Раналду заключыў новы кантракт з «Аль-Насрам» – анамалія для футбола, але ўсё яшчэ не рэкорд па агульнай суме
Ёсць віды спорту, дзе плацяць больш.
Крышціяну Раналду, чый патэнцыйны пераход з саудаўскага «Аль-Насра» ў іншую каманду быў адной з інтрыг лета-2025, вырашыў застацца на Блізкім Усходзе і падпісаць новы, анамальна вялікі для футбола, кантракт.
Партугалец неаднаразова заяўляў, што гаворка ідзе не толькі пра грошы і ўвогуле не толькі пра футбол, бо яму падабаецца Саудаўская Аравія, ён усім рэкамендуе туды прыязджаць і наогул хоча зрабіць унёсак у развіццё гэтай краіны. А мясцовая футбольная ліга, зноў жа, паводле слоў Крышціяну, ужо ўваходзіць у топ-5 у свеце.
Аднак відавочна, што грошы адыгралі тут далёка не апошнюю ролю – Marca паведамляла, што Раналду будзе зарабляць 180-200 млн еўра ў сезон, а таксама атрымае долю ва ўласнасці «Аль-Насра» пасля падаўжэння кантракту.
Дакладную суму кантракту вызначыць цяжка, бо кожнае выданне, якое публікуе інсайды ці разлікі, акрамя новых дэталяў выкарыстоўвае яшчэ і розныя валюты, аднак у сярэднім усе сышліся на тым, што гэта каля 500 млн фунтаў стэрлінгаў на два гады (або прыкладна 710 млн долараў – у долары перавядзем для далейшай зручнасці, бо за межамі футбола найбуйнейшыя спартыўныя кантракты выпісваюцца менавіта ў гэтай валюце).
Паспрабуем параўнаць, якое месца новы кантракт Крышціяну займае ў гісторыі сусветнага спорту – і ці сапраўды такіх грошай не плацілі раней нікому?
Раналду будзе зарабляць рэкордна шмат для спорту за адзін год
Варта растлумачыць некалькі рэчаў перад тым, як перайсці да сухой статыстыкі і вялікіх лічбаў.
Усе прыведзеныя ніжэй кантракты і сумы ў іх указаныя да падаткаабкладання. Спартсмены жывуць у розных краінах, дзе можа істотна адрознівацца адсотак падатку, які яны павінны плаціць (а ў межах ЗША істотная розніца назіраецца ад аднаго штата да іншага). Таксама адзначым, што да ўвагі браліся менавіта доўгатэрміновыя спартыўныя кантракты, а не разавыя ганарары, якія бываюць, напрыклад, у боксе за адзін паядынак.
Наяўнасць у топе баксёра Сауля Альварэса яўна мае патрэбу ў дадатковым кантэксце. У 2018-м мексіканец заключыў кантракт з найбуйнейшым баксёрскім стрымінгам у свеце DAZN на 11 паядынкаў. Аднак у 2020 годзе бакі скасавалі пагадненне праз шэраг фактараў (у прыватнасці, праз незадаволенасць Канела і яго нежадання працягваць гэтую супрацу).
З баскетбалістам Шэем Гілджэсам-Александэрам сітуацыя адваротная – ён мае на руках кантракт, які яшчэ не ўступіў у сілу. Канадскі баскетбаліст у сезоне-2024/25 узяў галоўную індывідуальную ўзнагароду НБА – стаў MVP рэгулярнага сезона. А затым дапамог выйграць першы для «Аклахомы» тытул і стаў MVP фінальнай серыі.
Гэты сезон дазволіў Шэю прэтэндаваць на супермаксімальнае падаўжэнне кантракту з яго цяперашнім клубам, на якое ён ужо пагадзіўся, аднак да 2027-га Гілджэс-Аляксандэр будзе гуляць за «Аклахому» яшчэ па старым кантракце, а затым уступіць у сілу яго новае супермаксімальнае пагадненне, якое, дарэчы, з'яўляецца найбуйнейшым у гісторыі НБА.
Кантракт Раналду не рэкордны па агульнай суме заробку
Як бы дзіўна гэта ні гучала, але так, Раналду зарабляе рэкордна шмат за адзін год, аднак агульная сума яго кантракту з'яўляецца другой самай высокай у сусветным спорце.
Апярэджвае Крышціяну дамініканскі бейсбаліст Хуан Сота, які перад стартам сезона-2025 падпісаў з «Нью-Ёрк Метс» самы вялікі кантракт у гісторыі спорту. Сота заробіць 765 млн долараў да выплаты падаткаў, але ажно за 15 гадоў, і гэта асаблівасць, якая выбіваецца з агульнай тэндэнцыі і адрознівае бейсбольныя кантракты ад усіх астатніх. Яны вялізныя ва ўсіх сэнсах – і ў кантэксце заработнай платы, і ў кантэксце працягласці.
Перад «Метс» Хуан Сота гуляў за іншую франшызу з Нью-Ёрка – легендарныя «Янкіз». І гэта яшчэ адна цікавая асаблівасць, бо папярэдні рэкордны па агульнай суме кантракт японец Шахей Атані ў 2024-м падпісаў з «Лос-Анджэлес Доджэрс» (700 млн долараў на 10 гадоў), а перайшоў ён туды пасля гульні за іншую франшызу з Лос-Анджэлеса «Энджэлс».
Пагадненні Раналду і Месі анамальныя для футбола – столькі могуць плаціць толькі ім
Кантракты Раналду і Месі займаюць першыя тры месцы ў спісе найбуйнейшых кантрактаў па сярэднім заробку ў год і тройчы з'яўляюцца ў топ-5 кантрактаў па найбольшай агульнай суме заработнай платы. Але гэта зусім нетыповая для футбола гісторыя, бо плаціць у гэтым відзе спорту столькі могуць толькі Ліянелю Месі і Крышціяну Раналду.
У топ-100 спартыўных кантрактаў больш няма ніводнага прадстаўніка футбола. Затое назіраецца дамінаванне бейсбола і іншых відаў спорту, дзе ўсе грошы круцяцца вакол амерыканскіх ліг – баскетбола і амерыканскага футбола.
Асаблівасцю менавіта MLB (Галоўная ліга бейсбола) з'яўляецца тое, што ў ёй няма столі заробкаў, якая існуе ў НБА, НФЛ и НХЛ. То бок фактычна ў бейсболе ёсць абмежаванне на выдаткі, але гэтае абмежаванне – дадатковыя выдаткі (нешта накшталт падатку на раскошу за перавышэнне пэўнай сумы, выдаткаванай на заробкі). То бок калі ў клуба MLB дастаткова багаты ўласнік, ён можа працягваць выпісваць вялікія кантракты найлепшым гульцам лігі, проста выплачваючы дадатковы падатак.
Увядзенне столі заробкаў у MLB актыўна абмяркоўваецца гадамі, аднак да згоды прыйсці пакуль не ўдалося.
Такое новаўвядзенне дакладна ўрэгулявала б рынак у бейсболе і спусціла б гэты від спорту ў топе недзе ў раён НБА і НФЛ, але дакладна не абвергла б агульную заканамернасць – у спартыўных лігах ЗША суперзоркам плацяць шмат, і больш, чым у футболе. Аднак з персонамі маштабу Крышціяну Раналду цягацца ўсё роўна немагчыма, бо яны здольныя зарабляць на іншым узроўні нават там, дзе ўвогуле не прынята столькі плаціць.
44-гадовы брамнік «Флуміненсе» ідзе на сусветны рэкорд і спіць усяго тры гадзіны ў суткі
Іншыя пасты карыстальніка
