Шведская федэрацыя гімнастыкі адрэагавала на рашэнне World Gymnastics адмяніць усе абмежаванні, якія прымяняліся да расійскіх і беларускіх спартсменаў з лютага 2022 года.

«Шведская федэрацыя гімнастыкі цвёрда прытрымліваецца сваёй пазіцыі – не падтрымліваць вяртанне расійскіх і беларускіх спартсменаў і працягваць выказваць падтрымку Украіне. Яшчэ тады, калі было прынятае рашэнне дазволіць спартсменам з гэтых дзвюх краін выступаць пад нейтральным флагам, федэрацыя данесла сваю крытычную пазіцыю да дзвюх міжнародных арганізацый».

Што да будучых міжнародных турніраў і чэмпіянатаў, федэрацыя заявіла, што будзе ўдзельнічаць у спаборніцтвах толькі пры ўмове, што гімнасты, трэнеры, фізіятэрапеўты і суддзі будуць адчуваць сябе камфортна з такім рашэннем. Калі не – федэрацыя цалкам падтрымае іх рашэнне адмовіцца.

У заяве таксама падкрэсліваецца, што многія спартсмены гадамі трэніраваліся дзеля магчымасці выступіць менавіта на гэтых спаборніцтвах. Таму галоўная задача федэрацыі – стварыць для гімнастаў і каманды вакол іх найлепшыя ўмовы для паспяховага выступлення.

Ні асобных спартсменаў, ні спартыўныя федэрацыі ў наш час не заклікаюць да байкоту. Выключэнні датычацца толькі краін, якія знаходзяцца пад абавязковымі санкцыямі ААН або ЕС, якія маюць прамое дачыненне да спорту. На гэты момант такой сітуацыі няма.

У той жа час федэрацыя падкрэслівае, што па-ранейшаму лічыць: расійскіх і беларускіх гімнастаў не варта дапускаць да ўдзелу ў спаборніцтвах», – паведаміла арганізацыя.

Рашэнне World Gymnastics азначае, што расійскім і беларускім гімнастам дазволена выступаць пад дзяржаўнай сімволікай, флагам і гімнам на ўсіх міжнародных стартах пад эгідай арганізацыі.

Чытайце таксама

Аўтар: Dzmitry Antonau

Крыніца: Svenska Gymnastikförbundet