«На ВАР быў немец – дык што «дзякуй», Германія»: у «Барсе» незадаволеныя судзействам супраць «Атлетыка»

Паслясмак першага іспанскага чвэрцьфіналу сезона Лігі чэмпіёнаў не абышоўся без размоваў пра суддзяў – «Барселона», якая саступіла «Атлетыка» 0:2, апелюе адразу да некалькіх эпізодаў.

Галоўная скарга – на адсутнасць чырвонай карткі і пенальці за гульню рукой пры ўводзя мяча ад варот

У другім тайме пры ліку 0:1 адбыўся неардынарны эпізод – «Атлетыка» ўводзіў мяч ад варот, і брамнік нібыта сам увёў яго ў гульню. Аднак партнёр, Марк Пубіль, дакрануўся да мяча рукамі і наноў развёў яго.

Каталонскія фанаты і гульцы апелявалі да таго, што дотык рукой адбыўся ўжо «ў гульні» – пасля ўвядзення мяча брамнікам. І насамсправе мелі для гэтага падставы, бо за падобнае раней у ЛЧ каралі.

У сезоне-2024/25 пенальці прызначылі ў такім жа эпізодзе – калі абаронца «Астан Вілы» Тайран Мінгс узяў мяч у рукі пасля паса брамніка і спрабаваў сам увесці яго ў гульню.

Праўда, тады Мінгса дадаткова не пакаралі жоўтай, якая стала б для яго другой і адпаведна выдаленнем – а Хансі Флік у сваім каментарыі патрабаваў менавіта падвойнага пакарання для Пубіля:

«Я не разумею, чаму ВАР не ўмяшаўся. Памылкі – нармальная з’ява, але які сэнс у ВАР, калі ён не ўмешваецца ў такіх сітуацыях? Трэба было прызначаць пенальці і паказваць другую жоўтую і чырвоную.

ВАР быў вельмі сфакусаваны на «Атлетыка». Суддзя ВАР – немец (Крысціян Дзінгерт – заўв.), таму «дзякуй», Германія. Гэта адчуваецца несправядлівасцю, але ў рэшце гэта футбол. Мы павінны прыняць гэта».

Акрамя Фліка таксама выказаўся абаронца «Барсы» Жэрар Марцін: «Брамнік увёў мяч – так што на той момант гульня аднавілася. Так, рэферы на полі мог не заўважыць гэтага, таму што такое рэдка бывае. Але лічу, што тады эпізод павінны былі пераглядзець на ВАР. Для мяне гэта пенальці, мяч спынілі рукой».

Маркус Рэшфард такога ж меркавання: «Відавочна, што гэта пенальці. Такое ўжо здаралася раней, і ў такіх выпадках заўсёды прызначалі пенальці. Здаровы глузд падказвае, што гэта мусіў быць пенальці – гэта відаць і па рэакцыі нашых гульцоў, і гульцоў «Атлетыка». Я сам гуляў у матчы, дзе падобнае адбылося супраць нас, так што для мяне тут усё відавочна».

З меркаваннем пагадзіліся і некалькі былых іспанскіх арбітраў – мясцовая прэса прыводзіла цытаты, дзе яны называлі гэта момантам для пенальці. Вылучыўся толькі Матэа Лаос: «Гульцы «Барсы» тут не прэсінгавалі, таму «Атлетыка» не атрымаў дзякуючы гэтаму дзеянню ніякай перавагі, а мяч нават не пакінуў брамніцкую. Супернікаў побач не было».

Цікавым таксама з’яўляецца тлумачэнне ад Джуліяна Сімеонэ – гулец заявіў, што ў «Атлетыка» заўсёды першы пас аддае менавіта палявы футбаліст, а не галкіпер. І заклікаў журналістаў перагледзець усе ўвядзенні мяча ў гульню, каб пераканацца ў гэтым.

А бацька Дыега быў вельмі лаканічным – назваў гэта рашэнне суддзяў «здаровым глуздам».

Сумневы і ў чырвонай картцы Кубарсі

Флік не абмінуў і прамое выдаленне Пау Кубарсі ў канцы першага тайма – яно ж прывяло да штрафнога, з якога Альварэс адкрыў лік.

«Я не ўпэўнены, што гэтага кантакту было дастаткова, таму што мяч быў ззаду Сімеонэ», – сказаў Хансі.

З чым не пагадзіліся, напрыклад, эксперты ў студыі CBS – Цьеры Анры, Джэймі Карагер і Міка Рычардс.

«Мы ўсе сказалі, што гэта чырвоная, яшчэ калі арбітр спачатку даў жоўтую, – пачаў Анры. – Так, гэта не выглядае наўмысным дзеяннем, але калі кагосьці так спыняеш, дык гэта зрыў відавочнай галявой магчымасці».

Заўзятары ў сацсетках, наадварот, настроеныя катэгарычна – кажуць пра рабунак.

***

«Гэта не чырвоная. Кубарсі відавочна спрабаваў згуляць у мяч».

«Як гэта чырвоная? Футбол зноў абрабаваў «Барсу»

«Калі мяч праходзіць ззаду Джуліяна, ён сам адстаўляе нагу назад без усякай магчымасці згуляць у мяч і не ведае, дзе менавіта мяч знаходзіцца; у любым разе гэта хутчэй быў бы фол Джуліяна на Кубарсі».

«Барса» не прагуляла – яе абрабавалі ў матчы супраць «Атлетыка»:

• «Гэта не была чырвоная картка для Кубарсі: гэта менавіта Джуліяна выстаўляе сваю нагу, ён стварае кантакт з Кубарсі, а затым лёгка падае»;

• «Відавочны пенальці для «Барсы» не быў прызначаны: Муса аддае мяч Пубілю, які дакранаецца да мяча рукамі»;

• «Барса» зрабіла 6 фолаў і атрымала 2 жоўтыя і 1 чырвоную картку… «Атлетыка» зрабіў 17 фалоў – і толькі 3 жоўтыя і 0 чырвоных»;

• «Мы не можам спаборнічаць у такіх умовах несправядлівасці!»

«Раптам ты становішся нікім»: не ўсім з Класа-2007 «Барселоны» пашанцавала так, як Ямалю і Кубарсі