Два падзенні Марка Маркеса з рознымі вынікамі на адным Гран Пры Іспаніі

Фота: Michelin Motorsport

Пасля не самага выразнага пачатку новага сезону MotoGP што заводская каманда Ducati Lenovo Team, што яе сатэліты, здавалася, ачунялі і былі гатовыя даць бой Aprilia Racing. І калі вынікі суботняга спрынту гэтую здагадку быццам бы пацвердзілі, то галоўная нядзельная гонка прайшла так, што ў Борга-Панігале, напэўна, хочуць пра яе забыцца.

Чэмпіянат свету MotoGP выйшаў з незапланаванага адпачынку на тыдзень раней за Формулу 1 і адразу акунуў сваіх прыхільнікаў у такі вір падзей, што Формула 1 тая пазайздросціць і пасля ўсіх карэктыровак свайго новага тэхнічнага рэгламенту. Прычым вір быў у самым прамым сэнсе – дзякуючы вадзе на трасе імя Анхеля Ніета ў Херэсе.

Поўл свой сяміразовы і дзейны чэмпіён з заводскай Ducati Марк Маркес выйграў, катаючыся яшчэ на сухім асфальце. Прычым, як ні дзіўна гэта гучыць, гэта быў першы такі поспех іспанца ў сезоне. Тры папярэднія этапы ён правёў, скажам прама, не бліскуча, і цяпер, здавалася, павінен быў перарваць беспераможную серыю – на хатнім Гран Пры сам бог загадаў.

І ў суботнім спрынце мы на самай справе пабачылі таго Марка, які пасля падзенняў не толькі падымаецца, але і тытулы выйграе. Перад стартам кароткага заезду ўсе чакалі дажджу, але сам старт атрымаўся сухім. Марк утрымаў першую пазіцыю, а на другую з пятай прарваўся яго брат Алекс, які выступае за BK8 Gresini Racing MotoGP. Малодшы Маркес, нагадаю, выйграў Гран Пры Іспаніі летась, і пасля шэрагу няўдач гэтага сезону таксама быў матываваны.

Алекс жа стаў мімавольным вінаватым у няўдалым старце лідара чэмпіянату з Aprilia Racing Марка Безэккі. Іспанец, рухаючыся да сваёй пазіцыі на рашотцы, сарваў з візару свайго шлему абаронную плёнку, якая патрапіла пад кола матацыкла італьянца. І замест таго, каб прарывацца з чацвёртай пазіцыі, Бэз адкаціўся ажно на шаснаццатую. Што, дарэчы, яшчэ не было яго найгоршым эпізодам у спрынце.

Наперадзе ж Марк Маркес ужо пачынаў адрывацца ад астатняга пелатону, а Алекс адбіваў атакі напарніка Безэккі па Апрыліі Хорхе Марціна, які раней паспеў апярэдзіць гоншчыка Castrol Honda LCR Жоана Зарко, які стартаваў другім. Атакі тыя, праўда, працягваліся нядоўга, бо на RS-GP чэмпіёна 2024 года ўжо на другім крузе заблакаваліся пярэднія тармазы, што прывяло да сходу з дыстанцыі.

На подступах да першай тройкі ў пачатку спрынту пачала была разгарацца шчыльная барацьба, але хутка галовы гоншчыкаў занялі іншыя думкі – на трасу ўпалі першыя кроплі дажджу. У такіх умовах, здавалася, перавагу атрымаў Алекс Маркес, які прыкладна на сярэдзіне дыстанцыі пачаў насядаць на Марка, які лідзіраваў, але іх барацьбой скарыстаўся прадстаўнік Pertamina Enduro VR46 Racing Team Фабіа ды Джанантоніа, які апярэдзіў абодвух братоў. І тут старэйшы з іх упаў.

На шчасце Марка, здарылася з ім гэтая непрыемнасць у апошнім павароце, таму, падняўшыся, ён накіраваўся проста ў боксы – за матацыклам на дажджавой гуме і з адпаведнымі наладамі. Алекс застаўся на трасе і спрабаваў угнацца за ды Джанантоніа, але неўзабаве ўпаў і ён, толькі ўжо фатальна, і для яго гэта скончылася сходам з дыстанцыі. Дый шэраг іншых гоншчыкаў, як той жа Безэккі, таксама пераацанілі свае здольнасці на ўжо поўнасцю мокрай трасе і таксама датэрмінова склалі зброю.

