У Іране пакаралі смерцю 19-гадовага члена нацыянальнай зборнай па барацьбе Салеха Махамадзі
Іран пакараў смерцю траіх мужчын, абвінавачаных у забойстве паліцыянтаў падчас антыўрадавых пратэстаў у студзені.
Паводле інфармацыі CBS, сярод мужчын быў 19-гадовы Салех Махамадзі, член зборнай Ірана па барацьбе. Гэта першыя павешанні, здзейсненыя ў сувязі са студзеньскімі дэманстрацыямі.
Пакаранні смерцю адбыліся раніцай у чацвер, 19 сакавіка, у правінцыі Кум пасля таго, як Вярхоўны суд падтрымаў іх смяротныя прысуды, паведамляе іранскае інфармацыйнае агенцтва Tasnim.
Махамадзі, Мехдзі Гасемі і Саід Давудзі былі прызнаныя вінаватымі ў забойстве двух паліцыянтаў у асобных нападах у Куме.
Іх таксама асудзілі за «махарабэ» – вядзенне вайны супраць Бога – адно з абвінавачванняў, якое Іран выкарыстоўвае для вынясення смяротных прысудаў пратэстоўцам і апанентам Ісламскай Рэспублікі.
Па даных праваабарончых груп, трое мужчын прызналіся ва ўчыненні злачынстваў пад катаваннямі і былі пакараныя без справядлівага суда.
