15 гульцоў з наймагутнейшым ударам у сучасным футболе

Футбол за апошнія 10-15 гадоў моцна змяніўся – шматлікія даследаванні статыстычна даказалі, што гульцы становяцца больш рабатызаванымі і менш рызыкоўнымі ў плане авантурных спроб прабіць з 25-30 метраў. Тое ж тычыцца завяршэння момантаў з блізкай дыстанцыі – форварды куды радзей робяць стаўку на сілу свайго ўдару, шукаючы іншыя шляхі, каб перагуляць галкіпера.

Аднак футбалісты, якія ідуць супраць сістэмы, хай і ў дэфіцыце, але не скончыліся – вось 15 найлепшых па якасці і сіле ўдараў.

15. Роберт Андрых

Першы з двух прадстаўнікоў «Баера» ў спісе – яшчэ ў папярэдніх клубах вылучаўся ўменнем прабіць здалёк, а ў Хабі Алонса атрымаў больш свабоды. Вынік – пастаянная пагроза, калі супернік прыціскаецца да сваіх варот, а леверкузенцам трэба рабіць чарговы камбэк.

Відэа-прыклад гола ў вароты «Ромы» – тут.

14. Джэрдан Шакіры

Легенда міжнародных турніраў у складзе зборнай Швейцарыі – ледзь не на кожным з іх адрозніваўся нейкай прыгажосцю. З гэтым відовішчам выдатна знаёмая і АПЛ, дзе паўабаронца паспеў аформіць некалькі класных галоў. Таксама цешыў публіку ў МЛС, але не забыўся на еўрапейскую аўдыторыю – паклаў у вароты Шатландыі на Еўра-2024 і цяпер вярнуўся ў дамашні чэмпіянат.

Сакрэт удараў Шакіры, здаецца, просты – дзякуючы свайму целаскладу і механіцы рухаў значна лягчэй прыкладвацца да мяча.

Відэа-падборка ўдараў Шакіры – тут.

13. Віктар Дзёкерэш

Новаспечаная зорка і самы жаданы форвард Еўропы проста цяпер. Увогуле, выніковасць шведа звязаная з тым, што ён аказаўся ў ідэальных умовах – свой найлепшы футбол Віктар дэманструе пры наяўнасці прасторы, а стыль «Спортынга» і ўзровень партугальскай лігі даюць мноства магчымасцяў.

Аднак варта адзначаць, наколькі добра ў Дзёкерэша пастаўлены ўдар. Асобная ўвага – да пенальці, якія ён у большасці выпадкаў выконвае на сілу. Нават калі кіпер адгадвае кут, то часта банальна не ў стане зрэагаваць.

Відэа-падборка ўдараў Дзёкерэша – тут.

12. Марка Асэнсіа

Асэнсіа ўжо далёка не ў прайме часоў «Рэала», калі штампаваў шалёныя галы адзін за адным. З часам іспанец рэгрэсаваў пасля траўмы крыжоў і не патрэбны і ў «ПСЖ», але адзіная якасць, у якой моцна не здаў, – удары. Праўда, сёння ён менш радуе фантастычнымі стрэламі, таму што атрымлівае менш шанцаў праявіць сябе.

Відэа-падборка ўдараў Асэнсіа – тут.

11. Кевін Дэ Бруйнэ

У бельгійца некалькі іншая тэхніка выканання – не наклболы, а менавіта ўдары на сілу або традыцыйныя для Кевіна ўдары на тэхніку. Аднак па ўзроўні эфектыўнасці гэта відавочна топ, плюс перавага Дэ Бруйнэ ў тым, што ён здольны прабіваць з абедзвюх ног. Гэтых спроб, як і нестандартных рашэнняў на полі, апошнім часам відавочна бракуе «Сіці».

Відэа-падборка ўдараў Дэ Бруйнэ – тут.

10. Эрлінг Холанд

Так, мы вельмі рэдка бачым галы Эрлінга здалёк. Дакладней, вельмі рэдка ён увогуле прабівае адтуль.

Але калі ацэньваць менавіта магутнасць удару ў спалучэнні з дакладнасцю, то Холанд сапраўды не адстае, з левай забіваючы «цвікі». Улічваючы фізічныя даныя форварда, гэта не здзіўляе.

Магчыма, нарвежцу якраз трэба ўразнастаіць сваю гульню, часцей робячы стаўку на лонгболы.

Відэа-прыклад гола ў вароты «ПСЖ» – тут.

9. Рубен Невеш

Мог бы сёння радаваць далёкімі ўдарамі фанатаў «Барселоны», але паехаў зарабляць у Саудаўскую Аравію ў «Аль-Хіляль».

У АПЛ партугалец пры гэтым запомніўся не толькі статусам шматгадовага лідара і капітана «Вулвз», але і класнымі галамі ў стылі традыцыйнага англійскага футбола нулявых.

