Гурэнка пра кантракт з «Віцебскам»: «Калі добра працуеш – працуеш доўга. Калі дрэнна – едзеш дадому»

Новы галоўны трэнер «Віцебска» Сяргей Гурэнка падзяліўся першым каментарыем пасля прызначэння.

– Сяргей Вітальевіч, вы не трэніравалі з 2023 года, калі пакінулі «Уфу». Якія эмоцыі пасля прызначэння ў «Віцебск»?

– Асаблівых эмоцый няма. Прыехаў і пакуль толькі пазнаёміўся з камандай. Для пачатку трэба ва ўсім разабрацца.

– Якія мэты пастаўлены перад вамі кіраўніцтвам?

– Годна скончыць чэмпіянат.

– Ваш папярэднік на пасадзе галоўнага трэнера «Віцебску» Ігар Слесарчук казаў, што склад каманды – не пад тыя мэты, якія ставіць кіраўніцтва. Згодны?

– Давайце мы з хлопцамі крышку папрацуем. З многімі футбалістамі з гэтага складу я ўжо раней сутыкаўся. Плюс тут шмат вопытных хлопцаў, супраць якіх гулялі мае былыя каманды. У цэлым, у «Віцебску» сёлета падабраўся дастаткова добры калектыў. Адзінае, магчыма, нешта недзе ў каманды не пайшло, і быў нейкі збой. Але я думаю, што каманда яшчэ пакажа сябе, і веру ў хлопцаў. Тым больш, я не пайшоў бы працаваць сюды, калі б у мяне не было веры ў гэта.

– Пасля сыходу Слесарчука абавязкі галоўнага трэнера «Віцебску» выконваў Максім Разумаў. Хто вам будзе дапамагаць?

– Трэнерскі штаб застанецца ранейшым, у дадзены момант не бачу сэнсу нешта мяняць. Бо да канца чэмпіянату засталося літаральна два месяцы.

– На які тэрмін заключылі кантракт?

– Гэта мы пакуль наогул не абгаворвалі. І скажу больш: на маё рашэнне ўзначаліць віцебскі клуб шмат у чым паўплывала размова з дырэктарам Мікалаем Вайцюхоўскім. Я яго ведаю вельмі даўно. Ведаю як моцнага кіраўніка і прыстойнага чалавека. А наконт тэрміну дзеяння кантракта – па вялікім рахунку, якая розніца? Калі добра працуеш – працуеш доўга. Калі дрэнна – едзеш дадому, – сказаў Гурэнка.