Кірэнкін пасля 1:1 з «Арсеналам»: «Баранавічы» найгралі больш, чым на адзін гол»
Галоўны трэнер «Баранавічаў» Раман Кірэнкін выказаўся пра нічыю з «Арсеналам» (1:1) у 7-м туры вышэйшай лігі.
– Па гульні скажу так: шмат з таго, што мы планавалі, атрымлівалася. Хлопцы з першай і да апошняй хвіліны шукалі шчасця ля чужых варот, стваралі моманты – у гэтым плане яны малайцы. Згулялі 1:1, але радуе тое, што мы не апусцілі рукі пасля прапушчанага гола, імкнуліся адыграцца і хацелі перамагчы.
У плане рэсурсаў мы абмежаваныя. Перад гэтай гульнёй у нас выпала шэсць гульцоў па тых ці іншых прычынах – гэта вельмі шмат. У заяўцы на замену нават не было поўнага камплекта. Але тыя, хто быў у страі, змагаліся да канца.
– Ці няма горычы ад нявыкарыстаных момантаў у першым тайме?
– Вядома, ёсць пэўныя шкадаванні. Але пра тое, што ты ўжо не можаш змяніць, доўга казаць не варта. Трэба проста больш стрымана і адказна падыходзіць да рэалізацыі ў будучых гульнях. Сёння ў нас было дастаткова менавіта відавочных момантаў, а не «паўмаментаў». Найгралі дакладна больш, чым на адзін гол.
– Спадзяемся, у наступным матчы фартуна будзе на вашым баку.
– Будзем рабіць для гэтага ўсё магчымае. У кожнай гульні стараемся, але сёння зноў прапусцілі неабавязковы гол. З аднаго боку – наша памылка, з іншай – выканальніцкае майстэрства суперніка. Калі чалавек трапляе ў далёкую «дзявятку», значыць, пэўны клас у яго ёсць, – сказаў Кірэнкін.
