Турнір на прызы рэстарана «Вініл»: новы дом для дартсменаў

Дартс - гэта ня толькі прафесійны спорт з ашаламляльнымі прызавымі, але і гульня пабаў, дзе і мужчыны і жанчыны за куфлем піва могуць пагуляць у любімую забаву. Доўгі час Мінск, дый і ўся Беларусь чакала адкрыцця такога паба і нарэшце гэта адбылося. 

Дзякуючы намаганням цудоўнага чалавека і дартсмена Аляксандра Беха дый кіраўніцтва рэстарана Дайрыс, дартс-супольнасць нашай краіны атрымала прасторнае памяшканне з чатырма новымі бордамі, асобным уваходам і цудоўным рэхам ад пападання дарта ў мішэнь. Памяшканне вольнае ад курэння і мае добрае асвятленне, словам, усё што трэба, каб нічога не адцягвала ўвагу ад гульні.

Адкрыццё новай дартс пляцоўкі суправаджалася невялікім турнірам на 16 чалавек. Удзельнічалі моцныя дартсмены з вельмі шырокім узроставым дыяпазонам - ад школьніка Ягора Юшы да легендарнага Вячаслава Талкачова, які ўжо размяняў восьмы дзясятак, што не перашкодзіла яму дайсці да паўфінала і прайграць там будучаму чэмпіёну ў вырашальным лэге. Лепшым жа стаў Сяргей Шляхаў, які добра прагрэсіруе апошнім часам, не пакінуўшы шанцаў у фінале Андрэю Тарасенка - 3-0. На турніры было зафіксавана некалькі максімальных набораў, што сімвалічна, першы з іх зрабіў Аляксандар Бех.

Турнір на новым месцы плануецца праводзіцца на пастаяннай аснове, але новая дартс-пляцоўка адкрыта для кожнага жадаючага пагуляць у дартс з 19-га верасня. Рэстаран Вініл знаходзіцца ў будыніне ДК МАЗ.