Хто выйшаў на Еўра-2024, хто разыграе пуцёўкі праз плэй-оф, калі лёсаванне – галоўнае пра кваліфікацыю
Усё, што трэба ведаць.
Групавы этап кваліфікацыі Еўра-2024 скончыўся – вызначыліся 21 з 24 удзельнікаў галоўнага футбольнага турніру зборных у Еўропе.
Некаторыя факты пра адбор
• Толькі адна зборная скончыла кваліфікацыю са стоадсоткавым паказнікам – Партугалія. Каманда Раберта Марцінеса выйграла 10 матчаў з 10 з агульным лікам 36:2.
Блізкай да гэтага была і Францыя – аднак у апошнім туры згуляла ўнічыю 2:2 з Грэцыяй.
• Рамелу Лукаку ўстанавіў рэкорд рэзультатыўнасці ў матчах адбору на Еўра. Дзякуючы покеру ў матчы з Азербайджанам у яго 14 галоў за турнір – і гэта пры тым, што ў ягонай групе было 8 матчаў, а не 10!
Лукаку абышоў ірландца Дэвіда Хілі і паляка Роберта Левандоўскага, якія ў адборы да Еўра-2008 і Еўра-2016 забілі па 13 мячоў.
• Італія і Сербія без уліку розніцы паміж групамі з 8 і 10 матчамі набралі найменш пунктаў сярод каманд, якія выйшлі на Еўра-2024 напрамую - па 14.
Калі гэтую розніцу ўлічваць (г.зн. адсекчы ў груп з 10 матчамі вынікі з апошнім месцам), то ёсць толькі адна каманда з яшчэ горшым паказнікам – Швейцарыя, у якой такім чынам застаецца толькі 11 пунктаў.
Дарэчы, Фінляндыя і Казахстан у сваёй групе (таксама з 6 камандамі) і так набралі больш пунктаў, чым швейцарцы, – 18 супраць 17. Аднак абедзве зборныя будуць гуляць у плэй-оф.
• З удзельнікаў Еўра-2020 на Еўра-2024 ужо дакладна не згуляюць тры зборныя. Паўночная Македонія і Швецыя не прайшлі адбор, а Расію да адбору не дапусцілі.
• Затое плэй-оф праз Лігу нацый падарыў магчымасць таго, што з групы J кваліфікацыі на Еўра могуць выйсці адразу 5 каманд.
Люксембург, Ісландыя і Боснія і Герцагавіна маюць пуцёўкі ў плэй-оф. Прычым Ісландыю лёсаванне можа адправіць у Шлях А – Боснія і Люксембург ужо мелі гарантаваныя месцы ў шляхах B і C адпаведна. У такім выпадку тром зборным дастаткова проста прайсці іншых.
Малаверагодна, але магчыма!
• Зборная Эстоніі выйшла ў плэй-оф, набраўшы толькі адзін пункт на групавым этапе кваліфікацыі. Гэта антырэкорд – да гэтага ён належаў Беларусі, якая ў мінулым адборы выйшла ў плэй-оф з чатырма пунктамі.
Звязаны ён з тым, што УЕФА паміж адборамі пашырыла дывізіёны А і В з 12 каманд да 16 – адбалансаваўшы наймацнейшыя каманды з дывізіёна D у вышэйшыя.
Што там па плэй-оф?
Нарэшце вядомы поўны склад удзельнікаў – усе 12 каманд. Невядома пакуль, з кім будуць гуляць Фінляндыя, Украіна і Ісландыя – гэта вырашыць лёсаванне 23 лістапада ў 13:00 па мінскім часе.
Тады ж, 23 лістапада, лёсаванне вызначыць і гаспадароў фіналаў плэй-оф. Усяго на 12 каманд ёсць толькі тры пуцёўкі.
А што там па асноўным турніры?
Сам Еўра-2024 пройдзе з 14 чэрвеня па 14 ліпеня ў Германіі на 10 стадыёнах – у Берліне, Мюнхене, Дортмундзе, Штутгарце, Гельзенкірхене, Франкфурце, Гамбургу, Кёльне, Дзюсельдорфе і Лейпцыгу.
Лёсаванне групавога этапа турніру адбудзецца 2 снежня 2023 года ў 19:00 па Мінску ў Гамбургу. Кошыкі ўжо вядомыя.
Фармат турніру такі ж, як і ў 2016 і 2020 гадах – шэсць груп па чатыры каманды, у 1/8 фіналу выходзяць першыя два месцы і чатыры з шасці найлепшых трох.
Фота: Panoramic/Global Look Press
Іншыя пасты карыстальніка
