Шыкоўны выбар Дэшама і капітан Мбапэ: гайд па зборнай Францыі на Еўра-2024

Tribuna.com публікуе серыю матэрыялаў Guardian Experts Network Euro 2024. Журналісты з 24 краін Еўропы напісалі галоўнае пра свае нацыянальныя зборныя, каб бліжэй нас з імі пазнаёміць.

Пра зборную Францыі напісаў Люк Энтвістл для Get French Football News

Перспектывы

На сёння Францыя лічыцца адным з фаварытаў большасці буйных турніраў дзякуючы сваім апошнім поспехам. Нягледзячы на ​​тое, што гэта будзе першы турнір «сініх» за доўгі час без Рафаэля Варана і Уго Льярыса, якія разам фармавалі аснову поспеху Дзідзье Дэшама, але і ў гэтай камандзе шмат пераемнасці: паўабарона і атака, верагодна, будуць капіпастам з каманды чэмпіянату свету-2022, дзе ўдалося дайсці да фіналу. З узрушаючым вяртаннем Н'Гола Кантэ, які цяпер выступае ў Саудаўскай Аравіі. То бок у гэтай Францыі ёсць правільнае спалучэнне маладосці і досведу.

«Сінія» спакойна прайшлі садборачную групу, выйграўшы ўсе матчы акрамя апошняга супраць Грэцыі, падчас якога быў выстаўлены эксперыментальны склад. З трыма прапушчанымі галамі за ўсю кампанію, два з якіх былі атрыманыя ў вышэйзгаданай гульні, усім зразумела, што Францыю будзе цяжка прабіць, нават калі ўзнікаюць пытанні адносна таго, хто будзе складаць лінію абароны ў Дэшама.

Пасля завяршэння Варанам кар'еры ў зборнай Дэшам не змог вызначыцца з новым асноўным цэнтральным абаронцам. Вялікі выбар наўрад ці спрашчае сітуацыю, тады як найбольшы пытальнік вісіць над пазіцыяй правага абаронцы. Дэшам час ад часу публічна наракаў на адсутнасць выбару на гэтай пазіцыі і заклікаў Федэрацыю футбола Францыі палепшыць працу па развіцці гульцоў гэтага прафайла. У заяўку трапіў Жанатан Клос, якога не выклікалі на чэмпіянат свету-2022, але перавагу, хутчэй за ўсё, аддадуць больш абарончаму варыянту з Жулем Кундэ.

Паўза на міжнародныя матчы ў сакавіку ўзняла некалькі пытанняў наконт бягучага ўзроўню «сініх», але як толькі яны ўваходзяць у турнірны рэжым, яны дамінуюць. Усе прыкметы паказваюць, што ў іх не будзе праблемаў з тым, каб зрабіць гэта зноў, і выхад у паўфінал будзе разглядацца як неабходны мінімум для гэтай каманды.

Трэнер

Нягледзячы на ​​размовы пра сыход з каманды пасля чэмпіянату свету-2022, Дзiдзье Дэшам застаўся на пасадзе, падоўжыўшы кантракт да 2026 года. Ад некаторых гучалі заклікі змяніць падыход, але эфектная, хаця часам і неэфектыўная філасофія Дэшама лічылася шляхам да ўстойлівага поспеху. Улічваючы, што яго стыль скапіяваў трэнер зборнай Англіі Гарэт Саўтгейт, такі падыход мае перавагі. Навошта адмаўляцца ад шаблону, зададзенага самой Францыяй?

Ікона

Калі Кіліян Мбапэ атрымаў дазвол прапусціць апошнюю гульню «ПСЖ» у сезоне Лігі 1 супраць «Меца», ён скарыстаўся магчымасцю наведаць Канскі кінафестываль. Там ён быў толькі адной са шматлікіх зорак, але ў сваёй сферы ніхто не ззяў так ярка, як Кіліян. Твар Лігі 1, найлепшы бамбардзір у гісторыі «ПСЖ» і капітан зборнай Францыі падыходзіць да Еўра пасля сезона, у якім ён выйграў «Залатую буцу» французскай лігі шосты год запар. Наперадзе – доўгачаканы летні пераход, але спачатку ён паспрабуе прывесці «сініх» да поспеху на сваім першым турніры ў якасці капітана.

