Каманда з вёскі на 282 жыхары (!) выйшла ў вышэйшую лігу Паўночнай Ірландыі. Кошт склада – 25 тысяч еўра

Навіна, якую вы маглі прапусціць. Каманда «Лафгол» на выходных абгуляла «Дандэлу» з лікам 3:1, выйграла чэмпіёншып і гарантавала выхад у прэм’ер-лігу Паўночнай Ірландыі.

Самае цікавае, што паўпрафесійны клуб прадстаўляе вёску Лафгол у графстве Арма з насельніцтвам у 282 жыхары. І гэта не жарт. Цяпер Лафгол афіцыйна самы маленькі населены пункт у Еўропе, дзе ёсць каманда вышэйшай лігі.

Вы толькі паглядзіце, як гульцы і заўзятары адзначалі свой поспех. Яны не толькі падарылі жыхарам Лафгола прэм'ер-лігу як мінімум на ўвесь наступны сезон, але і зрабілі сваю вёску вядомай далёка за межамі вострава.

Каманда складае 10% ад насельніцтва Лафгола

У Лафголе ходзіць класны жарт: каманда складае 10% ад насельніцтва, калі па аўторках і чацвяргах праходзяць трэніроўкі «сялян». Менавіта такая мянушка ў гульцоў «Лафгола».

Былы футбаліст, а зараз галоўны трэнер каманды і адзін са стваральнікаў поспеху Дын Сміт кажа, што гэта найвялікшае дасягненне ў гісторыі «Лафгола». «Сяляне» сталі чэмпіёнамі за два туры да канца чэмпіянату. Сміт трэніруе каманду з 2016 года і зараз не шкадуе кампліментаў для сваіх хлопцаў.

«Гульцы сёлета былі фенаменальнымі. Камандны дух і згуртаванасць дапамаглі нам выйграць лігу. Мы вельмі рады, што, нарэшце, нам усё ўдалося. Вёска вельмі ганарыцца нашым дасягненнем.

Вы паглядзіце на іншыя клубы чэмпіянату і фінансавыя рэсурсы, якія ў іх ёсць. У нас гэтага няма, але тое, што ў нас ёсць – гэта цудоўнае праўленне і валанцёры ў клубе, якія вельмі старанна працуюць. А таксама некаторыя вельмі добрыя гульцы.

Зараз у нас будзе крыху дадатковага часу, каб падрыхтавацца да наступнага сезону ў прэм'ер-лізе. Мы ведаем, што будзе цяжка, але верым у тое, што больш чым здольныя ўтрымацца ў вышцы», – сказаў трэнер «Лафгола».

У іх сапраўды фантастычныя паказчыкі – найлепшая абарона ў лізе (21 прапушчаны) і выдатная рэзультатыўнасць (73 забітых). Найбліжэйшы канкурэнт адстаў на 11 ачкоў.

Па дадзеных партала Transfermarkt, кошт склада ацэньваецца ў 25 тысяч еўра. Фактычна ўсе гульцы – грамадзяне Паўночнай Ірландыі. З легіянераў толькі дасведчаны брамнік-немец і двое хлопцаў з падвойным пашпартам (ірландзец і бразілец).

«Лафгол» гуляе на стадыёне на 3 тысячы гледачоў

Маленькая, але ганарлівая каманда прайшла доўгі і свядомы шлях у вышэйшы дывізіён Паўночнай Ірландыі. «Лафгол» атрымаў павышэнне ў эліту яшчэ ў 2010 годзе, але адмовіўся ад свайго шанцу. У клубе лічылі, што яны яшчэ не гатовы да гэтага, і ім трэба палепшыць сваю інфраструктуру. Цяпер у «сялян» ёсць усё, каб прыняць новы выклік.

“Я працую ў клубе ўжо шэсць з паловай гадоў. Кожны сезон мы робім маленькія крокі наперад, якія прывялі нас да мары. Цяпер у нас ёсць выдатныя ўмовы – уласная трэнажорная зала, крыа-спа на тэрыторыі, поле 4G (штучны газон чацвёртага пакалення) і поле з травой.

Мы ўжо зрабілі шмат паляпшэнняў, але не хочам стаяць на месцы, а працягнем развівацца далей».

Хатні стадыён «Лейкв'ю Парк» знаходзіцца ў Лафголе і разлічаны на 3 тысячы гледачоў. У 2018 годзе ў вёсцы пабудавалі трэніровачнае поле Wiliis CRL Arena дзякуючы грантам ад суседніх гарадоў. Трэніравацца там могуць не толькі каманды з сістэмы Лафгола, але і ўсе ахвочыя.

Клуб быў заснаваны ў 1967 годзе і за сваё існаванне выйграў шмат лакальных кубкаў і трафеяў. Зараз у «Лафгола» новая старонка ў гісторыі.

У вёсцы на 116 гаспадарак ёсць царква, музей гісторыі і гольф-клуб

Цяпер крыху пра сам Лафгол – паводле перапісу насельніцтва 2011 года ў вёсцы пражывала 282 чалавекі (116 хатніх гаспадарак). Сваю назву населены пункт атрымаў у гонар невялікага возера паблізу. Вёска акружана фруктовымі садамі.

Вось як апісвае Лафгол адзін з ірландскіх сайтаў, які піша пра гісторыю, архітэктуру і мастацтва.

«Гэта вельмі прыгожая і добра захаваная вёска, закладзеная ў 18 стагоддзі сям'ёй землеўладальнікаў Копаў. Яна складаецца з адной доўгай вуліцы, уздоўж якой па абодва бакі размешчаны дамы. Акрамя аднаго месца з брамай, якое вядзе да былога маёнтка Копаў».

У вёсцы ёсць царква святога Лукі, музей гісторыі, пякарня, крама, парк, гольф-клуб (!). Карта не паказвае, але паб там таксама дакладна павінен быць. Да Белфаста – 60-70 км у залежнасці ад трасы, па якой ехаць.

У Паўночнай Ірландыі любяць футбол. Мабыць, самым вядомым гульцом у гісторыі быў легенда «Манчэстэр Юнайтэд» Джордж Бэст. Яго імем названы адзін з аэрапортаў Белфаста. А галоўная асацыяцыя з футболам у Паўночнай Ірландыі апошніх гадоў – гэта запальны хіт фанатаў зборнай пра свайго нападаючага Уіла Грыга «Will Grigg's on fire».

У мясцовай прэм'ер-лізе гуляе 12 каманд. Спачатку праходзіць рэгулярны чэмпіянат, а затым падзел на дзве групы па 6 каманд і стадыя плэй-оф. Самы тытулаваны клуб – «Лінфілд» з Белфаста (56 тытулаў чэмпіёна). Чэмпіёнам гэтага сезона стаў «Ларн» з аднайменнага горада з насельніцтвам у 18 тысяч чалавек. Гэта першы тытул для каманды за ўсю яе 134-гадовую гісторыю.

***

У 2015 годзе сенсацыяй стала каманда «Брук-Бэт Тэрмаліка» з вёскі Няцеча, якая прабілася ў польскую Экстраклясу. Пасля дэбютнага павышэння «слонікі» затрымаліся ў эліце на тры сезоны. Зараз каманда гуляе ў першай лізе Польшчы і займае трэцяе месца, саступаючы ЛКС і кракаўскай Вісле.

Па дадзеных апытання 2011 года ў Няцечы пражывала 723 чалавекі. Іх клубны стадыён разлічаны на 4 666 месца.

Фота: The Irish Aesthete, «Лафгол»