Чаму Гурэнка выглядае галоўным кандыдатам на наступную адстаўку ў ЧБ

Прызначэнне Сяргея Гурэнкі ў «Віцебск» у мінулым сезоне выклікала даволі вялікі рэзананс. У Беларусі спецыяліст апошнім часам узначальваў значна больш амбітныя праекты: з мінскім «Дынама» трэба было біцца як мінімум за медалі, у «Шахцёры» стаяла задача давесці каманду да чэмпіёнства. Быў на трэнера і які-ніякі попыт за мяжой – а тут раптам барацьба за выжыванне ў «вышцы».

Зрэшты, калі крыху занурыцца ў партфоліа Гурэнкі апошніх гадоў, то паездка на поўнач краіны не выглядае вельмі дзіўнай. Ва ўсіх сваіх трох апошніх клубах спецыяліст не затрымліваўся больш, чым на 3 месяцы.

Пасля траціны сезона-2026 Гурэнка зноў выглядае прэтэндэнтам на адстаўку – і вось чаму.

Ува што наогул гуляе «Віцебск»?

Каманды Гурэнкі бадай ніколі не гулялі ярка ў атаку, і сёлетні «Віцебск» не выключэнне. Яшчэ ў пачатку сезона коўч сказаў, што найперш трэба навесці «парадак у абароне», дадаўшы, што ў лізе цяпер «мала футбола, але шмат адзінаборстваў». З тых часоў траўка падрасла, і калектывы, што прагнуць карыстацца кароткім пасам, на яго і перайшлі, а вось «паўночнікі» засталіся пры сваім.

Фота: тэлеграм-канал «Віцебска»

Каманда Гурэнкі ідзе сярод лідараў лігі па колькасці доўгіх перадач і мае вельмі нізкую дакладнасць усіх пасоў – усяго 73% (15-е месца). Яскравае пацверджанне простасці падыходаў віцебчукоў – удары ад брамы: паводле RuStat, кіперы каманды ўсяго адзін (!) раз за 10 тураў увялі мяч кароткім пасам, пры гэтым зрабіўшы 67 вынасаў.

Варта адзначыць, што «паўночнікі» пры ўсёй сваёй прымітыўнасці кантралююць мяч больш часу за сярэдні паказнік па лізе, але гэта не прызнак дамінацыі. «Віцебск» паслядоўна гуляе проста і ў фінальнай траціне поле. Няцяжка згадацца, што галоўная зброя каманды ў пазіцыйных атаках – навесы. Па іх колькасці футбалісты Гурэнкі ў «вышцы» лідаруюць.

Калі б план коўча меў плён, то пытанняў да стылістыкі было б менш, але нават акцэнт на абарону працуе не вельмі: «Віцебск» за дзесяць тураў дапусціў момантаў ажно на 18,66 xG, прапусціўшы пры гэтым толькі 12 рэальных галоў. Зрэшты, вінаваты тут не толькі трэнер.

Футбалісты «Віцебска» прывозяць на роўным месцы як ніхто іншы

Эпапея з вельмі грубымі памылкамі пачалася ўжо ў 1-м туры супраць «Гомеля» (1:1). Старт ёй паклаў кіпер Іван Навічкоў – з запасам найгоршы гулец віцебчукоў у першых турах у тым моманце не змог дабрацца да мяча на выхадзе.

У наступнай гульні супраць «Нёмана» «сола» выдаў Яраслаў Макушынскі. Спачатку абаронца проста загнаў мяч у сваю браму пасля прастрэлу.

А потым ён жа на роўным месцы выкаціў мяч Паўлу Савіцкаму пад выхад сам-насам.

Ужо ў 4-м туры супраць «Нафтана» зноў прывёз Навічкоў, прапусціўшы ну вельмі дальні штарафны ад Яўгена Драбатовіча. Адзначым, што ў астаніх турах брамнік таксама гуляў вельмі няўпэўнена і мог падставіць віцебчукоў значна большую колькасць разоў.

У 8-м туры месца ў браме ўжо займаў расіянін Мікіта Гойла. Вось так ён паспрабаваў згуляць на выхадзе ў моманце з голам «Тарпеда-БелАЗ», не зрабіўшы высноў з памылак Навічкова.

