Цімі Хансэн не без граху. Лідар чэмпіянату свету па ралі-кросе сам пазбавіў сябе магчымасці пазмагацца за перамогу ў Спа

Фота: fiaworldrallycross.com

Ад памылак у гонках не застрахаваныя нават чэмпіёны. Вось і ўладальнік тытулу ў сусветным ралі-кросе ў 2019 годзе Цімі Хансэн фактычна сам аддаў перамогу ў Спа чэмпіёну дзейснаму – Йохану Крыстоферсану.

Легендарная траса Спа-Франкаршам толькі ў гэтым годзе стала арэнай найцікавейшых гонак WEC, Еўрапейскай Серыі Ле Ман, сутачнага марафону GT World Challenge Europe. Адбыўся, калі так можна ўвогуле казаць, на ёй, праўда, і ганебны Гран Пры Бельгіі Формулы-1, але там праблема была не ў трасе.

Затое ў шэрагу цікавых гонак на аўтадроме ў Ардэнскіх гарах аказаліся і тыя, што прайшлі ў мінулы ўік-энд у межах бельгійскага этапу сусветнага ралі-кросавага першынства. Яго не толькі дзейсны, а нават адзіны пакуль што трохразовы чэмпіён Йохан Крыстоферсан быў гэтым разам толькі адным з фаварытаў. Выдатна выступаў і той жа Цімі Хансэн, і прадстаўнік каманды Unkorrupted Кэвін Абрынг.

Менавіта нідэрландзец выйграў дзве кваліфікацыі з чатырох (па адной перамозе атрымаў Крыстоферсан і Ніклас Гронхольм), і ў першым паўфінале быў ледзь не галоўным прэтэндэнтам на перамогу. Але пераадолеў ён літаральна пару паваротаў, стаўшы ахвярай таўханіны ў шпільцы наверсе знакамітага Raidillon de l'Eau Rouge.

Падпіхнуў яго ззаду не хто-небудзь, а якраз Цімі Хансэн, якога і самога ззаду падпіхваў яго малодшы брат Кэвін. Толькі калі абедзве Peugeot 208 шведаў у тым злапомным месцы не затрымаліся, то Renault Mégane RS Абрынга там развярнула. Заезд ён працягнуў, але пра перамогу або хаця б трапленне ў першую тройку, што таксама было б пропускам у фінал, ўжо не марыў.

Кэвін і пятым-та фінішаваў толькі дзякуючы сходу з дыстанцыі Ціма Шайдэра, на чыім Seat Ibiza зламалася падвеска. Натуральна, нідэрландзец быў моцна расчараваны. Шчырыя выбачэнні Цімі Хансэна, які перамог, але разумеў, што ён у значнай ступені вінаваты ў няўдачы Абрынга, апошняга суцяшалі слаба. Як і наступны штраф старэйшага з Хансэнаў – у фінале, куды разам з ім прайшлі Цімі, а таксама яшчэ адзін швед Антон Марклунд, ён стартаваў не з першага шэрагу, а з трэцяга і апошняга.

Вось Крыстоферсан свой другой паўфінал правёў чыста. Гронхольм, які стартаваў з ім з першага шэрагу, у першым павароце памыліўся сам, адразу адкаціўшыся назад. Свой Hyundai i20 фін затым прышпорыў, але даехаў толькі да чацвёртага месца і таксама праляцеў міма фіналу. Крыстоферсан жа сваім Audi S1 увесь заезд кіраваў беспамылкова і ў выніку ўпэўнена перамог.

Другім фінішаваў вугорскі напарнік Гронхольма па камандзе GRX-SET World RX Team Крысціан Саба, а бельгійскі напарнік самога Йохана Энца Ідэ на радасць мясцовым балельшчыкам замкнуў першую тройку. У фінале Ідэ, праўда, поспех не развіў, фінішаваўшы толькі пятым. Затое Крыстоферсан выступіў ледзь не ўзорнапаказальна: і стартаваў лепей за Кэвіна Хансэна, які і апынуўся з ім на першым шэрагу, і па ходу заезду не дапусціў памылак, атрымаўшы другую запар перамогу на этапе.

Малодшы з братоў Хансэнаў заняў другое месца, а Саба замкнуў тройку мацнейшых. Цімі Хансэн стаў чацвёртым, але ў чэмпіянаце лідарства пакуль што захаваў – у яго 151 ачко. Праўда, Крыстоферсана, які падняўся на другую пазіцыю, ён апярэджвае цяпер толькі на дванаццаць балаў. Йохану ў сваю чаргу тры ачкі саступае Кэвін Хансэн, які апусціўся на трэці радок.

У Спа былі прадстаўленыя таксама ўсе тры малодшыя катэгорыі чэмпіянату свету па ралі-кросе: электрычная RX2e, і еўрапейскія RX3 і RX1. Апошняя з іх фактычна з’яўляецца старэйшай у чэмпіянаце Еўропы па ралі-кросе, і ў Бельгіі быў яе фінальны этап.

На ім выдатны падарунак самому сабе на 30-годдзе зрабіў нарвежац Андрэас Бакеруд, які выступае на Škoda Fabia. Ён і ў фінале перамог, і новым чэмпіёнам стаў. Другое месца на этапе заняў француз Фаб’ен Пайле на Peugeot 208, а пераможца папярэдняга этапу ў Рызе Яніс Баўманіс (як і Бакеруд, ён выступае на Шкодзе) на гэты раз замкнуў першую тройку.

Электрычная катэгорыя прынесла радасць бельгійцам, таму што ў ёй перамог мясцовы гоншчык Гіём дэ Рыдэр. Чэмпіёнам ён пры гэтым не стаў – фінал RX2e яшчэ наперадзе (ён пройдзе у Германіі), дый фіна Джэсі Каліа, які заняў другое месца, бельгіец апярэджвае толькі на дзевяць балаў (яны маюць 105 і 96 ачкоў адпаведна). Яны паміж сабой тытул і разыграюць, бо астатнія ўдзельнікі, у тым ліку швед Ісак С’ёквіст, які ў Спа стаў трэцім, адстаюць моцна.

У малодшай еўрапейскай катэгорыі RX3 радасць бельгійскіх балельшчыкаў была не такой моцнай. Кобэ Паўэльс з каманды Volland Racing KFT на хатняй трасе заняў толькі чацвёртае месца. Затое адыграліся яго расійскія партнёры Юрый Бялеўскі, які выступае пад швейцарскай ліцэнзіяй, і Марат Князеў. Яны прынеслі свайму калектыву пераможны дубль, прычым бароліся адзін з адным пры гэтым шчыльна. Бялеўскі на правах лідару чэмпіянату выявіўся мацнейшым, Князеў задаволіўся другім месцам. Трэцяе заняў паляк Даміан Літвіновіч, які, як і расіяне, выступае на Audi A1.

Чэмпіянат свету па ралі-кросе працягнецца ўжо ў бліжэйшыя выхадныя ў партугальскім Монталегрэ. А потым возьме болей чым месячную паўзу перад суперфіналам – адразу двума этапамі – на нямецкім Нюрбургрынгу.