Салах здаў праз Рамадан? Звычайна ўзорны вернік, але бывала, што ставіў пост на паўзу

Махамед Салах у лютым – галы, рэкорды, лідарства ў спісе на «Залаты мяч».

Махамед Салах у сакавіку – спад, нуль галявых дзеянняў у трох з чатырох матчаў ва ўсіх турнірах, магчымая страта шанцаў на «Залаты мяч».

Спад формы і выніковасці зорнага нападніка «Ліверпуля» супалі з Рамаданам. У гэтым годзе месяц абавязковага паста для мусульман доўжыцца з 28 лютага па 30 сакавіка.

Егіпцянін і яго сям'я з'яўляюцца мусульманамі і прытрымліваюцца Рамадана. На пачатку паста футбаліст паказаў у сваім інстаграме, як з дачкой упрыгожваюць дом і рыхтуюцца да гэтага важнага ў жыцці мусульман перыяду.

Салах прайграў свой «Залаты мяч» у матчах з «ПСЖ». Тлумачым чаму

Рамадан доўжыцца 30 дзён

Рамадан – гэта час духоўнага ачышчэння, чытання Карана і працы над сабой. Гэты пост з'яўляецца адным з пяці слупоў ісламу. Астатнія чатыры – вера, малітва, міласэрнасць і паломніцтва ў Меку.

Правілы паводзін падчас паста вызначаныя Каранам. Цягам 30 дзён мусульмане цалкам устрымліваюцца ад ежы, напояў, курэння і сексу кожны дзень ад світання і да заходу сонца. Таксама забаронена сварыцца, біцца і лаяцца.

Абмежаванні не працуюць у цёмны перыяд сутак – пасля вячэрняга намаза. Гэта штодзённая абавязковая малітва, якая здзяйсняецца пяць разоў на дзень.

Калі з прычыны важных абставін чалавек не можа трымаць пост, то ён павінен вярнуць «доўг» пасля. Напрыклад, гэта датычыцца цяжарных і жанчын, якія кормяць грудзьмі, ваенных і хворых. Наогул ад паста вызваляюцца людзі з невылечнымі хваробамі і пажылыя, якім цяжка без ежы і вады ўдзень. Але ў абмен на гэтыя саступкі яны мусяць дапамагаць іншым. Напрыклад, карміць беднякоў.

Дзеці могуць выконваць пост па жаданні, а абавязковым ён становіцца з 15 гадоў. Кожны раз Рамадан праходзіць у розныя даты – зрушваецца календаром на 10 дзён назад.

Падчас Рамадана мусульмане ядуць двойчы за суткі – на сняданак і вячэру. У дазволены час сутак можна есці ўсё без выключэння – няма ніякіх абмежаванняў на мяса ці малочныя прадукты. Важна, што ваду і напоі можна ўжываць толькі пасля заходу сонца і да світання.

Займацца спортам падчас Рамадана не забаронена, але інтэнсіўнасць трэнінгаў раяць знізіць. А цяпер накладзіце ўмовы паста на футбаліста, які гуляе ў АПЛ.

Перапыняў пост дзеля фіналу Лігі чэмпіёнаў

Салах не ўпершыню выконвае пост, але ж ён не робат, а жывы чалавек. Калі не даваць арганізму паліва, то цела не будзе такім эфектыўным. Напрыклад, у матчах 1/8 фіналу Лігі чэмпіёнаў супраць «ПСЖ» і ў фінале Кубка Лігі з «Ньюкаслам» Махамед ніяк не ўплываў на гульню, а «Ліверпуль» вылецеў з ЛЧ і аддаў мясцовы трафей.

Былы футбаліст «Манчэстэр Сіці» і эксперт Майка Рычардс лічыць, што само прытрымліванне паста магло паўплываць на форму Салаха. Пра гэта ён заявіў у падкасце Rest is Football.

«Не забывайце, што ў яго цяпер ідзе Рамадан. Цалкам нармальна, што ў яго няма такога ўзроўню энергіі, як калі ён можа есці. Насамрэч, для яго быць цяпер на полі і гуляць на такім узроўні – гэта ўжо выбітная рэч».

У 2023 годзе камеры зафіксавалі, як футбаліст адмовіўся ад вады пасля замены: супрацоўнік «Ліверпуля» даў бутэльку, але Салах паставіў яе на зямлю, не зрабіўшы ні глытка.

Гэта быў матч «Ліверпуля» з «Манчэстэр Сіці», які «мерсісайдцы» прайгралі 1:4. Тады Рамадан працягваўся з 22 сакавіка па 21 красавіка.

У 2018 годзе Салах перапыняў пост дзеля фіналу Лігі чэмпіёнаў, які прайшоў у Кіеве. Пра гэта распавёў фізіятэрапеўт «Ліверпуля» Рубен Понс.

«Калі на мінулым тыдні мы займаліся ў Марбельі, то Мо прытрымліваўся паста. Але мы ўгаварылі яго перапыніць яго на чацвер, пятніцу і ў дзень фіналу. Пазней ён адновіць яго», – сказаў Понс.

Калі ў Юргена Клопа спыталі пра рашэнне яго лідара, трэнер адказаў, што гэта асабістая справа гульца.