За ім трэба сачыць

Трансфер Брэдлі Баркаля за 45 мільёнаў еўра з'яўляўся статусным набыццём для «ПСЖ». Пераход маладога вінгера быў выкліканы шматабяцаючай другой паловай сезона-2022/23 у «Ліёне». Адзін французскі эксперт назваў яго «ягнём» пасля шэрагу нясмелых выступаў, асабліва ў Лізе чэмпіёнаў, пасля чаго Баркаля памужнеў. Аднак яго адсутнасць у складзе каманды Дэшама ў сакавіку не перашкодзіла здзейсніцца яго мары пра Еўра, нягледзячы на ​​тое, што ў трэнера «сініх» няма звычкі выклікаць на вялікія турніры гульцоў, якія не ўцягнутыя ў склад увесь час. Тое, што ён адхіліўся ад гэтай палітыкі і абраў Баркаля, шмат што кажа пра здольнасці вінгера «ПСЖ».

Індывідуаліст

Справа не ў тым, што Бенжамен Павар не аказваў уплыву на выступ у Катары 18 месяцаў таму, проста гэты ўплыў не быў станоўчы. Дэшам сказаў, што абаронца «Інтэра» «быў не ў патрэбным настроі» для гульні ў адным з матчаў «сініх», і па словах галоўнага трэнера зборнай Францыі, «ён (Павар – Tribuna.com) быў незадаволены сітуацыяй, у якой апынуўся». Прычына яго дрэннага настрою не выдавалася, але ён будзе імкнуцца да больш станоўчага вопыту ўжо ў Германіі.

Касцяк

Майк Меньян атрымаў у спадчыну футболку з нумарам 1 ад гульца зборнай Францыі, які згуляў больш за ўсё матчаў у яе гісторыі – Уго Льярыса. Траўма Люкі Эрнандэс з'яўляецца моцным ударам для «сініх», але ў яго адсутнасць Даё Упамекано з'яўляецца найбольш статусным цэнтральным абаронцам у калектыве.

Антуан Грызман, які гуляе цяпер глыбей у ролі паўабаронцы, ніколі не быў больш важным для зборная і больш уплывовым. Яго адсутнасць на матчах у сакавіку паклала канец сусветнаму рэкорду з 84 матчаў нацыянальнай каманды запар, на якія яго выклікалі. У атацы ніводзін гулец не мае такога ўплыву, як Кіліян Мбапэ, уладальнік «Залатой буцы» чэмпіянату свету ў Катары, ужо набліжаючыся да рэкорду па колькасці галоў у гісторыі зборнай Францыі, які пакуль належыць Аліўе Жыру.

Верагодны стартавы склад

4-3-3 – Майк Меньян – Жуль Кундэ, Ібраіма Канатэ, Даё Упамекано, Тэо Эрнандэс – Антуан Грызман, Арэльен Чуамені, Адрыен Раб'ё – Усман Дэмбеле, Аліўе Жыру, Кіліян Мбапэ.

Фанат-зорка

У кіраўнікоў дзяржаў ёсць патрыятычны абавязак падтрымліваць зборную, але мала хто робіць гэта з такім задавальненнем, як заўзятар «Марселя» Эмануэль Макрон. Здавалася, што прэзідэнт сачыў за выступамі Мбапэ ў Катары, і ў апошні час аказваў максімальны ціск на будучы клуб (гаворка пра «Рэал» – Tribuna.com), каб ён таксама адпусціў форварда на Алімпійскія гульні. Чакайце гэтым летам Макрона, які дэманструе ўвесь спектр эмоцый на трыбунах у Германіі.

Пачастунак

Каўбаскі з'яўляюцца асноўным прадуктам харчавання заўзятараў, якія наведваюць матчы ў Францыі. Сярод іх ёсць рэгіянальныя варыяцыі, самай вядомай з якіх з'яўляецца Galette Saucisse, брэтонская фірмовая страва, якая складаецца са смажанай каўбаскі, загорнутай у блін, якая стала сінонімам стадыёна «Рэна».

Нядаўна заўзятары «Рэна» паспрабавалі распаўсюдзіць мясцовы дэлікатэс, прапанаваўшы яго прыезджым заўзятарам «Мілана» падчас нядаўняй гульні ў Лізе Еўропы. Час пакажа, ці ўспрымуць гэты пачастунак так жа цепла, як іншыя знакамітыя французскія стравы.

Фота: Федэрацыя футбола Францыі