А вось напарнік Марка Маркеса Франчэска Баньяя не склаў! Двухразовы чэмпіён, які праз усе праблемы апошніх сезонаў рыхтуецца пакінуць Ducati Lenovo Team і які і гэтым разам стартаваў толькі дзясятым, своечасова перасеў на «дажджавы» байк, і цяпер, за некалькі кругоў да фінішу, лідзіраваў. Праўда, ззаду ўжо накочваў Марк, які пасля поўнага ператасавання калоды пелатону апынуўся на другой пазіцыі. І ператварыў яе ў першую, абагнаўшы Пэка.

Маркес выйграў спрынт, Баньяя фінішаваў другім – мы нарэшце пабачылі шматабяцальны дубль заводскай Ducati. А замкнуў першую тройку прадстаўнік адной з сатэлітных каманд – напарнік ды Джанантоніа Франка Марбідэлі, які таксама не бліснуў у кваліфікацыі і стартаваў толькі васямнаццатым.

Пасля такога спрынту галоўная нядзельная гонка, па ўсеагульных чаканнях, павінна была стаць калі не другой часткай трылеру, то як мінімум такім жывым баявіком. Нельга сказаць, што аматары MotoGP засталіся ў выніку расчараванымі, але падзей на ўжо сухой трасе і пры сонечным надвор'і ў нядзелю ў параўнанні з суботай было ўсё ж такі не так шмат. Аднак як мінімум адна з тых, што была, прымусіла трыбуны схапіцца за сэрцы.

Адбылася яна ў самым пачатку гонкі, старт якой выйграў Марк Маркес. Марка Безэккі гэтым разам заскочыў на другую пазіцыю, але на першым жа крузе ў дзявятым павароце яго абагнаў Алекс Маркес. Які затым нядоўга чакаў, і ўжо на другім крузе ў шостым павароце паспяхова атакаваў і брата, які ў сваю чаргу ў адзінаццатым павароце ўпаў у другі раз за ўік-энд.

Толькі гэтым разам хоць гэта і быў лоўсайд, але матацыкл, апынуўшыся ў гравійнай пастцы, кульнуўся так, што атрымаў знадта моцныя пашкоджанні, прымусіўшы Марка сысці. Не пабачыў клецістага сцягу ў нядзелю і Баньяя, але ўжо праз механічныя праблемы, якія ўзніклі на яго Desmosedici GP26 на дванаццатым крузе. Вось так пасля дублю ў спрынце заводская Ducati атрымала антыдубль у галоўнай гонцы Гран Пры Іспаніі.

Але сёлета мясцовыя балельшчыкі парадаваліся за свайго, і сваім гэтым зноў стаў Алекс Маркес, які ўсю дыстанцыю кантраляваў адрыў ад Безэккі і атрымаў перамогу. Марка фінішаваў другім, а ды Джанантоніа, які з самага пачатку замацаваўся на трэцяй пазіцыі, на ёй жа гонку і скончыў.

Безэккі пасля іспанскага Гран Пры застаўся лідарам чэмпіянату, але са 101-м ачком ён цяпер усяго на адзінаццаць апярэджвае Марціна, які замацаваўся на другой пазіцыі (Хорхе ў нядзелю фінішаваў чацвёртым). Трэцім застаецца ды Джанантоніа, у яго 71 бал. Aprilia Racing па-ранейшаму першая сярод каманд, яна мае 191 пункт, а яе сатэліт Trackhouse MotoGP Team, у якога 102 ачкі, пакуль што ўтрымлівае другую пазіцыю. Трэцюю цяпер займае Pertamina Enduro VR46 Racing Team, у яе 96 балаў.

Наперадзе ў нас сёлета акрамя іншага таксама аўтамабільная гонка 24 гадзіны Ле Мана, толькі яна праходзіць на доўгім кальцы Сартэ. MotoGP ж наведае кароткую трасу Бугаці, затое ўжо 8-10 мая, калі правядзе там Гран Пры Францыі. Ну а ўжо на гэтым тыдні мы нарэшце пабачым, якую працу над памылкамі правялі аўтары новага тэхнічнага рэгламенту Формулы 1. Віримо в ЗСУ! Слава Україні! Жыве Беларусь!