Расціслаў Вяргун: «Мне здаецца, што цяперашняму складу зборнай Беларусі было б па сілах прабіцца ў топ-24 на ЧЕ»
Галоўны трэнер зборнай Беларусі Расціслаў Вяргун распавёў пра цяперашні ўзровень каманды.
– Невядома, калі беларуская зборная атрымае магчымасць удзельнічаць у міжнародных спаборніцтвах. Таму асаблівую ўвагу трэба надаваць моладзі. Яна вас радуе ці засмучае? Ці ёсць хлопцы, якія праз некалькі гадоў здольныя стаць лідарамі зборнай?
– Па выніках збору ды і ўсяго сезону адзначыў бы Андрэя Ажго. Ён ужо паўнавартасны член нацыянальнай каманды, і, мне здаецца, у яго ёсць патэнцыял пагуляць у сурʼёзнай лізе. Імпануе, як Андрэй выступаў у моладзевым праекце «Мінска». Падабаецца не толькі тое, што ён паказвае на пляцоўцы, хоць абʼектыўна гэта самы важны крытэр, але і яго паводзіны, лідарскія якасці. У наступным сезоне «моладзёўцы» «Мінска» яго будзе моцна не хапаць. Калі казаць пра іншых хлопцаў, якіх мы адабралі па выніках леташняга збору для дзевятнаццацігадовых, то дадалі ўсё. Гэта сведчыць пра тое, што была праведзена якасная праца і ўзровень моладзевай лігі ВТБ правільны, бо развівацца можна толькі ў моцным асяроддзі. Пажадаю хлопцам з другога сезона выціснуць яшчэ больш у плане індывідуальнага развіцця.
– Вы па-ранейшаму застаяцеся праціўнікам натуралізацыі ў зборнай?
– Так, я ніколі не быў прыхільнікам гэтага. Вядома, моцны натуралізаваны гулец нам, напэўна, не перашкодзіў бы. Па-добраму зайздрошчу краінам Прыбалтыкі і былой Югаславіі – яны маюць нацыянальныя школы. Хочацца верыць, што існуе таксама школа беларускага мужчынскага баскетбола і яна ў стане быць самадастатковай, гадаваць дзяцей, якія будуць канкурэнтаздольнымі на міжнароднай арэне. Субʼектыўнае меркаванне, але мне здаецца, што цяперашняму складу зборнай было б па сілах прабіцца ў топ-24 на чэмпіянат Еўропы. І калі адхіленне ўсё ж здымуць, менавіта гэтая задача будзе намі вырашацца.
Прыемна, што зараз склад нацыянальнай каманды правільна збалансаваны. Ёсць лідары, шэсць-восем чалавек, якія будуць рабіць вынік. Ёсць гульцы з вузкай спецыялізацыяй, неабходныя ў канкрэтны момант. І ёсць моладзь, якая дае зборнай свежую кроў, энергію, імпульс і якая прымушае «старых» не расслабляцца. Склад разнастайны – не шэрая маса, дзе плюс-мінус усе аднолькавыя. Паспяховыя каманды менавіта такія: са збалансаваным складам, здаровай атмасферай у калектыве, якая дазваляе дамагацца высокіх вынікаў, – сказаў Вяргун.
