Ямаль або Месі – хто больш вынікова правёў першыя 150 матчаў за «Барселону»

Матч у адказ з «Атлетыка» стаў сумным для фанатаў «Барселоны», але знакавым для Ламіна Ямаля. Ён не толькі адзначыўся голам, але і правёў 150-ы матч за «Барсу». З першых гульняў за «блаўгранас» яго параўноўвалі з Ліянелем Месі, але калі спачатку гэта было хутчэй авансам, то цяпер няма ніякай нацягнутасці.

Ямаль дасягнуў адзнакі ў 150 матчаў значна раней за аргенцінца. Здаецца, мы ўступілі ў эпоху завочнага супрацьстаяння.

Ламін – самы малады гулец «Барсы» са 150 матчамі

Ламін Ямаль дэбютаваў за «Барселону» ў сезоне 2022/2023 ва ўзросце 15 гадоў і 9 месяцаў. Хаві Эрнандэс быў у захапленні ад дэбютнай гульні і ўжо тады прадказаў будучыню: «Ламін Ямаль справіўся вельмі добра. Я сказаў яму паспрабаваць сёе-тое, і ён гэта зрабіў. У 15 гадоў, уявіце сабе. Ён ледзь не забіў. Ён асаблівы гулец, у яго ёсць упэўненасць у сабе, ён можа быць важным – гэта відаць на трэнінгах».

Тым жа летам «блаўгранас» прапісалі клаўсулу ў 1 мільярд еўра. Ужо ў наступным сезоне тынэйджар стаў асноўным у камандзе Хаві. У тым жа сезоне Ламін правёў 50 матчаў ва ўсіх турнірах – забіў 7 мячоў і зрабіў 9 асістаў. «Я абедаў з Хаві, і ён сказаў мне, што ніколі не бачыў гульца такой якасці. Не люблю параўноўваць гульцоў з Месі, але, думаю, для гэтага гульца мяжа – толькі неба», – сказаў Хуан Мата.

У 2024-м юнак заняў 5-е месца ў галасаванні за «Залаты мяч».

Пасля Еўра-2024 Ламін ужо стаў суперзоркай, а ў сезоне 2024/2025 згуляў 55 матчаў, аформіў 18 галоў і аддаў 25 асістаў. У 2025-м іспанец саступіў толькі Дэмбеле ў барацьбе за «Залаты мяч». Гэтым разам ён зноў палепшыў паказчыкі – упершыню забіў 20+ мячоў за сезон, на сёння яго статыстыка – 23+18.

Да таго падобны імклівы ўзлёт быў хіба што ў Баяна Кркіча, які дэбютаваў за «Барсу» ў 17 гадоў і 19 дзён, але ў яго і блізка не было такой выніковасці і стабільнасці. Хоць у першым сезоне Баян аформіў 10 галоў – тады здавалася, што ён стане талентам не меншым, чым Месі.

На трэцім месцы – Гаві, які дасягнуў адзнакі ў 150 матчаў у 20 гадоў і 279 дзён. І толькі чацвёртым у гэтым спісе ідзе Месі, які свае 150 матчаў за «блаўгранас» згуляў у 21 год і 284 дні.

Цікава, што ў першай дзясятцы адразу чатыры гульцы з цяперашняга складу Фліка. Гэта яшчэ раз паказвае, якая маладая «Барселона» ў апошнія гады.

У Месі было значна больш галоў, але Ламін лепей асістуе партнёрам

Што да прамога параўнання з Месі, варта адзначыць, што Леа дэбютаваў за «Барселону» ва ўзросце 17 гадоў у кастрычніку 2004 года. І калі Ямаль амаль адразу замацаваўся ў аснове, то Ліянель патрапіў у значна больш канкурэнтнае асяроддзе. Гэта была каманда Франка Райкарда, якая рыхтавалася выгуляць Лігу чэмпіёнаў. «Трэнер некалькі разоў не ўключаў мяне ў склад, і я праз гэта вельмі злаваўся. Цяпер, калі я сталейшы, мне ўсё стала зразумела, і я яму вельмі ўдзячны», – згадваў Месі працу з Франкам.

Затое ў Месі быў найлепшы настаўнік на полі – Раналдзінья: «Ён з нараджэння валодаў талентам і развіваў яго з ранніх гадоў. Калі ён апынуўся ў «Барселоне», ён ужо быў гатовым гульцом, прафесіяналам. Мне прыемна назіраць за яго поспехамі, і я рады, што быў побач, калі ён пачынаў кар’еру. Выдатна, што свой першы мяч у прафесійнай кар’еры ён забіў менавіта з маёй перадачы».

Гэты гол адбыўся ў траўні 2005 года. Свой першы сезон аргенцінец завяршыў з 7 матчамі ў Ла Лізе і па адным у Кубку і Лізе чэмпіёнаў.

У наступным сезоне Месі скарылася тое, пра што Ямаль пакуль толькі марыць – Ліга чэмпіёнаў. Хаця Месі не ўдзельнічаў у вырашальных матчах праз траўму, за сезон ён правёў 25 матчаў, забіў 8 мячоў і аддаў 5 асістаў.

Прарыўным стаў наступны год, калі Леа праявіў сябе як бамбардзір – 14 галоў у Ла Лізе, уключна з хет-трыкам на «Бернабеу». У апошніх чатырох турах ён забіў 6 мячоў. У сезоне 2007/08 было 16+16. А ў год свайго 150-га матча за «Барселону» Месі ўжо ішоў да свайго першага «Залатога мяча».

150-ы матч адбыўся 4 красавіка 2009 года, калі «Барселона» на выездзе абгуляла «Вальядалід», а сам Леа атрымаў 30 хвілін, выйшаўшы на замену замест Педра.

Відаць, што Леа значна больш забіваў, чым асіставаў, асабліва ў сезоне 2008/2009. Але калі глядзець на сярэднія выніковыя дзеянні, то перавага аргенцінца не такая вялікая.

Паколькі абодва згулялі свае 150-я матчы ў красавіку, тытулы па выніках сезона не ўлічваюцца. На той момант у абодвух было па 5 трафеяў, але «Барселона» Пепа зрабіла трэбл у сезоне 2008/2009, тады як Ламін сёлета можа выйграць толькі Ла Лігу.

На карысць Ламіна тое, што ён рабіў выніковыя дзеянні ў значна больш раннім узросце, а Месі дасягнуў гэтай адзнакі на тры гады пазней. У той жа час, калі Леа прыйшоў у «Барселону», ён патрапіў у значна больш канкурэнтнае асяроддзе, а «Барса» страціла галоўнага канкурэнта Ямаля – Усмана Дэмбеле.

Пакуль гэта зусім не азначае, што Ямаль зможа паўтарыць шлях Месі, але ўжо сёння можна ўпэўнена сказаць, што з часоў Месі «Ла Масія» не давала настолькі таленавітага і стабільнага выхаванца.