«Іпсанас Красава» Аўсяннікава падпісаў дамову з «Ювентусам». Італьянцы будуць мець прыярытэтнае права на набыццё гульцоў у клуба

Кіпрскі «Іпсанас Красава» стаў партнёрам італьянскага «Ювентуса».

Заснавальнік клуба Яўген Савін наведаў футбольную канферэнцыю SFS25 і сустрэўся з Клаўдыё К’еліні (брат экс-абаронцы зборнай Італіі Джорджа К’еліні), які ўзначальвае ў «Ювентус» аддзел Next Gen.

«Ювентус Next Gen» – гэта другая каманда «Старой сіньёры». У адрозненне ад моладзевай каманды «Ювентуса», у Next Gen узрост старэйшых футбалістаў (да 23 гадоў), а гуляе каманда ў дарослых турнірах – з моманту стварэння ў 2018-м годзе ў Серыі С.

Менавіта з «Ювентус Next Gen» і ўзгоднена партнёрства. Дзякуючы яму «Красава» атрымае магчымасць бясплатна падпісваць футбалістаў з другой каманды «Юве». Гульцы будуць пераходзіць свабоднымі агентамі, а за італьянцамі будзе замацоўвацца працэнт з іх патэнцыйнага перапродажу. «Ювентус» таксама дапаможа «Красаве» ў развіцці ўласнай акадэміі.

Акрамя таго, італьянскі клуб будзе сачыць за прагрэсам маладых гульцоў з постсавецкай прасторы ў «Красаве» і атрымае прыярытэтнае права на іх набыццё. Турынцам вельмі цікавы гэты рынак.

Нагадаем, што за «Іпсанас Красава» на правах арэнды выступае 18-гадовы беларускі нападаючы Дзяніс Аўсяннікаў.