«Жальгірыс» саступіў «Партызану»

Матчы «Жальгірыса» супраць сербскіх каманд сталі гарачэйшымі за любыя дэрбі з вясны 2022 года. Прычына відавочная – у літоўцаў і, прынамсі, сербскіх фанатаў значна разыходзяцца каштоўнасці. Камусьці падабаецца «рускі свет» і генацыд украінцаў, а хтосьці ненавідзіць захопныя войны і падтрымлівае Украіну, на якую напала Расія. Напэўна, таму літоўцы асабліва і не здзівіліся, што фанаты «Партызана» штосьці скандавалі падчас гімна Літвы. Проста праспявалі яго яшчэ грамчэй.

Сербская каманда моцна пачала матч – праз дзве з паловай хвіліны на табло быў лік 2:9 на карысць сербаў. Хуткі выхад на пляцоўку Біруціса таксама не тое каб дапамог Максвіцісу – яму давялося браць тайм-аўт пасля чатырох хвілін гульні, бо «Партызан» адарваўся ўжо на 10 ачкоў (3:13). Эванс крыху дапамог скараціць адрыў, а пасля на пляцоўку выйшаў у дапамогу Саннер. Адразу ж пасля гэтага Шмітс закінуў трохачковы (10:16). Арэна выбухнула і пачала асвістваць сербаў яшчэ актыўней. Пантэр не патрапіў падчас сваёй атакі, Дзімша падабраў мяч і, праляцеўшы праз усю пляцоўку, закінуў сам (12:16). Але ўжо праз лічаныя секунды Нанэлі не проста закінуў трохачковы, а здолеў гэта зрабіць пасля фола – і дадаў яшчэ адзін штрафны (12:20).

Літоўцы знайшлі ў сабе сілы – і Дзімша, Лаўрынавічус і Гедрайціс скарацілі адрыў да мінімума (19:22). Але ў наступныя дзве атакі сербы моцна вырваліся наперад: пакуль Пантэр закідваў трохачковы, Шмітс фаліў на Вукчэвічы – так сербы атрымалі 5 ачкоў за адну атаку. Першую чвэрць каманды скончылі з лікам 21:29.

Другая чвэрць пачалася з трох ачкоў ад «Партызана» пад скандаванне літоўскіх фанатаў пра Сербію і Расію. У наступныя дзве хвіліны ў сербаў атрымлівалася літаральна ўсё. Калі лік стаў 24:40, галоўны трэнер «Жальгірыса» ўзяў тайм-аўт. Спыніць Кевіна Пантэра ў гэтым матчы не атрымлівалася зусім – з 40 ачкоў «Партызана» на той момант ён прынёс 14.

Эванс, Хейс і Шмітс прынеслі 7 ачкоў, але сербы хутка вярнулі парытэт. Трохачковы Дзімшы скараціў адрыў літоўцаў да -9 (35:44), пасля чаго трэнер «Партызана» ўзяў тайм-аўт.

Але і канцоўка, як і ўся чвэрць, засталася за сербскай камандай: «Жальгірыс» не здолеў штосьці супрацьставіць Пантэру і Нанэлі, якія бамбардыравалі кошык. На вялікі перапынак каманды сышлі з лікам 42:53 на карысць «Партызана». Пантэр і Дазье усе 20 хвілін не сыходзілі з пляцоўкі, набраўшы за гэты час 28 ачкоў на дваіх.

Трэцяя чвэрць пачалася з трох штрафных кідкоў Пантэра (усе рэалізаваныя) і скандаванні літоўцаў пра рэферы. Сербы давялі лік да 45:61, але трохачковыя Дзімшы, Эванса і Шмітса зноў вярнулі інтрыгу ў гульню (55:62). У гэты момант у гульню ўмяшаўся Пантэр – ягоны двухачковы вярнуў камфортныя +9 сербам.

Але наступны момант вярнуў заўзятарам сотні дэцыбэлаў: Эванс паляцеў у адрыў, але не стаў закідваць, а проста падкінуў мяч над кошыкам – каб падскочыўшы Шмітс увагнаў яго ў сетку. Лік стаў 58:64 – упершыню з 2 хвіліны «Жальгірыса» падкраўся да 6 ачкоў ад сербаў. Але ў наступныя тры хвіліны сербы вярнулі матч пад свой кантроль і давялі лік да 58:72. Далей «Партызан» ўжо не выпускаў ініцыятыву са сваіх рук - матч скончыўся перамогай сербаў 85:93.

Апошні раз дома «Жальгірыс» выйграваў амаль месяц таму, калі 17 лістапада абыграў мюнхенскую «Баварыю» з лікам 74:73. Асабліва перашкаджала гаспадарам слабая абарона ў першай палове, што дазволіла сапернікам набраць ажно 58 ачкоў. Гэта антырэкорд гэтага сезона.