыязным і адданым, мець спагаду. Тое, што воўк вышчараецца –  гэта сімвал мэтанакіраванасці, сілы, свабоды і незалежнасці, вернасці сваім інтарэсам і жаданнем іх абараняць.

Па-другое, воўк асацыюецца з лесам. Каманда стварылася на тэрыторыі Мінскага раёна, амаль трэць плошчы якога займае лес.

Па-трэцяе, на пачатку існавання каманды ў яе складзе выступала некалькі гульцоў з прозвішчам Волкаў.

Источник: Рэгiянальная газета