Мільёны праглядаў: чэхаславацкі ваўкарэз стаў зоркай сацсетак пасля з'яўлення на Алімпіядзе

18 лютага ў лыжна-біятлонным цэнтры імя Фабіа Каналя прайшлі алімпійскія спаборніцтвы жаночага каманднага спрынту вольным стылем.

У кваліфікацыі змагаліся 26 зборных. Але тут з імі на трасу нечакана выскачыў сабака і ірвануў да фінішу.

Гэта быў чэхаславацкі ваўкарэз па мянушцы Назгул. Яго ўладальніцай аказалася былая лыжніца Аліса Варэска, якая пазнала свайго сабаку ў трансляцыі і адправіла паведамленне каментатару Eurosport Italia.

Фотафінішная камера нават зафіксавала чатырохлапага спрынтара, калі ён перасякаў лінію.

«Самы вірусны фотафініш Алімпійскіх гульняў. Дык што, перагнаць Ёханеса Клэбо можа толькі драпежнік?» – напісалі на афіцыйнай старонцы Кубка свету па лыжных гонках.

Так Назгул стаў сапраўднай зоркай сацсетак.

Смешны фрагмент стаў хітом на старонках афіцыйных транслятараў. А штучны інтэлект дапамог карыстальнікам X зрабіць сабаку алімпійскім чэмпіёнам.

Відэа з падборкай пацешных каментароў тыпу: «Які быў яго час на фінішы?», «Ідэальная форма», «Дайце яму медаль» – таксама ёсць.

Аднак былі і тыя, каму выхадка Назгула не спадабалася. Ці гэта проста зайздрасць?

Відэа: x/Eurosport_IT, tiktok/@suspilne_sport, сацсеткі.

Фота: сацсеткі.