Аварыі, сутыкненні і лёгкая перамога Крыстоферсана і Тэйлар. Этап Extreme E на Сардыніі выйшаў эфектным

Фота: extreme-e.com

Серыя электрычных пазадарожных гонак Extreme E у мінулыя выхадныя гасцявала на выспе Сардынія. Запомніўся этап не толькі перамогай экіпажу Йохана Крыстоферсана і Молі Тэйлар, але і шматлікімі здарэннямі.

Наогул, Extreme E першапачаткова мусіла праводзіць апошнія два этапы ў Паўднёвай Амерыцы – у Бразіліі і Аргенціне. Але пандэмія ўнесла свае карэктывы, і арганізатарам прыйшлося замяняць гэтыя краіны Італіяй і Вялікабрытаніяй. Хаця той жа сусветны Супербайк нядаўна без асабістых праблем наведаў Аргенціну, а Формула-1 збіраецца ў Бразілію, пра адмену этапу ніхто не гаворыць.

Аднак і Сардынія – месца для гонак падыходнае. Як, зрэшты, і Корсіка, якую я памылкова, проста пераблытаўшы, указаў у мінулы раз, за што выбачаюся. Вам гэта пацвердзяць у тым ліку і ўдзельнікі чэмпіянатаў свету па ралі і мотакросе, якія ў гэтым годзе на італьянскую выспу ўжо прыязджалі. Ды і ў Extreme E пра гэта ведаюць як мінімум Стэфан Саразэн, Карлас Сайнс-старэйшы і Себасцьен Лёб, для якіх ралі – родная стыхія. Але не ўсе з іх будуць успамінаць мінулы этап з цеплынёй, хоць ён і мусіў быў прыцягнуць увагу да росту тэмператур і лясных пажараў.

Аварый і сходаў з дыстанцыі ў гэты раз было шмат. Прычым гоншчыкі і гоншчыцы і адно з адным сутыкаліся, і самі наварочваліся на роўным месцы. Ну, не на роўным, канечне – гэта ж пазадарожныя гонкі. І той жа Саразэн, атрымаўшы Odyssey 21 ад напарніцы па камандзе Veloce Racing Джэймі Чадвік і ідучы другім ў заездзе Crazy Race, дзе разыгрываецца апошняя пуцёўка ў фінал, перакуліўся ў выніку няўдалага скоку на трампліне, прычым зусім не экстрэмальнага.

А яшчэ ў першым паўфінале не пашанцавала і камандзе сяміразовага і дзейснага чэмпіёна Формулы-1 Льюіса Хэмілтана X44, за якую выступаюць Лёб і Крысціна Гуцьерэс. Пакуль іх бос рыхтаваўся да старту на Гран Пры ЗША, дзевяціразовага чэмпіёна свету па ралі з яго іспанскай напарніцай пакрыўдзіў лідар чэмпіянату свету па ралі-кросе Цімі Хансэн, які разам з Каці Манінгс выступае за Andretti United Extreme E.

Гэта швед перастараўся на старце, што прывяло да кантакту з машынай Гуцьерэс, у выніку якога і яна, і Хансэн зляцелі з трасы і разбілі свае Адысеі. Так што амерыканцам Кайлу Ледзюку і Сары Прайс з амерыканскай жа каманды Chip Ganassi для перамогі ў тым заездзе было дастаткова проста даехаць да фінішу, што яны і зрабілі. А Лёб з Гуцьерэс у фінал усё ж патрапілі пасля таго, як суддзі ў стартавым інцыдэнце прызналі вінаватым Хансэна і аштрафавалі яго з Манінгс экіпаж.

Другі паўфінал прайшоў меней драматычна, але ў ім зноў выявілася недастатковая надзейнасць і трываласць электрычных пазадарожнікаў Odyssey 21. Машына старэйшага Сайнса і Лаі Санц (якраз двухразовы чэмпіён свету па ралі і глава каманды Acciona Sainz XE Team і быў на той момант за яе стырном) запаволілася. Хутчэй за ўсё, ізноў праз электронныя праблемы, таму што падвеска выглядала цэлай.

Так ці інакш, экіпаж іспанца і іспанкі да фінішу дабраўся толькі праз сем хвілін і сорак секунд (!) пасля пераможцаў – Йохана Крыстоферсана і Молі Тэйлар, гоншчыка і гоншчыцы каманды чэмпіёна Формулы-1 2016 года Ніка Росберга Rosberg X Racing. Другімі ў тым заездзе фінішавалі яшчэ адны зоркі сусветнага аўтаспорту з каманды ABT Cupra XE – Маціас Экстром і Юта Кляйншмідт, якія таксама прайшлі ў фінал.

А вось малодшаму брату Цімі Хансэна і яго напарніку па іх сямейнай камандзе ў сусветным ралі-кросе Кэвіну, які ў Extreme E мусіць выступаць за калектыў JBXE чэмпіёна Формулы-1 2009 года Джэнсана Батана разам з Мікаэлай Алін-Катулінскі, у вырашальны заезд прыйшлося прарывацца з суцяшальнага Crazy Race.

Зрэшты, швед на старце захапіў лідарства, адбіў атаку гоншчыка Hispano Suiza Xite Energy Team Олівера Бэнэта і… таксама проста фінішаваў! Таму што на другім кругу машына Бэнэта і Крысцін Джіампаолі Зонкі зламалася, не даехаўшы да фінішу, а Саразэн патрапіў у згаданую вышэй непрыемнасць.

Ну і ў фінале хапала падзей. Спачатку разам з усімі астатнімі праз уласную памылку не змагла стартаваць Кляйншмідт, затым развярнула Алін-Катулінскі, на машыне Лёба і Гуцьерэс зламалася пярэдняя падвеска, а на другім кругу такая ж непрыемнасць насцігла і экіпаж Ледзюка і Прайс, які на той момант упэўнена лідзіраваў, болей чым на сорак секунд апярэджваючы экіпаж Тэйлар і Крыстоферсана.

Апошнія ў выніку і перамаглі ўжо трэці раз у сезоне. Кляйншмідт і Экстром фінішавалі другімі, але таксама не без страт – іх электрапазадарожнік на другім кругу, калі за стырном быў Маціас, застаўся без правай дзверы. Трэцяе месца дасталася экіпажу Кэвіна Хансэна і Мікаэлы Алін-Катулінскі.

Перамога каманды Rosberg X Racing, канечне, замацавала яе лідарства ў чэмпіянаце, дзе ў яе (і, адпаведна, у Крыстоферсана і Тэйлар) цяпер 129 ачкоў. Аднак і Лёб з Гуцьерэс і каманда X44 нават пасля няўдачы на Сардыніі, адстаючы на шаснаццаць балаў, яшчэ таксама маюць шанцы стаць першымі чэмпіёнамі серыі Extreme E. Каманда Andretti United Extreme E і Цімі Хансэн з Каці Манінгс засталіся трэцімі, у іх 93 ачкі.

Фінальны этап Extreme E, які будзе называцца Jurassic X Prix, пройдзе 18-19 снежня на тэрыторыі ваеннай базы Бовінгтан, што ў англійскім графстве Дорсэт.