Гісторыя, напісаная ў Спа. На другім этапе WEC каманда BMW адзначылася сенсацыйным дублем

Фота: FIAWEC / DPPI

У Формуле 1 такое, пагадзіцеся, наўрад ці магчыма – каб гонку дублем выйгравала каманда калі не аўтсайдэр, то серадняк. А вось у гонцы 6 гадзін Спа-Франкаршам такое здарылася, калі, канечне, лічыць калектыў BMW M Team WRT серадняком.

У чэмпіянаце свету па аўтагонках на цягавітасць наогул цяжка прымяняць прывычныя аматарам той жа Формулы 1 паняцці фаварыта або аўтсайдэра. Канкурэнцыя тут вызначаецца не тэхналогіямі і бюджэтамі, а ў значнай ступені балансам прадукцыйнасці. Логіку яго і раней цалкам разумелі толькі арганізатары серыі, зараз жа яе не разумее ніхто акрамя іх. Дадзеныя аб балансе нідзе не публікуюцца, а гоншчыкам і камандам наўпрост забаронена даваць на гэтую тэму любыя каментарыі.

Таму застаецца толькі выказваць здагадкі адносна таго што дапамагло таму ці іншаму экіпажу атрымаць перамогу або перашкодзіла яе атрымаць. Ну і што ж у Спа дапамагло BMW, якая ў папярэднія сезоны пару разоў была блізкая да поспеху? На старце гонкі другога этапу марафонскага чэмпіянату свету ніхто, напэўна, не ставіў на нямецка-бельгійскую каманду з базай у Льежы, а яна стрэліла так гучна.

Вынікі кваліфікацыі гэтым разам таксама былі даволі сенсацыйнымі – поўл заваяваў дзевяноста чацвёрты экіпаж Team Peugeot TotalEnergies у складзе Лойка Дзюваля, Мальтэ Якабсэна і Тэа Пуршэра. Але ўжо на першым крузе ў перад паваротам Les Combes у атаку на гіперкар 9X8 пайшоў Уіл Стывенс на дванаццатым Cadillac V-Series.R заводскай каманды Cadillac Hertz Team JOTA, на якім таксама выступаюць Алекс Лін і Нарман Нато.

Вырваўшыся наперад, Стывенс захоўваў першую пазіцыю да першага планавага піт-стопу, пасля якога дзякуючы кароткай дазапраўцы лідарства захапіў Рэнэ Раст з дваццатага экіпажа BMW M Team WRT, які таксама прадстаўляюць Робін Фрайнс і Шэлдан ван дэр Ліндэ. Для разумення маштабу сенсацыі, аўтарамі якой яны сталі, трэба адзначыць, што на рашотцы іх машына была толькі на адзінаццатай пазіцыі.

Нестандартная тактыка разам з хуткасцю дваццатага экіпажа прынесла яму доўгатэрміновы плён. Адрыў ад восьмай машыны Toyota Racing, на якой Себасцьен Буэмі, Брэндан Хартлі і Рыа Хіракава выйгралі папярэднюю гонку ў Імале, цягам першых дзвюх гадзін не скарачаўся меней чым да чатырнаццаці секунд. А малыя інтэрвалы на фінішы гонкі былі абумоўленыя нейтралізацыяй на сярэдзіне апошняй гадзіны, калі ў барацьбе з Антоніу Феліксам да Коштай з трыццаць пятага экіпажа Alpine у аварыю патрапіў пілот дзявятай машыны Aston Martin THOR Team Алекс Рыбейрас. Пазней, дарэчы, праз аварыю выбыў і сам да Кошта.

Таму Фрайнс, Раст і ван дэр Ліндэ выйгралі чыста, нягледзячы на меней чым дзве секунды на фінішы паміж імі і іх партнёрамі па камандзе з пятнаццатага экіпажа Кэвінам Магнусэнам, Рафаэле Марчэла і Дрысам Ванторам, якія не меней сенсацыйна занялі другое месца. Шанцаў на перамогу ў іх пры гэтым былі быццам бы вышэйшыя, таму што стартавалі яны з дзясятай пазіцыі. Але па ходу гонкі яны двойчы сутыкаліся з пяцьдзясят першай Ferrari 499P заводскай каманды Ferrari AF Corse, на якой выступаюць Алесандра П’ер Гуідзі, Джэймс Калада і Антоніа Джавінацы, што, вядома, запаволіла прагрэс.

Дарэчы, П’ер Гуідзі, Калада і Джавінацы сышлі з дыстанцыі праз аварыю за гадзіну да сканчэння часу, прычым ізноў праз BMW, але на гэты раз не гіперкар, а спорткар катэгорыі LMGT3 – трыццаць другую M4 LMGT3 Evo, якой кіруюць Дарэн Лонг, Шон Гелаэль і Аўгуста Фарфус і якая падтараніла заводскі прататып 499P у павароце La Source. Што ж да Магнусэна, Марчэла і Вантора, то яны ўсё ж такі прабіліся на другую пазіцыю і пад фініш выстаялі пад уціскам з боку пяцідзясятага экіпажа Ferrari AF Corse у складзе Антоніа Фуока, Мігеля Маліны і Нікласа Нільсэна, якія замкнулі першую тройку.

