З 6-га (!) дывізіёна ў Бундэслігу за паўгода: дзіўная гісторыя 25-гадовага форварда «Майнца»
Нямецкі Джэймі Вардзі.
У 14-м туры Бундэслігі амаль безнадзейны ў гэтым сезоне «Майнц» стаў аўтарам сапраўднай сенсацыі – на выездзе адабраў пункты ў «Баварыі».
Нягледзячы на гэта, каманда працягвае знаходзіцца ў агоніі, а ці не адзіны пазітыў, з якім яе звязваюць у гэтым сезоне, – дзіўны дэбют у прафесійным футболе аднаго з яе гульцоў.
50 галоў у мінулым сезоне, павышэнне ў чацвёртую лігу і, у рэшце, дэбют у Бундэслізе і еўракубках – неверагодная гісторыя Фабіа Марэна-Феля
Пасля 0:4 ад «Фрайбурга» у 12-м туры чэмпіянату кіраўніцтва «Майнца» звольніла Бо Хенрыксена. У мінулым сезоне дацкі трэнер упершыню за дзевяць гадоў вывеў каманду ў еўракубкі, аднак разрывацца паміж Бундэслігай і Лігай канферэнцый аказалася надзвычай складана – цяпер «Майнц» асеў на дне чэмпіянату з 4-пунктным адрывам ад «Хайдэнхайма» і «Санкт-Паўлі»:
Пакуль клуб шукаў новага трэнера пасля звальнення Хенрыксена, да матча з мёнхенгладбахскай «Барусіяй» каманду рыхтаваў Беньямін Хофман – трэнер дублюючага складу «Майнца», які выступае ў Паўднёва-заходняй рэгіянальнай лізе (чацвёрты па іерархіі нямецкі дывізіён).
Улічваючы, што адной з самых вялікіх праблем «карнавальшчыкаў» цягам сезона з’яўляецца атака (да матча з «Баварыяй» 11 галоў каманды ў чэмпіянаце былі найгоршым вынікам), Хофман не пабаяўся рызыкнуць і выпусціў у стартавым складзе найлепшага бамбардзіра «Майнца II» Фабіа Марэна-Феля, для якога гэта быў дэбютны матч у Бундэслізе.
25-гадовы іспанскі немец, напэўна, і марыць не мог пра футбол найвышэйшага ўзроўню – яшчэ ў мінулым сезоне ён абараняў колеры слаўнага футбольнага клуба «Гау-Одэрнхайм» з шостага нямецкага дывізіёна, а столлю яго кар’еры на той час былі выступы ў складзе «Рылазінгена» з Оберлігі (пятая па іерархіі ліга Германіі), з якім Марэна-Фель нават згуляў у Кубку Германіі, дзе саступіў «Хольштайн Кілю» з лікам 1:7.
Зрэшты, цягам трох з паловай сезонаў у «Гау-Одэрнхайме» ў Фабіа ўсё складалася як мага лепш. У мінулай кампаніі, напрыклад, ён забіў 50 мячоў у 30 матчах Фербандслігі і значна палепшыў сваю статыстыку выступаў за каманду – 120 галоў і 17 асістаў у 107 матчах.
Словам, заслужыў павышэнне – і з шостай лігі перайшоў у чацвёртую.
У нямецкім футболе дублюючыя склады каманд Бундэслігі выконваюць ролю не проста платформы для абкаткі маладых футбалістаў, але і, у прыватнасці, з’яўляюцца ўласнай экасістэмай з асобным кіраўніцтвам, сістэмай сувязяў і нават турнірнымі задачамі – і «Майнц II», да якога Марэна-Фель далучыўся летам 2025 года свабодным агентам, не з‘яўляецца выключэннем.
Нягледзячы на гэта, трэнерскі штаб асноўнай каманды звычайна актыўна сочыць за поспехамі дубля – і вельмі часта запрашае найлепшых яго гульцоў як мінімум патрэнавацца з прафесіяналамі. Фабіа, які з пачатку сезона зрабіў 9+3 у Рэгіянальнай лізе, трапляў у заяўку на матч Бундэслігі яшчэ пад кіраўніцтвам Хенрыксена, а Хофман адразу ж кінуў у бой.
У цэлым 25-гадовы форвард не правёў найлепшы матч у сваім жыцці, але ўсё ж мог вызначыцца забітым мячом – у адной атацы двойчы патрапіў у каркас варот «Гладбаха»:
На мінулым тыдні Марэна-Фель таксама дэбютаваў у Лізе канферэнцый, з’явіўшыся ў канцы матча з «Лехам», а ўвесь паядынак з «Баварыяй» на «Альянц Арэне» прасядзеў на лаўцы запасных.
А цяпер давайце задумаемся: 25-гадовы футбаліст, які яшчэ паўгода таму гуляў у шостым нямецкім дывізіёне, сёння дэбютуе ў Бундэслізе і еўракубках, а таксама прыязджае з камандай на «Альянц Арэну» на матч з «Баварыяй» – хіба гэта не сапраўдная казка, якіх сёння так бракуе футболу?
Фабіа Марэна-Фель – нямецкі Джэймі Вардзі?
Марэна-Фель ніколі не быў талентам на юнацкім узроўні, не гуляў за юнацкія ці моладзевыя зборныя ні адной з краін і ў цэлым быў самым звычайным футбалістам, для якога аматарскі футбол выглядаў максімумам.
Заўзятары нават праводзяць паралелі з Джэймі Вардзі, які далучыўся да «Лестэра» ў 25 гадоў і толькі ў 27 дэбютаваў у Прэм’ер-лізе:
Цікава, што Вардзі перад АПЛ яшчэ пагуляў у Чэмпіёншыпе і набраўся досведу ў прафесійным футболе, а Марэна-Фель адразу ж заскочыў з шостага дывізіёна Германіі (транзітам праз чацвёрты) у Бундэслігу.
Хто ведае, магчыма, і гэтага хлопца чакае выбітная кар’ера ў будучыні?
Разгорнутая статыстыка Бундэслігі гэтага сезона
Фота: FuPa.net, FSV Mainz 05, Allgemeine Zeitung
Іншыя пасты карыстальніка
