Мбапэ, Мусіяла і нават дэ Бруйнэ: зборная футбалістаў, якія маглі б гуляць за афрыканскія краіны

13 студзеня Кубак Афрыкі-2023 пачаўся з перамогі Кот-д'Івуара над Гвінеяй-Бісау з лікам 2:0. Для футбольных фанаў шыльда матча-адкрыцця была не надта прывабнай, бо зорных футбалістаў там амаль не было.

Хаця і мноства гульцоў маюць сувязі з афрыканскімі краінамі, але калі справа даходзіць да прадстаўлення дзяржавы на міжнароднай арэне, яны выбіраюць іншыя нацыянальныя каманды.

Збіраем склад з гульцоў, якія маглі б выступаць за афрыканскія зборныя, але абралі для сябе іншы лёс.

Стыў Манданда – ДР Конга

Здаецца, ён гуляе ўжо вечнасць, але гэта не так. 38-гадовы футбаліст, які з'яўляецца асноўным галкіперам «Рэна», мог бы выступаць за зборную Дэмакратычнай Рэспублікі Конга, бо нарадзіўся і пражыў да двух гадоў у Кіншасе разам са сваімі братамі, а затым пераехаў у горад Эўрэ, што ўва Францыі. Менавіта там Манданда пачаў займацца футболам у мясцовай камандзе.

Ужо ў 2005 годзе футбаліст дэбютаваў на прафесійным узроўні за «Гаўр», а ў 2008-м дэбютаваў за зборную Францыі ў таварыскім матчы супраць Эквадора.

Матчаў за Францыю: 35

Альфонса Дэвіс – Ліберыя, Гана

Перспектыўны абаронца, якога звязваюць з пераходам у «Рэал», таксама мог выступаць за зборныя Ліберыі і Ганы. Дэвіс нарадзіўся ў сям'і ліберыйцаў, якія ў той момант знаходзіліся ў лагеры для ўцекачоў у Гане. Праз некалькі гадоў сям'я будучага футбаліста пераехала ў Эдмантан, што паўплывала на будучыню Альфонса.

Ва ўзросце 14 гадоў хлопец самастойна пераехаў у Ванкувер, каб далучыцца да футбольнай акадэміі «Уайткэпс». Толькі ў 2017-м Дэвіс атрымаў канадскае грамадзянства, бо да таго быў грамадзянінам Ліберыі. Цікава, што адразу ў той жа дзень ён быў выкліканы ў дарослую зборную Канады, а ўжо 13 чэрвеня дэбютаваў у таварыскім матчы супраць Кюрасаа, стаўшы самым маладым гульцом у гісторыі зборнай ва ўзросце 16 гадоў 7 месяцаў і 11 дзён.

Матчаў за Канаду: 44

Галоў: 15

Антоніа Рудыгер – Сьера-Леонэ

Хоць асноўны абаронца мадрыдскага «Рэала» і нарадзіўся ў 1993-м у Берліне, яго маці была бежанкай з Сьера-Леонэ.

30-гадовы цэнтрбэк неаднаразова паказваў у сацсетках сваю сімпатыю да афрыканскай краіны. Пасля перамогі ў Лізе Чэмпіёнаў-2021 у складзе «Чэлсі» ён заснаваў свой дабрачынны фонд для развіцця адукацыі ў Сьера-Леонэ.

Яго дэбют за зборную Германіі адбыўся 13 чэрвеня 2014 года ў матчы супраць Польшчы.

Матчаў за Германію: 66

Галоў: 3

Давід Алаба – Нігерыя

Яшчэ адзін прадстаўнік «Рэала» меў магчымасць выступаць за зборную Нігерыі, хаця і нарадзіўся ў Вене, а вось яго бацька быў нігерыйцам з Агерэ, які пазней перабраўся ў Аўстрыю.

Алаба з'яўляецца адным з найлепшых гульцоў зборнай Аўстрыі і ўжо мае за сваімі плячамі 105 матчаў і 15 галоў. Адметна, што ў зборнай футбаліст выступае на пазіцыі паўабаронцы.

Матчаў за Аўстрыю: 105

Галоў: 15

Джэрэмі Фрымпонг – Гана

Адзін з найлепшых гульцоў фантастычнага «Баера» Хабі Алонса меў магчымасць выступаць за зборную з афрыканскага кантынента, бо яго маці з Ганы, але сам Джэрэмі нарадзіўся ў Амстэрдаме. Цікава, што ён меў магчымасць выступаць за яшчэ адну топавую еўрапейскую зборную. Яго сям'я пераехала ў Лондан, калі хлопцу было 7, і там ён пачаў займацца футболам у акадэміі «Ман Сіці».

У адным з інтэрв'ю, калі абаронцу яшчэ не выклікалі ў зборную Нідэрландаў, ён сказаў: «Я нарадзіўся ў Амстэрдаме, мае бацькі – галандзец і ганка. Мной цікавяцца з Ганы, але цяпер я хачу гуляць за Нідэрланды».

На гэты момант у яго толькі адзін матч у актыве за зборную Нідэрландаў, які адбыўся 13 кастрычніка 2023 супраць зборнай Францыі.

