Мбапэ сфаліў настолькі груба, што чырвоную прызнаў нават «Рэал». Але, здаецца, прапусціць толькі 1 матч
Нават Джуду за мацюкі далі больш.
«Рэал» у матчы 31-га тура Ла Лігі мінімальна абгуляў на выездзе аўтсайдара «Алавес». І гэта пры тым, што з 38-й да 70-й хвіліны каманда Карла Анчалоці гуляла ў меншасці (далей працягнулі ў фармаце «10 на 10»).
🔸 Прычынай стала ўжо нашумелае выдаленне Кіліяна Мбапэ – француз груба ўехаў прамой нагой у галёнку хаўбека гаспадароў Антоніа Бланка.
Арбітр Сесар Сота Града спачатку паказаў жоўтую, аднак перагледзеў відэапаўтор – і пагоршыў пакаранне да відавочнай чырвонай.
Бланка, на якім сфаліў француз, змог працягнуць сустрэчу.
🔸 Чырвоная была настолькі відавочнай, што з ёй не спрачаюцца нават у «Рэале»:
💬 Кіліян Мбапэ папрасіў прабачэння, што пацвердзіў сам Антоніа Бланка: «Удар быў моцны. Мы з Кіліянам пагаварылі, і ён папрасіў прабачэння за гэта. Ніякіх праблем, такія рэчы ў футболе здараюцца».
💬 Давідэ Анчалоці, які замяняў у матчы дыскваліфікаванага праз перабор жоўтых бацьку, таксама прызнаў чырвоную: «Чыстая чырвоная. Ён папрасіў прабачэння, ён не жорсткі хлопец. Ён разумее, што зрабіў. Усе фалы, якія былі на ім, прымусілі яго так адрэагаваць».
💬 Пацвярджае прыняцце клубам гэтай чырвонай і журналіст The Athletic Гільерма Раі, які асвятляе справы непасрэдна «Рэала». «Крыніцы ў «Рэале» згаджаюцца з рашэннем, але яны хочуць, каб ВАР быў такім жа эфектыўным у гульні супраць «Эспаньёла», – паведаміў ён.
🔸 Пытанне на сёння палягала ў тым, на які тэрмін і ў якіх турнірах Мбапэ атрымае дыскваліфікацыю. Бо «Рэал» пасля двух тураў Ла Лігі чакае фінал Кубка Іспаніі супраць «Барселоны», якую каманда Карла Анчалоці яшчэ не абгульвала ў гэтым сезоне.
Таму тут усё залежала ад фармулёвак Сота Града ў пратаколе.
🔸 Арбітр кваліфікаваў у рапарце фол нападніка як дзеянне з «празмерным ужываннем сілы», а не як агрэсіўныя паводзіны.
Гэтая фармулёўка стала ключавой, бо, паводле артыкула 130 Дысцыплінарнага кодэкса Каралеўскай федэрацыі футбола Іспаніі (RFEF), падобныя парушэнні караюцца дыскваліфікацыяй ад аднаго да трох матчаў, калі дзеянні ствараюць рызыку, але не прыводзяць да траўмы.
🔸 У сваю чаргу, калі футбаліст атрымлівае да трох матчаў дыскваліфікацыі, ён адбывае пакаранне ў тым жа турніры, дзе адбылося парушэнне.
Калі ж пакаранне перавышае тры матчы (напрыклад, пры агрэсіўных паводзінах), яно распаўсюджваецца на ўсе нацыянальныя турніры.
То бок пры максімальным пакаранні па цяперашняй фармулёўцы Мбапэ прапусціць матчы Ла Лігі з «Атлетыкам», «Хетафе» і «Сельтай» – а на матч з «Барсай» у Кубку паміж імі будзе даступным.
🔸 Зрэшты, «Хетафе» і «Сельце» рана выдыхаць з палёгкай: як паведамляе журналіст COPE Ісак Фута, Мбапэ будзе дыскваліфікаваны толькі на адну гульню – супраць «Атлетыка».
Для параўнання, нават Джуда Белінгема за іканічнае «fuck you» арбітру дыскваліфікавалі на два матчы!
Аднак варта адзначыць, што рашэнне па Мбапэ пакуль толькі на ўзроўні інсайдаў – чакаем афіцыйнага пацвярджэння.
Іншыя пасты карыстальніка
