Вы маглі не заўважыць, а «ПСЖ» ідзе на квадрупл: ужо ўзялі Лігу 1 і Суперкубак, далей ЛЧ і фінал Кубка

«ПСЖ» датэрмінова стаў чэмпіёнам Францыі!

Хто здзіўлены? Што ж, гэта сапраўды звыклая для апошніх сямі гадоў навіна, калі ваш трэнер – гэта не Маўрысіа Пачэціна, які ў 2021-м аддаў золата Лігі 1 «Лілю».

У той жа час вы маглі выпусціць той факт, што на заключным этапе сезона парыжане прэтэндуюць на квадрупл – могуць выйграць усе чатыры трафеі ў сезоне.

✅ Ліга 1 – гарантавалі тытул у нядзелю, толькі адна параза ў сезоне, дамінаванне Мбапэ

«ПСЖ» гарантаваў сабе чэмпіёнства ў нядзелю, хаця мог зрабіць гэта ў суботу перад хатнімі трыбунамі – прымудрыўся страціць пункты з «Гаўрам» (3:3), які змагаецца за выжыванне, зраўняўшы толькі ў кампенсаваны час.

Аднак у нядзелю «Ліён» абгуляў «Манака», таму за тры туры да фінішу каманда Луіса Энрыке ўсё роўна стала недасяжнай для манегаскаў:

Некалькі фактаў пра трыумф:

▪️ «ПСЖ» пакуль прайграў толькі адзін матч у сезоне – «Ніцы» ў верасні;

▪️ Гэта юбілейнае золата для клуба ў XXI стагоддзі – усе 10 тытулаў удалося выйграць пасля 2012-га і прыходу шэйхаў;

▪️ Кіліян Мбапэ дамінуе ў лізе – мае 33 выніковыя дзеянні (26+7). Найбліжэйшым праследавацелем з'яўляецца П‘ер-Эмерык Абамеянг з «Марселя» (20 – 13+7).

✅ Суперкубак Францыі – так, яго таксама ўлічваюць

На думку французскай прэсы, кіраўніцтва клуба і трэнераў/футбалістаў, Суперкубак Францыі ўваходзіць у цыкл квадрупла. Менавіта таму прадстаўнікі «ПСЖ» у апошні час часта гавораць на гэтую тэму, адказваючы на пытанні журналістаў.

Пэўная логіка тут існуе, бо матч праводзяць пасярод сезона. Парыжане гэты трафей выйгралі ў пачатку студзеня-2024 – адолелі «Тулузу» (2:0) з галамі Мбапэ і Лі Кан Іна.

🔁 Кубак Францыі – наперадзе фінал з «Ліёнам», які, здаецца, ачуняў

Таксама «ПСЖ» ужо ў фінале Кубка Францыі – у 1/2-й нядаўна прайшоў «Рэн», а ў вырашальным матчы сустрэнецца з «Ліёнам» (25 траўня).

«Ліён», дарэчы, выйшаў з крызісу – выдаў нядрэнную серыю і падняўся на 9-ю пазіцыю ў табліцы, хаця на старце сезона доўга ішоў у зоне вылету .

Рэпетыцыя фіналу адбылася ў папярэднім туры Лігі 1 – «ПСЖ» разбіў суперніка 4:1.

🔁 Ліга чэмпіёнаў – паўфіналы з «Барусіяй» Д, першы матч ужо на гэтым тыдні

Ну і, вядома ж, Ліга чэмпіёнаў, дзе некалькі тыдняў таму Энрыке выбіў «Барселону» ў 1/4-й.

Дэмбеле – новы Фігу для заўзятараў «Барсы»: спалілі футболку, а ён адказаў голам і ўсмешкай

Як бы там ні было, але французы лічацца фаварытам на выхад у фінал – будуць змагацца за гэта права з дортмундскай «Барусіяй», якую штарміць у Бундэслізе (5-е месца).

Першы матч – у гэтую сераду на выездзе ў Германіі. Стадыю паўфіналу «ПСЖ» у сваёй гісторыі праходзіў толькі раз – у 2020-м, калі саступіў «Баварыі» ў фінале.

Энрыке «марыць» пра квадрупл – і адказвае крытыкам

Энрыке некалькі разоў каментаваў магчымасць заваяваць квадрупл – ён лічыць гэта важнай мэтай, спасылаючыся на гістарычнасць дасягнення. Таксама Луіс выкарыстоўвае факт пра шанцы на чатыры трафеі ў якасці абароны супраць крытыкі:

💬 «Безумоўна, мы матываваныя зрабіць тое, што ніколі не рабіла ніводная французская каманда – узяць квадрупл. Матываваныя ўвайсці ў гісторыю клуба, горада і краіны.

У дзень майго прызначэння мы дакладна абмяркоўвалі жаданне змагацца за ўсе трафеі. Такая была мэта. Па стане на гэты момант – мы «ў працэсе». Мы ў вельмі добрым становішчы.

Трэба выбіць «Барусію», якая, наколькі вы помніце, апярэдзіла нас у групе смерці. Гэты паўфінал будзе складаным.

Мяне крытыкуюць з тых часоў, як я стаў трэнерам – няхай, можаце працягваць. Сабака брэша, а караван ідзе».

Напэўна, куды больш важным квадрупл стане для Мбапэ – Кіліян летам сыдзе з клуба свабодным агентам, але можа зрабіць гэта на мажорнай ноце з жаданым Кубкам ЛЧ для Парыжа.

Фота: Matthieu Mirville/ZUMA Press Wire, Le Pictorium, Christian Bertrand/Alamy, Abaca Press, Mutsu Kawamori/AFLO/Globallookpress.com