Матчаў за Нідэрланды: 1

Кевін дэ Бруйнэ – Бурундзі

Бельгіец, які нядаўна аднавіўся пасля траўмы, што атрымаў у жніўні ў матчы першага тура АПЛ супраць «Бёрнлі», меў магчымасць выступаць за зборную Бурундзі, бо яго маці, Анна, нарадзілася ў гэтай усходнеафрыканскай краіне і вырасла там, паколькі яе дзядуля меў нафтавую. кампанію.

11 жніўня 2010 года ён дэбютаваў за дарослую зборную Бельгіі ў таварыскім матчы супраць Фінляндыі, а яго каманда прайграла з лікам 0:1.

Матчаў за Бельгію: 99

Галоў: 26

Джамал Мусіяла – Нігерыя

Адзін з лідараў мюнхенскай «Баварыі» меў магчымасць выбіраць паміж трыма зборнымі. Акрамя Нямеччыны 20-гадовы футбаліст мог выступаць за Англію, а таксама за Нігерыю, бо яго бацька быў нігерыйцам.

Пазней у каментары Джамал патлумачыў, чаму абраў Германію: «Я мог бы гуляць за Нігерыю, гэта прыходзіла мне ў галаву, і я добра пра гэта падумаў. У мяне былі добрыя перамовы з Нігерыяй і Германіяй. Таму ўсё залежала ад мяне і ад таго, дзе я буду адчуваць сябе больш камфортна. І я вырашыў абраць Германію».

Адзначым, што футбаліст выступаў за моладзевыя каманды Англіі і Германіі, але за Нігерыю выступаў не было.

Матчаў за Германію: 25

Галоў: 2

Рафаэль Леау – Ангола

Зорны гулец «Мілана», які выступае за клуб з 2019-га, мог абараняць колеры зборнай Анголы. 24-гадовы вінгер вырас у партугальскім мястэчку Амора, а яго бацька быў ангольцам.

Цікава, што на партугальскай яго прозвішча азначае «леў». Ва ўзросце 9 гадоў Рафаэль далучыўся да акадэміі «Спортынга», а ў 2018-м пакінуў клуб, перайшоўшы ў «Ліль».

У 2021-му футбаліст быў упершыню выкліканы ў зборную Партугаліі, дзе дэбютаваў у таварыскім матчы з Катарам, замяніўшы Крышціяну Раналду.

Матчаў за Партугалію: 23

Галоў: 3

Лерой Санэ – Сенегал

Футбаліст меў магчымасць выступаць за Сенегал, бо яго бацька, Сулейман Санэ, быў былым футбалістам, які паспеў пагуляць за гэтую зборную. Большасць сваёй кар'еры Сулейман правёў у нямецкіх клубах, а за Сенегал адгуляў больш за 50 матчаў.

У лістападзе 2015 года хуткасны вінгер атрымаў дэбютны выклік ад Ёахіма Лёва ў склад Германіі. Праз пару тыдняў футбаліст выйшаў супраць зборнай Францыі.

Матчаў за Германію: 59

Галоў: 13

Александэр Ісак – Эрытрэя

Адзін з пераемнікаў Златана Ібрагімавіча ў зборнай Швецыі мог выступаць за зборную Эрытрэі. Справа ў тым, што яго бацькі з'яўляюцца эрытрэйцамі, якія пакінулі краіну. У 1980-х гадах яго тата Ціме хацеў лепшай будучыні для сваёй сям'і. У той час Эрытрэя была ў цэнтры зацяжной грамадзянскай вайны паміж канкуруючымі арганізацыямі за вызваленне краіны. Ціме з жонкай вырашылі пакінуць краіну і пераехалі ў Паўночную Еўропу.

Будучы нападаючы вырас у камуне пад назвай Сольна, дзе і пачаў займацца футболам з 6 гадоў, а пазней патрапіў у акадэмію АІКа.

8 студзеня 2017 года футбаліст дэбютаваў за зборную Швецыі ў таварыскім матчы супраць Кот-д'Івуара, яго каманда саступіла 1:2.

Матчаў за Швецыю: 42

Галоў: 10

Кіліян Мбапэ – Камерун, Алжыр

Адзін з найлепшых гульцоў апошніх гадоў у мінулым меў магчымасць выступаць за дзве афрыканскія зборныя. Бацька нападаючага родам з Камеруна, а маці з Алжыра. Дарэчы, летам 2023-га ён наведваў Камерун, дзе яго захоплена віталі заўзятары.

Кіліян дэбютаваў за зборную Францыі 25 сакавіка 2017 года ў матчы кваліфікацыі да чэмпіянату свету-2018 супраць Люксембурга.

Матчаў за Францыю: 75

Галоў: 46

***

Вось такі атрымаўся склад па схеме 4-2-4. Як вы лічыце, ці магла б гэтая каманда пазмагацца за перамогу ў сёлетнім турніры?

Чаму Кубкі Азіі і Афрыкі праходзяць у студзені, а не ўлетку – і з «2023» у назве

Фота: PETTER ARVIDSON/Global Look Press