Нельга таксама не адзначыць першы заўважны поспех Aston Martin THOR Team – нягледзячы на сход з дыстанцыі іх дзявятага экіпажа, сёмы ў складзе Гары Цінкнэла, Тома Гамбла і Роса Гана заняў чацвёртае месца. А каманда-дэбютант Genesis Magma Racing набрала свае першыя балы намаганнямі Андрэ Лотэрэра, Луіса Феліпэ Дэрані і Маціса Жабэра з сямнаццатага экіпажа, якія фінішавалі восьмымі.

McLaren Racing у катэгорыю гіперкараў чэмпіянату свету па аўтагонках на цягавітасць толькі рыхтуецца ўвайсці. Напярэдадні этапу ў Спа каманда афіцыйна прадставіла свой прататып MCL-HY, пабудаваны па правілах LMDh – на шасі Dallara са стандартнай гібрыднай сістэмай на задняй восі, якая дапамагае бензінаваму матору V6 з двайным турбанаддувам. Пакуль жа славуты брытанскі брэнд дабіваецца поспехаў у LMGT3.

Канечне, тут гаворка ідзе не пра заводскі калектыў – такіх у гэтай катэгорыі проста не бывае. І дзясятая 720S LMGT3 Evo, на якой выступаюць Антарэс Аў, Томас Флемінг і Марвін Кірхофер, належыць камандзе Garage 59. Гэты экіпаж, які крыўдна сышоў з дыстанцыі ў Імале на апошняй гадзіне, у Спа стартаваў пятнаццатым у сваім класе, аднак затым здзейсніў такі ж уражлівы прарыў, які і пераможцы ў гіперкарах.

Прычым і ў іх не абышлося без прыгод у выглядзе сутыкненняў з супернікамі – Антарэс у сваю змену на першай траціне дыстанцыі не падзяліў у павароце трасу з Джэймсам Коцінгемам на дзевяноста першым Porsche 911 GT3 R LMGT3 каманды Manthey DK Engineering, на якой таксама выступаюць Цімур Багуслаўскі і Айханчан Гювен. Абодва гоншчыкі, зрэшты, працягнулі пасля гэтага гонку з мінімальнымі стратамі.

А той жа Антарэс з Флемінгам і Кірхоферам працягнулі свой шлях да перамогі, якая традыцыйна для LMGT3 не была гарантаваная. Барацьба за яе ішла шчыльная і прэтэндаваў на яе ў тым ліку дваццаць першы экіпаж Vista AF Corse у складзе Франсуа Херыё, Саймана Мэна і Алесіа Равэры. Іх Ferrari 296 GT3 Evo і перасекла фінішную лінію першай, але 5-секундны штраф, які экіпаж атрымаў за небяспечны выезд пасля фінальнага піт-стопу апусціў яго з першага радка фінішнага пратаколу на чацвёрты.

Так што перамога дасталася ўсё тым жа Антарэсу, Флемінгу і Кірхоферу. Другое месца занялі Іэн Джэймс, Захары Рабішон і Маціа Друдзі з дваццаць сёмага экіпажа Heart of Racing Team, якія выступаюць на Aston Martin Vantage AMR LMGT3. Трэцімі сталі Ясір Шахін, Рыкарда Пэра і Рыхард Літц на дзевяноста другім Porsche каманды The Bend Manthey.

Дубль BMW у Спа дазволіў баварскаму брэнду, у якога 59 ачкоў, узначаліць залік вытворцаў гіперкараў WEC. На другой пазіцыі Toyota, у якой 52 балы, трэцяя Ferrari, у яе 42 ачкі. Раст і Фрайнс захапілі лідарства ў заліку пілотаў, яны маюць 35 балаў. Хартлі, Хіракава і Буэмі, якія ў Спа замкнулі першую дзясятку, апусціліся на другую пазіцыю, у іх 26 ачкоў, на адно болей, чым у ван дэр Ліндэ, які аднаасобна ідзе трэцім.

У LMGT3 з 30-цю баламі лідзіруюць The Bend Manthey з Пэрай, Літцам і Шахінам. На другой пазіцыі цяпер Garage 59 з Антарэсам, Кірхоферам і Флемінгам, у якіх 26 ачкоў. Яны таксама на адно апярэджваюць Team WRT з Энтані МакІнтошам, Даніэлем Харперам і Паркерам Томпсанам, якія замыкаюць першую тройку.

6 гадзін Спа традыцыйна лічацца генеральнай рэпетыцыяй галоўнай падзеі WEC і адной з галоўных падзей усяго сусветнага аўтаспорту – гонкі 24 гадзіны Ле Мана, якая і стане наступным этапам марафонскага чэмпіянату свету. Пройдзе яна 13-14 чэрвеня і збярэ на старце не толькі гіперкары з машынамі LMGT3, але і прататыпы катэгорыі LMP2. Хаця ўвагі яна будзе вартай далёка не толькі за гэта. «Гоначная псіхапатыя» будзе сачыць за ёй ад старту да фінішу, а таксама паведаміць пра ўсе галоўныя падзеі ле манаўскага тыдню. Віримо в ЗСУ! Слава Україні! Жыве Беларусь!