У 9-м туры супраць «Іслачы» адкрыліся новыя героі прывозаў – Владлен Анікееў і сценка падчас штрафнога. Першы даў міма мяча і арганізаваў супернікам атаку тры ў адзін.

Ну а калектыўная сценка проста разышлася падчас штрафнога.

У 10-м туры з «Баранавічамі» (2:3) учынак Макушынскага паўтарыў ужо Віктор Каржыцкі.

Што мы маем у суме? Восем (!) дзіцячых памылак – і гэта толькі тыя, што прывялі да галоў. Сюды ж можна дадаць слабую арганізаванаць пры стандартах: «Віцебск» прапусціў пасля чатырох кутніх і аднаго штрафнога.

Навучыць гульцоў не аддаваць мяч нападнікам суперніка Гурэнка, бадай, не можа, а вось стандарты – дакладна адказнасць трэнерскага штабу.

Пакуль «Віцебск» не ў зоне вылету, але ўсё хутка можа змяніцца

Серыя з шасці матчаў без перамог прывяла віцебчукоў на 11-е месца. Пасля дзесяці тураў яны маюць 10 балаў і ідуць вельмі блізка да зоны вылету.

Поўная табліца чэмпіянату Беларусі на «Трыбуне»

Важны нюанс палягае ў тым, што каманда Гурэнкі правяла матчы супраць амаль усіх аўтсайдараў і страціла шмат важных балаў: «Баранавічам» і «Белшыне» прагуляла; з «Нафтанам» здабыла толькі нічыю, што можна прыраўняць да паразы. Перамагчы ўдалося толькі БАТЭ.

У наступных трох турах «Віцебк» чакаюць «МЛ» (Д), брэсцкае «Дынама» (Д) і «Дынама» Мінск (Г) – тут усе шанцы нарвацца на яшчэ больш працяглую серыю без перамог і пад канец першага кола знайсці сябе ў зоне вылету. А гэта ўжо вельмі значная дыстанцыя.

Па нашай інфармацыі пасля 10-га тура Гурэнка даў футбалістам толькі два выходных, а на гэтым тыдні – падчас паўзы на матчы зборных – каманда будзе трэнавацца ў двухразавым рэжыме.

Можа, барацьба за выжыванне – гэта і ёсць задачай «Віцебка»?

Крыніцы «Трыбуны» паведамляюць, што на сёння дадатковага ціску на Гурэнку не аказваецца. Дырэктар клуба Мікалай Вайцюхоўскі прысутнічае на трэнінгах каманды, але толькі назірае за імі з боку і не ўмешваецца.

Фота: афіцыйны сайт «Уфы»

Варта адзначыць, што трэнер адразу пасля прыходу ў клуб казаў, што на яго рашэнне прыняць каманду паўплывала менавіта персона Вацюхоўскага, які, на яго думку, «моцны кіраўнік» і «прыстойны чалавек».

Але якія мэты пры гэтым абазначылі ўнутры клуба на сезон – сказаць вельмі складана. Вайцюхоўскі выказваўся збольшага рашуча, але размыта. Маўляў, трэнера захавалі, а значыць «задачы будуць высокімі», бо Гурэнка «несупастаўны» з планам «змагацца за выжыванне».

Сам спецыяліст пры гэтым публічна выступае яшчэ больш дзіўна і ўжо некалькі разоў за сезон паўтарыў, што пакуль не разумее, на што здольная яго каманда. «Калі ўсё складзецца, то будзем размяшчацца ўверсе табліцы. Не дай бог пачнуцца праблемы, будзем ваяваць у падвале», – сказаў Гурэнка, пакінуўшы сабе агромністую прастору для манёўраў. Адзіная канкрэтыка ад коўча – упэўненасць у тым, што «Віцебск» пакажа вынік лепш за 12-е месца ў сезоне-2025.

Але ўжо скора «паўночнікі», наадварот, могуць апынуцца ніжэй за заплаваны радок – ці задаволіць такі тэмп кіраўніка, якому належыць рэкорд ЧБ па прызначэнні пяці трэнераў за сезон?