Скандал у Чэмпіёншыпе: у «Саўтгемптана» могуць адабраць фінал плэй-оф – праз шпіянаж!

На днях у англійскім Чэмпіёншыпе прайшлі паўфіналы плэй-оф. Абедзве першыя сустрэчы завяршыліся нулявымі нічыімі, таму лёс пуцёвак на «Уэмблі» вырашаўся ў матчах у адказ.

У панядзелак «Хал Сіці» адолеў «Мілуал» 2:0 і стаў першым фіналістам плэй-оф; а ў аўторак «Саўтгемптан» перагуляў «Мідлзбра» 2:1 і таксама наблізіўся да магчымага прамоўшана.

Зрэшты, пакуль «Хал» спакойна рыхтуецца да вырашальнай бітвы, «Саўтгемптан» знаходзіцца ў падвешаным стане – у яго могуць адабраць фінал праз новы маштабны шпіёнскі скандал.

Што адбылося

У чацвер, 7 траўня, за 48 гадзін да першай сустрэчы паміж «Мідлзбра» і «Саўтгемптанам», на базе ёркшырцаў заўважылі мужчыну, які хаваўся ў кустах непадалёк ад трэнавальнай пляцоўкі гаспадароў.

Яго ідэнтыфікавалі як трэнера-аналітыка «Саўтгемптана», у якога з сабой было прафесійнае абсталяванне для назірання, у прыватнасці мікрафон і дэвайсы для трансляцыі трэнінгу сваім калегам з поўдня Англіі.

Мужчыну ў хмызняку выпадкова заўважыў прадстаўнік медыя-каманды «Мідлзбра» – той пасля «кароткай сутычкі» выдаліў запісы з тэлефона, адмовіўся называць сваё імя і паспрабаваў збегчы. Ён забег у суседні будынак – гатэль, які належыць уласніку «Бора», – каб пераапрануцца і пакінуць месца падзей.

Па інфармацыі Sky Sports, шпіёна злавілі на гэтым месцы:

Што будзе з «Саўтгемптанам»

Правілы Англійскай футбольнай лігі забараняюць назіраць за трэнінгамі супернікаў за 72 гадзіны да пачатку матча.

«Мідлзбра» падаў афіцыйную скаргу ў EFL, звінаваціўшы «Саўтгемптан» у парушэнні правіла 127 аб назіранні за перадматчавым трэнінгам, а таксама правілаў аб выкананні прынцыпу «абсалютнай добрасумленнасці». Справу перадалі ў Незалежную дысцыплінарную камісію.

У студзені 2019 года на шпіянажы злавілі прадстаўніка «Лідса», які сачыў за трэнінгам «Дэрбі Каўнці» напярэдадні іх вочнай сустрэчы. Тагачасны галоўны трэнер каманды Марсела Б’елса арганізаваў 70-хвілінную прэс-канферэнцыю, на якой не толькі не папрасіў прабачэння (чаго чакалі журналісты), але і адкрыта распавёў, што такім чынам назіраў за кожным супернікам. У той жа час уругваец правёў надзвычай дэталёвую прэзентацыю, прысвечаную аналізу апанентаў, і падкрэсліў, што інфармацыя, якую прыносіў шпіён, не давала нічога новага – пра ўсё гэта трэнерскі штаб ужо даўно ведаў.

У Б’елса назваў сябе «тупым» і асабіста заплаціў штраф 200 тысяч фунтаў, які EFL наклала на «Лідс».

Той скандал стаў адным з самых гучных і рэзанансных у сучасным англійскім футболе, дзе звычайна практыкуюць свядомую законапаслухмянасць. Але самае галоўнае – ён змяніў правілы гульні.

У выпадку з «Саўтгемптанам» гаворка вядзецца ўжо не проста пра санкцыі ў выглядзе грашовага штрафу – каманду могуць «узнагародзіць» тэхнічнай паразай 0:3 у першым матчы, што ў такім выпадку выведзе «Мідлзбра» ў фінал плэй-оф.

Аўтарытэтны журналіст Бэн Джэйкабс паведамляе, што «Бора» працягвае трэнавацца і спадзяецца, што да 23 траўня Дысцыплінарная камісія прыме «справядлівае рашэнне на іх карысць».

Галоўны трэнер «Саўтгемптана» Тонда Экерт актыўна пазбягае пытанняў пра шпіянаж, але заўзятары, паглядзеўшы відэа з прэс-канферэнцыі, упэўненыя – ён выглядае як чалавек, які сапраўды нешта нарабіў:

Пакуль ідзе расследаванне, англійская футбольная супольнасць літаральна разносіць «Саўтгемптан» – каманду і клуб лічаць нявартымі ні Прэм’ер-лігі, ні фіналу плэй-оф Чэмпіёншыпа.

Здаецца, «святыя» аказаліся не такімі ўжо і святымі.

Мясцовым заўзятарам (пакуль што) усё роўна – яны жартуюць над сабой і атрымліваюць асалоду ад магчымасці вярнуцца ў АПЛ:

Фота: Sky Sports