Відэа-падборка ўдараў Невеша – тут.

8. Граніт Джака

У Джакі ў «Арсенале» былі розныя перыяды – крызісы, спады, уздымы, турбулентная нестабільнасць. Але адзінае, што заўсёды ў любой форме прысутнічала ў яго гульні – здольнасць з нічога зрабіць гол незразумелым моцным далёкім ударам.

Пасля вяртання ў Германію хаўбек не спыніўся – зноў мучыць галкіпераў Бундэслігі, для якіх сустрэчы з «Баерам» становяцца сапраўдным кашмарам.

Відэа-падборка ўдараў Джакі – тут.

7. Хакан Чалханаглу

Гулец, якому ўвогуле нельга даваць біць здалёк – часам нават з цэнтра поля, хто памятае той фантомны гол за «Гамбург». Турак – унікальны ў плане ўдараў, бо акрамя сілы заўсёды адрозніваецца дакладнасцю і эфектыўнасцю спроб.

Відэа-падборка ўдараў Чалханаглу – тут.

6. Лукас Падольскі

Так, ён дагэтуль гуляе ў Польшчы ў 39 гадоў (але завершыць ужо летам), таму і трапляе ў спіс. Наогул, у Падольскага ў актыве ёсць адзін з рэкордаў па сіле ўдару – 205 км/г на ЧС-2010. Яго левая паспела пакашмарыць як Бундэслігу, так і АПЛ.

Відэа-падборка ўдараў Падольскага – тут.

5. Крышціяну Раналду

Напэўна, дзесьці ў пачатку дзясятых Крыш яўна быў топ-1 – ніхто акрамя яго не тое што не клаў такія скрымеры, а нават не спрабаваў біць з дыстанцый, з якіх біў партугалец. Тыя часы ў «МЮ» і першыя гады ў «Рэале» з наклболамі і гарматамі – штосьці ўнікальнае ў плане яркасці відовішча і рэгулярнасці (што самае галоўнае).

Цяпер ён, вядома, таксама можа прыкласціся, але робіць гэта значна радзей праз больш абмежаваны функцыянал на полі.

Відэа-падборка ўдараў Раналду – тут.

4. Джон Дуран

На змену пачало прыходзіць новае пакаленне – тут не хапае гульцоў са смеласцю ўзроўню ранняга КрыРа, але сярод такіх дакладна можна часткова адзначыць форварда «Астан Вілы» Дурана. Тое, што ён забівае ў бягучым сезоне, часам прымушае хапацца за галаву.

Відэа-падборка ўдараў Дурана – тут.

3. Руслан Маліноўскі

Заўзятарам «Ювентуса» і іншых каманд Серыі А напэўна дагэтуль сняцца галы ўкраінца ў іх вароты. Сёння хаўбек, які па галах з далёкіх дыстанцый цягам некалькіх сезонаў у Еўропе саступаў толькі Месі, траўмаваны.

Відэа-падборка ўдараў Маліноўскага – тут.

2. Халк

Халк, як і Падольскі, у 38 дагульвае на Бацькаўшчыне – у «Атлетыка Мінейра», дзе з'яўляецца асноўным нападнікам і капітанам. У мінулым сезоне бразілец забіў 19 мячоў, а частка з іх – усё яшчэ сваімі неверагоднымі па моцы ўдарамі.

За час у «Атлетыка» з 2021-га Халк паспеў і са штрафнога з цэнтра (!) поля зарадзіць. Пораху там яшчэ яўна шмат.

Відэа-падборка ўдараў Халка – тут.

1. Федэрыка Вальвердэ

У Халка дзякуючы Анчалоці нарэшце з'явіўся годны канкурэнт – улюбёнец Карла, Вальвердэ. У пазамінулым сезоне трэнер ледзь не сілком змусіў Федэрыка часцей біць, арганізаваўшы заклад на 10 галоў – і ўругваец выдаў адзін з найлепшых гадоў у індывідуальным плане і прывучыўся часцей выкарыстоўваць сваю гармату з правай нагі.

У 2024/25 хаўбек працягвае здзіўляць – 5/6 галоў аформіў з-за меж штрафной, прычым кожны другі-трэці становіцца скрымерам. Гэта таксама разнавіднасць футбольнай эстэтыкі, якая на секунду ўводзіць у прыемны шок. Ну, хіба што брамнікам не падабаецца.

Відэа-падборка ўдараў Вальвердэ – тут.

Фота: Andrew Yates/Sportimage, Philipp Kresnik/SPP, Miguel Lemos/ZUMA Press Wire, Miguel Marruffo/PressInPhoto, Cristiano Barni/Alamy Live News, Kines Milano/Alamy Live News, PA Images, ddp media GmbH, Action Plus Sports, dpa, Independent Photo Agency