Амаль! На этапе сусветнага Супербайка ў Балатон Парку Нікола Булеге моцна пашанцавала

Фота: worldsbk.com

Разнастайнасцю чэмпіянат свету па Супербайку сёлета дакладна не песціць. Усе – УСЕ! – заезды, што адбыліся, выйграў гоншчык Aruba.it Racing - Ducati Нікола Булега. Яго серыя працягнулася і на вугорскім этапе, аднак гэтым разам яна магла і перарвацца.

Пачыналася на трасе Балатон Парк усё даволі прывычным чынам – італьянец выйграў поўл і ў цэлым дамінаваў цягам усёй суботы. Першую гонку ён кантраляваў ад старту, выйграўшы яго, і да самага фінішу. Галоўныя падзеі разгортваліся ў яго за спінай.

Так, на старце на другую пазіцыю з сёмай прарваўся гоншчык Motocorsa Racing Альберта Сура. Той, хто з гэтай пазіцыі стартаваў – прадстаўнік Team GoEleven Ларэнца Балдасары – на жаль, склаў зброю ўжо на другім крузе, упаўшы ў восьмым павароце. На тую ж другую пакрысе прабіраўся напарнік Булегі Ікер Лекуона, які кваліфікаваўся пятым, але стартаваў восьмым праз штраф.

Прарыў запатрабаваў часу, аднак ужо на сёмым крузе іспанец атакаваў Суру ў барацьбе за гэтую самую другую пазіцыю. Альберта ж, страціўшы яе, пакрысе апусціўся на сёмую. Лекуона фінішаваў другім, а трэцім, як і на партугальскім этапе, стаў гоншчык ROKiT BMW Motorrad WorldSBK Team Мігель Алівейра.

Такую ж першую тройку мы маглі пабачыць і на фінішы ранішняга Суперпоўл-спрынту ў нядзелю. А можа, і не маглі – цяпер ужо і не скажаш. Па-першае, здарылася амаль немагчымае – Булега прайграў старт, адкаціўшыся на сёмую пазіцыю. Можа, і прарваўся б назад на першую, а можа, і не паспеў бы, і тады б стартавая рашотка ў другой гонцы, якую спрынт і вызначае, выглядала б цікаўна.

У любым выпадку, усе падрыхтаваліся да вельмі цікавага спрынту, але ўвесь кайф абламала аварыя ў шостым павароце, у якой паўдзельнічалі згаданы вышэй Алівейра, прадстаўнік ELF Marc VDS Racing Team Сэм Лоўс і Андрэа Лакатэлі з Pata Maxus Yamaha, якога потым і прызналі вінаватым у інцыдэнце. Які, на жаль, вывеў з ладу Алівейру – партугальца адвезлі ў бальніцу з пашкоджаным левым плячом і падазрэннем на струс мозгу.

Заезд пасля гэтай аварыі быў спынены чырвонымі сцягамі. На паўторным старце тыя, хто ў ладзе застаўся, занялі пазіцыі ў адпаведнасці з вынікамі кваліфікацыі, таму што поўнага кругу да нейтралізацыі ніхто пераадолець не паспеў. Ну і тут ужо ўсё прайшло стандартна для гэтага сезону: Булега выйграў старт і адразу пачаў адрывацца, а Лекуона аператыўна прарваўся на другую пазіцыю, на ёй жа ізноў і фінішаваўшы. Трэцім адмашку клецістым сцягам атрымаў Бальдасары.

Але не так усё і сумна ў мінулы ўік-энд было на Балатон Парку. Хоць і яго ж уласны напарнік, але такі кінуў Булеге выклік у фінальнай гонцы. І Нікола, і Лекуона добра стартавалі, але адарвацца ад Ікера ў італьянца не атрымалася – напарнік доўга не адставаў ад яго болей чым на паўтары секунды. Толькі на другой палове дыстанцыі Нікола ад’ехаў ад Лекуоны на дзве з паловай і атрымаў чарговую перамогу – дванаццатую ў сезоне і шаснаццатую запар. Лекуона фінішаваў другім, замкнуў першую тройку Мантэла.

Можа быць у асобных гонках Булега і сустракае нейкія выклікі, але чэмпіянат пасля вугорскага этапу ён узначальвае з вялізарнымі 248-мю ачкамі. Лекуона, які ідзе другім, мае толькі 166. На трэцяй пазіцыі Сэм Лоўс, у яго 99 балаў. Залік вытворцаў узначальвае Ducati, у якой 248 ачкоў, Bimota са 108-мю баламі другая, на трэцяй пазіцыі з 92-ма ачкамі BMW.

Наступным этапам сусветнага Супербайка стане чэшскі, ён пройдзе на Аўтадроме Мост 15-17 мая. Пройдзе, верагодна, зноў пад дыктоўку Булегі, але канкурэнты ўсё ж такі могуць яму перашкодзіць. Віримо в ЗСУ! Слава Україні! Жыве Беларусь!