У «Ліверпулі» будзе зусім новы цэнтр поля: Хендэрсан і Фабінья едуць зарабляць, да Мак Алістэра і Сабаслаі патрэбны новы апорнік
З 11 (!) цэнтрхаваў мінулага сезону могуць застацца толькі трое.
За апошнія пяць-шэсць гадоў «Ліверпуль» ізноў вярнуўся на вяршыню еўрапейскага футбола і парадкам пашумеў – усё ж выйграў тую няшчасную англійскую прэм'ер-лігу, зноў забраў кубак Лігі чэмпіёнаў (яшчэ некалькі разоў гуляў у фінале) і перамагаў у нацыянальных кубках.
Галоўная прычына поспеху – безумоўна, Юрген Клоп, але ні ў якім разе нельга недаацэньваць унёсак футбалістаў. У большасці з гэтых сезонаў у нямецкага спецыяліста быў стабільны стартавы склад, які дэманстраваў стабільны футбол.
Сёння «Ліверпуль» перажывае сур'ёзную змену пакаленняў, перш за ўсё – у цэнтры поля.
Мілнер, Кейта і Окслейд-Чэмберлен пайшлі свабоднымі агентамі, Хендэрсан і Фабінья бягуць у Саудаўскую Аравію
У канцы трансфернага акна летам 2022-го у «Ліверпуля» ужо былі праблемы ў цэнтры поля – тады Мілнеру і Хендэрсану на дваіх было 68 гадоў, каманду ўсё ніяк не адпускалі траўмы, а на трансферным рынку варыянтаў было няшмат.
Гэтым летам сітуацыя выглядае яшчэ больш складанай:
Джэймс Мілнер, Набі Кейта і Алекс Окслейд-Чэмберлен пакінулі каманду свабоднымі агентамі. Мілнер ужо далучыўся да «Брайтана», Кейта – да «Вердэра» (ужо паспеў ізноў траўмавацца і прапусціць пачатак новага сезону), а Окслейд-Чэмберлен ўсё яшчэ застаецца без клуба, хоць яго паслугамі, па звестках Sky Sports, цікавяцца «Астан Віла» , «Брэнтфард», турэцкія і саудаўскія клубы.
Фабіу Карвалью (у спіс гульцоў цэнтра поля ўваходзяць як апорнікі, так і атакуючыя паўабаронцы) адправіўся ў арэнду ў «Лейпцыг» без права выкупу.
Актыўныя навіны ходзяць пра сыход Джордана Хендэрсана і Фабіньі.
У панядзелак Джордан развітаўся з аднаклубнікамі – ужо ў хуткім часе ён далучыцца да свайго былога партнёра па камандзе і яшчэ адной легенды «Ліверпуля» Стывена Джэрарда, які нядаўна ачоліў саудаўскі клуб.
Таксама ён запісаў кранальнае развітанне і для фанатаў. Засталася толькі фармальная аб'ява клубаў.
Хендэрсана, праўда, крытыкуе частка заўзятараў «чырвоных», якія спадзяваліся, што той не пакіне каманду ў цяжкі момант (гаворка пра кадравы патэнцыял у цэнтры поля). Іншая частка ўпэўненая, што прыкладна 10 млн фунтаў за 33-гадовага капітана ліверпульцаў – выгаднае фінансавае пагадненне.
Фабінья таксама аказаўся па-за складам «Ліверпуля». Усё гэта вынік прапановы «Аль-Іціхада» у памеры 40 млн фунтаў за бразільца. І англічане, і саудаўцы спадзяюцца закрыць здзелку ўжо ў найбліжэйшыя дні.
Многіх фанатаў крыху збянтэжылі чуткі, што трансфер можа сарвацца праз хатняга ўлюбёнца футбаліста. Справа ў тым, што парода французскі бульдог (а ў Фабіньі менавіта такі пёсік) забароненая ў Саудаўскай Аравіі – там іх лічаць агрэсіўнымі і небяспечнымі для грамадства. Зрэшты, чакаецца, што праблему вырашаць, і футбаліст паедзе ў трэндавы чэмпіянат.
Траўматычны Ціяга стаў тэмай для абмеркавання. Брытанскія СМІ пісалі, што ў іспанец не супраць вярнуцца на Радзіму і мае прапановы ад «Севільі», «Рэала Сасьедада» і «Сельты». Акрамя таго ім даўно цікавіцца «Фенербахчэ», а саудаўскія клубы (хто б сумняваўся!) сочаць за сітуацыяй.
