Тут нараджаюцца легенды: гандбольнаму клубу «Віцязь» спаўняецца 5 гадоў!

Паводле афіцыйнай гісторыі «Віцязя» клуб сфармаваўся вясной 2012 года на базе студэнцкай каманды Беларускага дзяржаўнага эканамічнага універсітэта. Ўвесь папярэдні сезон студэнты бліскуча выступалі на ўсіх «аматарах», бралi кубкі і медалі адзін за адным. Вынікі і перспектывы па-сапраўднаму закружылі галаву. Напэўна, на гэтай пераможнай хвалі ў агульнай вясновай эйфарыі сама па сабе і нарадзілася ідэя стварыць афіцыйны клуб і заявіцца ў чэмпіянат Беларусі. Назваць аўтарам ідэі кагосьці канкрэтнага сёння ўжо немагчыма. Яна ўзнікла стыхійна, зусім сама па сабе.  Менавіта 14 чэрвеня 2012 гандбольны клуб «Віцязь» атрымаў рэгістрацыю ў якасці спартовага грамадскага аб'яднання. Заснавальнікамі клуба выступілі самі гульцы.

Менавіта з таго першапачатковага складу за клуб да сённяшняй пары гуляюць браты Іван і Віталь Юркевічы, Яўген Кавальчук, Глеб Ваявода, Дзмітрый Бабкевіч, Антон Ладуцька, Ілля Дударонак і Аляксандр Ланін. Яны таксама з'яўляюцца афіцыйнымі заснавальнікамі клуба.

Першым старшынёй клуба быў абраны тагачасны загадчык кафедры фізкультуры і эканомікі спорту БДЭУ, а сёння рэктар Беларускага дзяржаўнага ўніверсітэта фізкультуры і віцэ-прэзідэнт Нацыянальнага алімпійскага камітэта Сяргей Рэпкін. 

Дырэктарам клуба быў прызначаны Аляксандр Апейкин, які на працягу некалькіх гадоў таксама з'яўляўся заснавальнікам і дырэктарам Дыскусійна-аналітычнай супольнасці «Ліберальны клуб». Аляксандр кіруе «Віцязем» і па сённяшні дзень.

Першым прэс-сакратаром клуба стаў Васіль Корф. Менавіта ён заклаў аснову ўсёй інфармацыйнай працы «Віцязя». Пазней Васіль перайшоў на працу ў БГК імя. Мяшкова. Сёння Васіль Корф з'яўляецца дырэктарам арт-студыі "Сонца ўзыйдзе" і экспертам «Ліберальнага клуба»

Дырэктарам па маркетынгу клуба ў перыяд з 2012 па 2015 гады з'яўляўся былы варатар маладзёжнай зборнай і сын вядомага моладзевага трэнера Мікалая Жука Уладзімір Жук.

Ну і нарэшце галоўным трэнерам той каманды выступіў адзін з лепшых маладзёжных трэнераў краіны і проста каларытная асоба Мікалай Жук. Каманда ў розных складах працавала пад яго кіраўніцтвам аж да лета 2015 года.

Свой першы афіцыйны сезон клуб праводзіць з пераменным поспехам. Каманда выглядае не згулянай, сырой, і відавочна прайграе ў фізічных кандыцыях сваім супернікам. Тым не менш, "Віцязь" выдае некалькі феерычных матчаў супраць "моцных сераднякоў" таго сезона - "Гомеля", "Аркатрона" і "БГК-2". Але ў выніку каманда займае 15-ы радок у чэмпіянаце Беларусі.

Праўда, чэмпіянат у той час быў трохі цікавей, і на матчы "Віцязя" часам збіралася вельмі прыстойная аўдыторыя.

У сакавіку 2013 года "Віцязь» заключыў пагадненне з Рэспубліканскім вучылішчам алімпійскага рэзерву (РВАР). Амаль усе гульцы папярэдняга складу былі заменены маладымі гандбалістамі, большасць з якіх выступалі за юнацкую зборную. Праект «Віцязь-РВАР» праіснаваў два сезона і скончыўся выпускам гульцоў 1996 года нараджэння. Каманда таксама правяла два сезона ў Балтыйскай лізе. З таго пакалення гульцоў у камандзе да сённяшняга дня паспяхова выступаюць Аляксей Баклажэц і Андрэй Васілевіч.

