«Ён так вырашыў»: Браім Дыяс запароў пенальці ў фінале КАН і атрымаў залатую буцу ў слязах

Гучная і відовішчная развязка ў фінале КАН-2026 паміж Сенегалам і Марока кампенсавала заўзятарам у цэлым прэсны турнір. Вырашальны вечар у Рабаце надоўга застанецца ў памяці многіх, а асабліва яго запомніць галоўны антыгерой – Браім Дыяс.

Мараканскі вінгер і лідар сваёй зборнай у самы адказны момант вырашыў прабіць пенальці, якім мог прынесці Марока першы з 1976 года трыумф на кантынентальным турніры, паненкай. Але брамнік суперніка нібыта чакаў такога рашэння. У выніку Дыяс аказаўся пад вялізным эмацыйным ціскам, бо яго зборная ў выніку саступіла Сенегалу 0:1.

Адным няўдалым рашэннем Браім перакрэсліў у цэлым цудоўны турнір у сваім выкананні. 26-гадовы вінгер аформіў пяць галоў і стаў найлепшым бамбардзірам КАН-2026, за што яго пасля фіналу ўзнагародзілі залатой буцай.

Вось толькі гэтае дасягненне Дыясу відавочна было цяжка святкаваць і радавацца яму.

Слёзы гульца сталі хайлайтам вечара. Ён плакаў адразу пасля замены ў першым авертайме.

Са слязамі на вачах ішоў на ўручэнне ўзнагароды праз калідор, які сфармавалі сенегальцы.

Калі галоўнага трэнера Марока Валіда Рэграгі спыталі пасля гульні пра выкананне пенальці Дыясам, ён адказаў асцярожна, нагадаўшы, што паміж прызначэннем удару і яго выкананнем мінула 17 хвілін праз пратэсты сенегальцаў і іх першапачатковага рашэння сысці з поля:

«У яго было шмат часу, перш чым выканаць пенальці. І гэта відавочна адцягнула яго ўвагу. Але мы не можам змяніць тое, што адбылося. Ён так вырашыў. Нам трэба глядзець цяпер наперад і проста прыняць рашэнне Браіма».

Здаецца, Рэграгі вырашыў паберагчы псіхіку свайго гульца. Былы футбаліст зборнай Марока Хасан Кашлуль падкрэсліў: «У найбліжэйшыя дні Дыяс будзе мець нямала начных кашмараў».