Тарпеда - Узда

Апошні матч рэгулярнага чэмпіяната Беларусі ў Другой Лізе стаў выдатным адлюстраваньнем усяго сэзону для Чорна-Белых. Ад панядзелка сноптыкі запалохвалі менчукоў і гасьцей сталіцы шквальным ветрам і бесперапынным дажджом у суботу. Маўлялі, рэдкі гаспадар сабаку выганіць з хаты ў такі дзень.

Субота насамрэч пачалася з зацягнутых хмарамі нябёсаў. Зрэшты, як і пачатак сэзону для “аўтазаводцаў”. Каманда мела мноства праблем з камплектацыяй, заяўкай на сэзон і фінансаваньнем. Выключна тытанічнымі намаганьнямі ўсіх неабыякавых да клюба людзей, “Тарпеда” другі год запар прыняло ўдзел у Другой Лізе.Нягледзячы на змрочныя прагнозы чорна-белыя сьцягі зіхотка рэілі над родным стадыёнам “Тарпеда”, на які каманда нарэшце павернулася пасьля доўгага перапынку і бадзяньня па Жодзінскіх ускрайках і Смаляічах. Добрае надвор’е шчодра ўзнагародзіла некалькі сотняў заўзятараў, якія насуперак дабраліся ў суботні вечар да стадыёна на вул. Катоўскага.Завяршальны матч “Тарпеда” мелася правесьці супраць лідара чэмпіяната - “Узды”. Асаблівы градус да супрацьстаяньня падвысіў датэрміновы выхад у плэй-оф абедзьвух каманд, а значыцца, атрыманыя ў матчы балы мусілі перайсьці ў завяршальны раўнд і дапамагчы ў здабыцьці заветнага месца ў Першай Лізе.

Разынкі матчу дадала і адміністрацыя сталічнай каманды. Для першай сотні гледачоў былі падрыхтаваны адмысловыя зьніжкавыя карткі ад партнэраў “Тарпеда” – кавярні “Саюз-On-line” і афішы з аўтографам лепшага нападаючага “аўтазводцаў” – Іллі Шэлега. Нават прысутныя на ўваходзе супрацоўнікі праваахоўных ворганаў дастаткова лаяльна ставіліся да агляду заўзятараў.

Фэн-сэктар “Тарпеда” расьцягнуў вялізны банар “Тарпеда назаўжды” і зарадзіў “Непераможны горад”! Матч пачаўся з зацятых атак “Узды”. Госьці вельмі жадалі падсаладзіць складанае заканчэньне сезону. “Аўтазаводцы” падыйшлі да матча ў выдатнай форме – 7 перамог запар і гарантаванае месца ў фінальным раўндзе. “Чорна-белым” нялёгка прыйшлося ў стартавыя хвіліны, каб захаваць браму Нікіціна непрыступнай. Нарэшце пасьля стартавага штурму гульню сыйшла ў мірнае русла з рэдкімі вострымі выпадамі ў адной і другой каманды. Выдатны момант мелі гаспадары за некалькі імгненьняў да завяршэньня матча, але нападаючаму не хапіла літаральна сантыметраў каб накіраваць трапны прастрэл у браму сепурніка. Як вынік бадзёрая і безвыніковая нічыя 0-0.

“Тарпеда” ж працягнула серыю без паразаў да 8-і матчаў і ўклала надзею ўсім, хто прыйшоў падтрымаць каманду ў гэты вечар, што нарэшце для “Чорна-белай” каманды надыйшла белая паласа. Ужо 26-га верасьня менчукі згуляюць у гасцях з пераможцам Групы “А” – Маладэчна!