Беларус, які «інвеставаў» у анлайн-гульню, цяпер з кватэрай, нятаннай нават для яго заробку ў «Дынама» – з аўто вось не шыкаваў
Ёсць прагнозы, што няшмат там пажыве ў бліжэйшыя гады.
24-гадовы беларускі хакеіст Віталь Пінчук – сапраўдны лідар мінскага «Дынама». Яно ў гэтым сезоне ідзе наверсе табліцы КХЛ, а Пінчук мае 47 (22+25) балаў за 45 сустрэч – шосты ў спісе бамбардзіраў усёй лігі, у камандзе саступае толькі лідару турніра канадцу Сэму Энасу з 54 (22+32) ачкамі.
Пры гэтым Пінчук мае невялікі па мерках КХЛ заробак, а грошы, як казаў, «інвестуе» ў анлайн-гульню. Раней здзіўляў некаторых заўзятараў тым, наколькі сціплую меў машыну. Цяпер адзначыўся інакш – кватэрай у элітным жылым комплексе ў Мінску. Расказваем, што за нерухомасць і ці дарагая гэта пакупка для хакеіста.
Пінчук гуляе за «Дынама» з 2020-га – праўда, у першыя пару гадоў больш часу праводзіў у фармах з ЧБ, але цяпер ідзе чацвёрты сезон у якасці асноўнага гульца. Пры гэтым атрымліваў вельмі сціпла па мерках КХЛ. Згодна са звесткамі расійскага «Спорт-Экспрэса», які сістэматызуе ўсе заробкі лігі, у сезонах-2022/23 і -2023/24 Пінчуку належыла па 2 млн расійскіх рублёў за сезон – згодна з сярэднім курсам, за два гады сумарна атрымліваецца каля 50 тысяч долараў.
У пачатку кастрычніка 2023-га, калі Пінчук быў найлепшым бамбардзірам «Дынама» на старце сезона, Telegram-канал «Хоккейный Бульбаш» расказаў, што хакеіст ездзіць не на нейкім люксавым аўто, а на Audi A6 C4, якая выпускалася ў 1996-1997 гадах. Партал blizko.by тады праверяў, што беларускіх аўтабарахолках такую машыну можна было набыць нават за 2600 долараў, самую дарагую прапаноўвалі за 6700. Некаторыя заўзятары ў каментарах тады моцна здзівіліся сціпламу выбару, а іншыя нагадвалі, што ў форварда не такі ўжо і вялікі аклад, каб шыкаваць.
Ілюстрацыйны экзэмпляр Audi A6 C4
На сезон-2024/25 заробак Пінчука ўзрос да 5 млн расійскіх рублёў. Ці – зноў жа, па сярэднім курсе – прыкладна 53 тысяч долараў за гульнявы год. У тым розыгрышу форвард стаў пятым у камандзе па ачках у «рэгулярцы» (43, 25 шайб ды 18 асістаў) і найлепшым у плэй-оф (11, 5 шайб ды 6 асістаў). Гэта прывяло да яшчэ больш рэзкага пад’ёму па грошах – на сезон-2025/26 кантракт быў падпісаны на 14 млн расійскіх рублёў. Пры старце розыгрыша то было эквівалентна 174 тысячам долараў. Але па мерках КХЛ – усё роўна вельмі мала: па грошах Пінчук быў толькі 15-м у «Дынама» ды ажно 362-м па ўсёй лізе. Дарэчы, цяпераўні найлепшы бамбардзір КХЛ Энас мае ў «Дынама» больш за 600 тысяч долараў за сезон – 69-е месца ў лізе.
У верасні 2025-га расійскія суразмоўцы запыталі Пінчука, на што ён выдаткоўвае грошы. І хакеіст назваў сваімі «інвестыцыямі» набыццё гульнявых касцюмаў у анлайн-шутары Counter-Strike, у якія ўклаў «няшмат – тысяч 300 расійскіх», гэта значыць вялікія для сярэдняга беларуса 3,7 тысячы долараў. Але дадаў, што ўжо можа атрымаць 25% прыбытку, калі ўсё прадасць. Плюс сказаў, што Васіль Дземчанка ўклаў у тую ж гульню пад 40 тысяч долараў ды прапанаваў усе анлайн-здабыткі памяняць на машыну форварда – можа, ён ужо паспеў перасесці на што больш статуснае? Публічнай інфармацыі пра тое мы не знайшлі.
Але ж, аказваецца, Пінчук змог укласціся ў нерухомасць. Пра гэта сведчыць відэа, выкладзенае 15 снежня ў акаўнце мінскага жылога комплекса «Северный Берег». Вынікае, што хакеіст набыў там кватэру – праўда, не адзін, а разам з братам, якому патэлефанавалі і, маўляў, вельмі абрадавалі навіной, што жытло гатовае на пару месяцаў раней за планаваны тэрмін. Форвад расхваліў праект за ўласны пляж і парк, а таксама адзначыў малапавярховасць дамоў. Прыемна здзівіла, маўляў, і праграма «Клуб Жыхароў», дзякуючы якой можна карыстацца паслугамі саўны, трэнарожнай залы ці кінатэатра толькі для насельнікаў комплекса.
«Северный Берег» пазіцыянуецца як элітны жылы комплекс у Мінску. Плануюць будаваць яго да 2040 года, таму што расцягнуць збіраюцца ажно на 15 квадратных кіламетраў – ад Цнянскага вадасховішча да Драздоў.
Планаваная тэрыторыя комплекса «Северный берег» на карце Мінска
Згодна з раследваннем БРЦ, агромністы ўчастак пад комплекс быў аддадзены бясплятна без правядзення аўкцыёну ў 2021-м указам Аляксандра Лукашэнкі. Таксама журналісты выявілі, што кампанія-забудоўшчык «Северного Берега» – ТАА «Рыверсайд Дэвелапмент Лімітэд» – мае дачыненне да вядомага эмірацкага бізнесмена Махамеда Аль Алабарама і людзей з кампаніі братоў Карычаў. Гэтыя сербы дзякуючы сувязям з Лукашэнкам не раз атрымлівалі ільготныя ўмовы пад свае праекты праз кампанію Dana Holdings.
Праект «Северного Берега». Фота: northwaterfront.by
Пакуль збудаваныя некалькі дамоў ля Цнянскага водасховішча – але да «Мінск-Арэны» ўсё роўна дабірацца нядоўга ды зручна праз МКАД.
Што тычыцца цэн, то на этапе будаўніцтва фіксаваліся прапановы ад 85 тысяч еўра за аднапакаёўку да 117 тысяч еўра за трохпакаёўку. Цяпер у аб’явах цэны пачынаюцца ад 92 тысяч долараў. Але ўсё гэта – без рэмонту, і на відэа відаць, што браты Пінчукі атрымалі таксама голыя сцены – то трэба яшчэ ўкласціся ў рэмонт. У роліку не бачна, якога памера кватэру займеў хакеіст, але нават мінімальная цана – гэта больш за гадавы заробак хакеіста да гэтага лета, ды і ад цяперашняга палова.
Зрэшты, партнёры і эксперты актыўна адпраўляюць Пінчука ў НХЛ. Там можна зарабіць мільёны долараў – цяперашнія беларускія форварды лігі не дадуць схлусіць. Адно што ў такім выпадку ў мінскай кватэры давядзецца колькі гадоў жыць максімум летам, у міжсезонне.
Другие посты пользователя
