Ігар Шумілаў: «Я працую ў гольф-клубе – на сёння судзейскіх грошай на камфортнае жыццё не хопіць»

Беларускі арбітр Ігар Шумілаў расказаў пра сваю асноўную работу.

– Ці можна пражыць на зарплату арбітра? Ці ўсё ж шукаеш другую працу?

– У Беларусі, я ўпэўнены, усе хлопцы паралельна працуюць. Бо на сённяшні дзень сітуацыя такая, што судзейскіх грошай на камфортнае жыццё не хопіць. Магчыма, іх і хопіць, але ты не можаш ведаць, як ты адпрацуеш наступны тур. Можа быць няшчасны выпадак – ты атрымаеш двойку, не атрымаеш прызначэння, і, такім чынам, не атрымаеш грошай.

Каб адчуваць сябе больш камфортна, усе хлопцы маюць нейкую працу. Я працую ў гольф-клубе «Мінск». Адзінае поле ў Беларусі – чэмпіёнскае поле. Вельмі добрыя палі, умовы. Да нас прыязджае шмат гасцей з розных краін – і вельмі ўражаны тым, якое ў нас класнае поле. У нас ёсць хлопцы, якія гулялі на 200 палях ва ўсім свеце, дзе толькі можна. І яны ставяць наша поле ў дзясятку [найлепшых].

– Ты інструктар?

– Не зусім. Я працую ў спартыўным аддзеле, дапамагаю ў арганізацыі турніраў. І, як бы гэта смешна ні гучала, я суддзя на турнірах па гольфе.

– У чым там заключаецца судзейства?

– На «кары» катаешся, глядзіш за працэсамі, якія праходзяць у дадзены дзень і за тым, каб хлопцы гулялі ў тэмпе. Здараюцца сітуацыі спрэчныя – не так часта, як у футболе. Потым – падлік вынікаў, там вельмі складаная сістэма гандыкапаў, розныя фарматы. Нельга памыліцца, – падзяліўся Шумілаў.