Пры тым, што Харві Эліат, Керціс Джонс і Стэфан Байчэціч застануцца ў камандзе на наступны сезон, з 11 цэнтрхаваў, якія выступалі за каманду ў мінулай кампаніі, могуць застацца толькі трое (11-ы – Артур Мэла, які «гуляў» за «Ліверпуль» на правах арэнды).
Але Ліверпуль не толькі адпускае, але і падпісвае футбалістаў у цэнтр поля. За Мак Алістэра і Сабаслаі заплацілі 112 млн еўра
Адзін з лідараў сенсацыйнага «Брайтана» у мінулым сезоне - Алексіс Мак Алістэр - мусіў пайсці на павышэнне летам, і, атрымаўшы прапанову ад «Ліверпуля», не змог адмовіць.
У доўгім спісе прыхільнікаў аргенцінца, які вызначыўся галявой перадачай у фінале чэмпіянату свету, знайшлося месца і для Клопа, які ўжо даўно фанацее ад стылю гульні Алексіса і настойваў на ягоным трансферы. Пасля відэа, на якім Юрген эмацыйна расхвальвае Мак Алістэра, у сетцы ўжо жартуюць, што новая дзясятка мерсісайдцаў – новы ўлюбёнец трэнера.
На шматлікіх футбольных парталах аргентынца ставяць на вастрыню паўбароны, аднак і ў «Брайтане», і ў нацыянальнай зборнай ён у апошні час усё больш гуляў з глыбіні – васьмёрку ці нават шасцёрку.
Іншы зорны навічок «Ліверпуля» – Дамінік Сабаслаі, за якога англічане заплацілі 70 млн еўра. Вугорац і па пазіцыі, і па стылі гульні нечым падобны да Мак Алістэра і дапоўніць цэнтр поля каманды сваімі перадачамі і выдатнымі далёкімі ўдарамі.
У Сабаслаі ёсць татуіроўка з цытатай Джэрарда, а сам вугорац атрымаў легендарны 8-ы нумар Стыві – яшчэ адна прыгожая гісторыя прама з яго прэзентацыі ў новым клубе.
Тактычныя планы Клопа на новы сезон пакуль невядомыя, але, па ўсёй верагоднасці, Юрген працягне гуляць па схеме 3-2-2-3 з новай рэвалюцыйнай роляй для Трэнта Александэра-Арнальда. У гэтым выпадку і Мак Алістэр, і Сабаслаі могуць размяшчацца над Трэнтам і новым апорнікам («Ліверпуль» яшчэ абавязкова выйдзе на рынак, калі Фабінья пакіне каманду) – менавіта там яны могуць праявіць свае найлепшыя якасці. Таксама ў першых таварыскіх матчах гэтага летам было відаць, як Александэр-Арнальд адразу выходзіў на пазіцыю ў апорнай зоне – а гэта значыць, што ў далейшым давядзецца шукаць ужо правых абаронцаў.
На гэтым перабудова «Ліверпуля» не завяршаецца. Камандзе вельмі патрэбны новы апорнік
Нягледзячы на больш за 100 выдаткаваных мільёнаў на новых футбалістаў, мерсісайдцы працягваюць актыўна працаваць над фармаваннем складу на новы сезон.
У кантэксце сыходаў Хендэрсана і Фабіньі «Ліверпулю» патрэбны новы апорнік, і клуб ужо склаў шорт-ліст з 7 футбалістаў. У яго ўвайшлі Кефрэн Цюрам, Жаау Пальінья, Рамэа Лавія, Шэйк Дукурэ, Раян Гравенберх, Кэлвін Філіпс і Саф'ян Амрабат.
Самы рэальны трансфер на сёння – падпісанне Рамэа Лавія. 19-гадовы бельгіец імкнецца пакінуць «Саўтгэмптан» пасля вылету каманды ў чэмпіёншып, але святыя хочуць зарабіць на яго продажы 50 млн фунтаў, на якія не згаджаецца «Ліверпуль».
Мерсісайдцы на пастаяннай сувязі з агентам футбаліста, аднак, калі пераход не ўдасца рэалізаваць, клуб пераключыць увагу на іншых кандыдатаў.
Фота: Harry Langer, Michael Steele/REUTERS, Liverpool FC
Іншыя пасты карыстальніка