«Рэлігія - гэта асабістая справа. Таму мне не хацелася б пра гэта гаварыць. Але ўсё добра, на трэнінгах ён поўны сіл», – сказаў Клоп.

«Ліверпуль» тады саступіў «Рэалу» 1:3. Салах атрымаў траўму яшчэ ў першым тайме і не змог працягнуць гульню, а Лорыс Карыюс зрабіў памылку, якая фактычна пахавала гульню і яго кар'еру.

У наступны год Салах не перарываў паста. Гулец «Ліверпуля» піў ваду з бутэлькі падчас фіналу ЛЧ з «Тотэнхэмам» на 38-й хвіліне матча, але гэта было ўжо пасля заходу сонца. Каманда з Ліверпуля перамагла, а Махамед забіў ужо на другой хвіліне матча з пенальці.

Таксама вядома, што падчас Рамадана Салах пераносіць інтэнсіўныя трэнінгі на начны час. У 2020 годзе ён паказаў фота з заняткаў ў 2:40 раніцы.

Падчас Рамадана Салах актыўна займаецца дабрачыннасцю

Салах штогод паказвае ў сваім інстаграме фота, як упрыгожвае дом традыцыйнымі ліхтарыкамі. Яны сімвалізуюць свята і вітаюць пачатак Рамадана. Уявіце, папулярнасць і маштаб персоны футбаліста настолькі вялікія, што ў яго родным Егіпце гэтыя ліхтарыкі прадаюць з тварам самога Махамеда.

Гэтая салахаманія пачалася яшчэ ў 2017 годзе, калі Егіпет упершыню з 1990 года выйшаў на чэмпіянат свету. Тады егіпцяне так натхніліся поспехам зборнай, што хапалі ўсё, на чым быў твар ці імя футбаліста. Брэнд Салаха стаў залатой жылай для егіпецкіх прадаўцоў.

А ліхтары былі настолькі папулярныя, што іх нават замаўлялі ў Кітаі, хаця раней імпартныя былі пад забаронай. У Егіпце таксама ёсць традыцыя называць фінікі, якія традыцыйна ядуць падчас паста, у гонар знакамітасцяў. Вядома, смакоцце з імем Махамеда Салаха былі лідарам продажаў.

А яшчэ Салаха любяць за яго дабрачынныя праекты. «Ён увесь час ахвяруе грошы на дабрачыннасць і дапамагае свайму роднаму гораду. Гэтага дастаткова, каб хто заўгодна яго любіў», – сказаў дзіцячы трэнер Махамеда Саід Эльшышыні.

Сёлета Салах з'явіўся ў рэкламе Vodafone, прысвечанай Рамадану. У роліку ён зняўся разам з дачкой Каян. Па сюжэце Махамед прыязджае на сустрэчу з дачкой і прывозіць ёй у падарунак мяккую цацку ў выглядзе зайца. А пасля гэтага яны разам забаўляюцца ў парку забаў. Вядома, усё гэта адбываецца ў вячэрні час.

У АПЛ увялі спецыяльныя паўзы для мусульман падчас Рамадана

У красавіку 2021 года «Лестэр» і «Крыстал Пэлас» зрабілі паўзу ў гульні на 35-й хвіліне. Гэта быў жэст павагі і падтрымкі Уэслі Фафана і Шэйку Куятэ, якія прытрымліваюцца Рамадана. Калі сонца зайшло, каманды далі гульцам магчымасць папіць вады і хуценька перакусіць.

Пасля гульні футбаліст «Лестэра» сказаў, што «гэта робіць футбол цудоўным». А дзеянні каманд стварылі прэцэдэнт, які хутка стаў нормай. Сёння арбітры атрымліваюць указанне прыпыняць гульні, каб дазволіць гульцам-мусульманам прыняць вадкасць. Пра ўсе гэтыя моманты дамаўляюцца перад матчам.

Практыка падтрымкі АПЛ гульцоў-мусульман падчас Рамадана распаўсюдзілася на іншыя лігі – Нідэрланды, Германію, ЗША. Аўстралійская А-Ліга ў лютым 2024 года абвясціла пра спецыяльныя паўзы ў матчах для футбалістаў, каб яны маглі падсілкавацца.

У 2021 годзе вірусным стала відэа, як гульцы ў матчы другога турэцкага дывізіёна змаглі паесці прама на поле. Перапынак у матчы праз траўмы аднаго з футбалістаў супаў з вячэрнім заклікам да малітвы. Гэта дазволіла гульцам перакусіць садавіной, энергетычнымі батончыкамі і папіць.

У Катары падчас Рамадана трэнінгі адкладаюць да заходу сонца. «Аль-Наср», дзе гуляе Крышціяну Раналду, нават паведамленні ў сацсетках публікуе ў начны час падчас паста.

«Людзі кладуцца спаць вельмі позна. Гэта частка культуры, і мы хочам адлюстраваць гэта ў нашай камандзе», – тлумачыў клуб.

Рамадана прытрымліваецца не толькі Салах, але і іншыя вядомыя гульцы-мусульмане – Нгало Кантэ, Поль Пагба, Рыяд Марэз, Карым Бензема і іншыя.

Фота: The Athletic, інстаграм Махамеда Салаха, David Blunsden/Global Look Press