Лідэрамі каманды тых гадоў былі выдатныя гульцы, для якіх «Віцязь» заўсёды будзе іх першым клубам.

Гулец нацыянальнай зборнай Беларусі і лідэр гандбольнага клуба «СКА-Мінск" Аляксандр Падшывалаў. P.S.:фото Антон Сурапін.

Гулец нацыянальнай зборнай Беларусі і БГК ім. Мяшкова Арцём Кулак. У 2017 годзе намінаваны на званне лепшага маладога плэймейкера планеты.

Гулец нацыянальнай зборнай Беларусі і БГК ім. Мяшкова Андрэй Юрынок. У 2017 годзе намінаваны на званне лепшага маладога левага крайняга планеты. 

Капітанам каманды тых гадоў быў сённяшні гулец эстонскай «Кехры» і проста добры хлопец Мікіта Ермашэвіч.

Цягам двух гадоў "Віцязь" выступае фактычна двума складамі - каманда РВАР гуляе ў чэмпіянаце Беларусі і Балтыйскай лізе, каманда "ветэранаў" - даволі паспяхова ў аматарскіх турнірах. Але былі і "эксперыментальныя" склады для выездаў у тую ж Балтыйскую лігу.

Пасля сезону 2013/2014 і роспуску гульцоў РВАРа «Віцязь» ўпадае ў перыяд смуты і нявызначанасці. Каманда не знаходзіць сродкаў на заяўку ў чэмпіянат Беларусі і прымае рашэнне ўдзельнічаць толькі ў Балтыйскай лізе і аматарскіх турнірах.У гандбольным асяроддзі распаўсюджваецца меркаванне, што клуб разваліўся.

На справе ж гэта быў перыяд поўнай перабудовы і назапашвання сіл. Менавіта ў той момант і нарадзілася стратэгія, якая дала новы імпульс камандзе. Да "віцязяў" далучаюцца майстры гандбола Арцём Красуцкі, Дзмітры Бабічаў, Антон Бароўскі, Вадзім Котаў. Каманда перамагае ў чэмпіянаце горада Мінска і знаходзіць новыя сілы для развіцця.

Адраджэньне «Віцязя» стала магчымым толькі дзякуючы самаадданасці гульцоў і ўпартай працы капітана і трэнера каманды таго цяжкага сезона Сяргея Радзюкова. Сёння Сяргей лідэр эстонскага клуба «Вільяндзі», за які ён выступае з мінулай восені.

У пачатку 2016 года ў «Віцязь» прыходзіць вопытны спецыяліст і аўтарытэтны трэнер Аляксандр Жыркевіч. Ён аб'ядноўвае вакол сябе каманду, збірае дадатковых гульцоў і выбудоўвае сістэмны трэніравальны працэс. Каманда набірае ход і ўпэўнена заяўляецца ў чэмпіянат Беларусі ў сезоне 2016/2017.

Сезон 2016/2017 становіцца для "Віцязя" вырашальным. Напрацягу ўсяго года каманда дэманструе якасны гандбол і даказвае сваю ўпэўненасць. А перамогі ў асобных матчах і зусім сведчаць аб сталасці і здаровай атмасферы ў камандзе. Сваё высокае майстэрства даказываюць гульцы Глеб Ваявода, Арцём Красуцкі, Іван Юркевіч, Яўген Кавальчук, Вадзім Котаў, Канстанцін Грыбаў і інш. 

Сёння «Віцязь» - гэта ўпэўнены і зладжаны калектыў гульцоў з прафесійным стаўленнем да гандбола. У мінулым сезоне каманда даказала свой сур'ёзны ўзровень, заняўшы 6-е месца з 11 каманд у чэмпіянаце Беларусі і прабіўшыся на наступны сезон у групу «А». Каманда працягвае ўзмацняцца новымі гульцамі і будуе важкія планы на бліжэйшую восень.

Спасылкі на афіцыйныя старонкі "Віцязя" у сацыяльных сетках:"Вконтакте" Facebook