Васіль Баранаў здзейсніў сенсацыю сезона ва УПЛ. Не той, пра каго вы падумалі, але таксама звязаны з Беларуссю

Ва украінскай прэм’ер-лізе – папаўненне: клуб з Чарнігаўскай вобласці «Кудрыўка» ўпершыню выйшаў у эліту, выбіўшы ў стыках палтаўскую «Ворсклу», якая, наадварот, дагэтуль не вылятала ў Д2 пасля свайго выхаду ва УПЛ у 1996-м.

«Кудрыўка» атрымала сваю назву ад вёскі, насельніцтва якой да пачатку паўнамаштабнай вайны Расіі супраць Украіны складала ўсяго 838 чалавекі – гэта рэкордна маленькі паказнік у гісторыі для каманды УПЛ.

Каманда была заснавана ў 1982 годзе, але прафесійны статус набыла толькі ў 2023-м – і тады ж згуляла ва ўкраінскам Д3. Заняла толькі 7-е месца, але трапіла ў Д2 пасля юрыдычнага паглынання клуба «Кудрыўка-Ніва», які выступаў на дывізіён вышэй.

Уласнік клуба – чарнігаўскі бізнесовец у сферы будоўлі Раман Саладарэнка. Ён сам гуляў на аматарскім узроўні і нават прысутнічаў у ростары каманды на мінулы сезон, а двое яго сыноў вучацца ў акадэміі «Вердэра».

Галоўны трэнер сённяшняй «Кудраўкі» – Васіль Баранаў. Знаёмае спалучэнне «імя + прозвішча» для аматараў беларускага футболу. Але гэта не той самы таямнічы Васіль Баранаў, які калісьці выступаў за зборную Беларусі і маскоўскі «Спартак», а пасля схаваўся ў вёсцы Новае Жыццё на Гомельшчыне і пераключыўся на цалкам непублічны лад жыцця. І нам толькі і заставалася, што згадваць прыгоды яго маладосці ды час ад часу чуць адмовы на прапановы пагаварыць.

«Вася передает всем привет». Как я искал Баранова

Ад Новага Жыцця да Кудрыўкі да пачатку вайны можна было дабрацца за гадзіны чатыры – паміж вёскамі менш як 250 кіламетраў пры не замкнутых межах. Але ўсё ж такі каманду ва УПЛ вывеў не беларускі Васіль Баранаў, які нарадзіўся ў пасёлку Зябраўка Гомельскай вобласці (на мясцовым аэрадроме ў верасні 2022 года гучалі выбухі і гэта звязвалі з вайной), а ўкраінскі Васіль Баранаў – нараджэнец Луганска. Але гэты трэнер мае свае сувязі з Беларуссю.

Украінец Баранаў, калі яшчэ сам гуляў, спярша правёў чатыры гады ў «Дняпро-Трансмаш», а пасля сезон за «Смаргонь» пад кіраўніцтвам Георгія Кандрацьева. За магілёўскую каманду паўабаронца правёў ажно 84 матчы ў чэмпіянаце Беларусі і аформіў 10+8 па «гол + пас».

Самым моцным і адначасова расчаравальным для гульца выйшаў сезон-2005: за першыя 13 тураў легіянер набраў 8 балаў (6+2) і з'яўляўся найлепшым бамбадзірам каманды, якая йшла на 4-м месцы, але потым зламаў ключыцу і выбыў на два мясяцы, а калі вярнуўся, то часам нават не выходзіў на поле і аформіў усяго 1 галявы пас за 5 матчаў. Ну а «Дняпро-Трансмаш» стаў 6-м у чэмпіянаце (да трэцяй пазіцыі і пуцёўкі ў Кубка Інтэртота не хапіла шасці пунктаў) – вышэй з таго моманту клуб фінішаваў толькі ў 2009-м, калі ўзяў бронзу.

Баранаў гуляў пад кіраўніцтвам Валерыя Стральцова, у камандзе якога была проста безліч украінцаў, што сёння ўявіць складана. Стральцоў умеў шукаць таленты ў суседзяў і меў там доборыя сувязі. Напрыклад, у тым жа 2005-м у «Дняпро-Трансмаш» знаходзіліся адразу 12 маладых (усім не больш за 24 гады) суайчыннікаў Васіля Баранава. Беларусаў, для параўнання, было 16.

Прычым некаторыя з тых украінцаў зрабілі добрую кар'еру ў Беларусі. Ілля Галюза браў Кубак з «Шахцёрам», а Ігар Варанкоў дабіраўся з мінскім «Дынама» да групы Лігі Еўропы.

Калі вярнуцца да сезона-2024/25, то Баранаў як выканаўца абавязкаў ачоліў «Кудрыўку» ў 6-м туры Д2 пасля сыходу папярэдніка. Каманда на той момант мела 6 балаў пасля 5 тураў, але пад кіраўніцтвам экс-гульца «Дняпро-Трансмаш» выйграла сваю падгрупу ў Першай лізе (яна падзлена на дзве часткі) і кваліфікавалася ў пул каманд, якія гуляюць паміж сабой за павышэнне ў класе. Тут Баранава зацвердзілі галоўным, а «Кудрыўка» скончыла сезон на 4-м месцы, якое дазволіла сустрэцца ў стыках з 13-й камандай УПЛ «Ворсклай».

Цікава, што яшчэ нядаўна Баранаў узначальваў «Ворсклу» U-19: туды прыйшоў па ініцыятыве новага трэнера галоўнай каманды Віктара Скрыпніка (да таго яны разам працавалі ў «Зары» на аналагічных пасадах). Першы сезон пры Баранаве, нягледзчы на сціплыя ўмовы, «Ворскла» U-19 скончыла на 5-м месцы, а ў наступным пасля 11 тураў чэмпіянату-2023/24 мела ўсяго 9 балаў, пасля чаго коўч быў звольнены.

Ну а праз 20 месяцаў Баранаў пазбавіў былога працадаўцу прапіскі ва УПЛ: першы матч скончыўся гасцявой перамогай палтаўцаў 2:1, але ў матчы ў адказ «Кудрыўка» спачатку перамагла 1:0 ў асноўны час, а потым выбіла суперніка з УПЛ па пенальці (3:2).

Разам з «Ворсклай» зазнаў паразу Андрэй Бацула – за яе левы абаронца адгуляў трэці сезон запар, а пачаў пасля таго, як сышоў з мінскага «Дынама». У чэмпіянаце Беларусі-2021 ён стаў найлепшым асістэнтам, аформіўшы 3+12 за 27 матчаў. Праўда, той сезон быў унікальным для левага абаронцы, а вось за 71 матч пасля вяртання на Радзіму ён аформіў усяго 1+7.

Затое пасля вылету ад «Кудрыўкі» Бацула прыйшоў на прэс-канферэнцыю замест галоўнага трэнера каманды Юрыя Максімава, які не знайшоў слоў у такіх складаных абставінах.

Што да вясковай каманды, то яна не збіраецца спыняцца на тым, чаго ўжо дасягнула – марыць пра Лігу чэмпіёнаў да 2030 года. Праўда, Баранаву трэба атрымаць трэнерскую ліцэнзію Pro, каб афіцыйна працаваць галоўным хаця б ва УПЛ.

Фота: прэс-службы «Ворсклы», «Дынама-Мінск», «Кудрыўкі» і «Дняпра».