Узлёт Prema Racing, правал United Autosports і прыгоды іншых удзельнікаў гонкі 4 гадзіны Ле Кастэле

Фота: europeanlemansseries.com

На мінулых выхадных на трасе Поль Рыкар у французскім Ле Кастэле свой новы сезон распачала Еўрапейская серыя Ле Ман. Склад яе ўдзельнікаў моцна абнавіўся, і, здаецца, мы пабачым шмат новых герояў, і гэта будзе не толькі каманда Prema Racing, якая дэбютавала ў ELMS і з ходу перамагла на першым жа этапе.

Новыя героі ўсяго чалавецтва – гэта ўкраінцы, якія ўжо два месяцы супрацьстаяць варожай навале з усходу, і на вялікі жаль для беларусаў да іх вялікага сораму, з поўначы таксама. Крыважэрная пачвара, якая вырашыла аднавіць Расійскую Імперыю, пачала з вайны супраць сваіх бліжэйшых суседзяў, якія абралі свабоду і незалежнасць.

За два месяцы Украіна прайшла праз выпрабаванні, якіх хапіла б на некалькі краін. Страты, якія яна панесла, зараз немагчыма ацаніць. Ахвярамі вайны сталі дзеці і жанчыны, людзі сталага веку. Свае жыцці кладуць абаронцы Украіны. Знішчаныя поўнасцю ці часткова ўкраінскія гарады.

І пры гэтым вораг не дасягнуў аніводнай ваеннай мэты. Амаль поўнасцю разбурыўшы Марыупаль, ён і яго дагэтуль не скарыў і не заваяваў. Мужныя ўкраінцы паказалі расійска-фашысцкім захопнікам кірунак, у якім яны мусяць ісці, адправіўшы туды рускі ваенны карабель. Паступова абаронцы Украіны вызваляюць сваю родную зямлю, што прыемна, не без дапамогі беларусаў.

Зараз украінцы адстойваюць не толькі сваю свабоду і незалежнасць, але і мір ва ўсім свеце. Іх ваенная перамога, у якую мала хто верыў спачатку, але ў каторай асабіста я ніколі не сумняваўся, зараз робіцца ўсё болей відавочнай для ўсіх. Яна таксама прынясе доўгачаканую свабоду і беларусам, якія хто як можа ўкраінцаў падтрымліваюць і даўно самі змагаюцца з дыктатурай. Слава Україні! Героям Слава! Верым! Можам! Пераможам! Жыве Беларусь!

Вайна ва Украіне непасродна паўплывала і на склад удзельнікаў гоначных серый, у тым ліку ELMS. Каманды G-Drive Racing тут болей няма. І можна было б абурыцца, маўляў, спартсмены-та пры чым? Толькі гэты расійскі калектыў фактычна прадстаўляў «Газпром», з якім цяпер мала хто хоча мець справы.

Зрэшты, вартых каманд у еўрапейскіх даўгіх гонках хапае, як і вартых гоншчыкаў. І з тройцы прадстаўнікоў дзявятага экіпажа Prema Racing, які і перамог у Ле Кастэле, пачаткоўцам Еўрасерыі ёсць толькі амерыканец эквадорскага паходжання Хуан Мануэль Карэа, тады як Луі Дэлетраз і Фердзінанд Габсбург чытачам «Гоначнай псіхапатыі» добра вядомыя.

На перамогу, зрэшты, на Поль Рыкаре прэтэндавалі не толькі яны. Гонку амерыкана-швейцара-аўстрыйскае трыа пачынала толькі з трэцяй пазіцыі. Першы ж шэраг дзялілі дваццаць другі экіпаж United Autosports у складзе Філіпа Хансана, Тома Гамбла і Данкана Тапі, якія свой калектыў у катэгорыі LM P2 гэтым разам прадстаўлялі адны, і трыццаць першы каманды TDS Racing x Vaillant, за які выступаюць Філіп Сімадамо, Матіас Бэш і Тім’ен ван дэр Хельм.

Апошнія і стартавалі з поўлу, які, пра што мы добра ведаем, у даўгіх гонках ніякага значэння не мае. І на пасля першага ж перыяду аўтамабіля бяспекі, які быў абвешчаны на трэцім кругу для эвакуацыі шэсцьдзесят дзявятага Aston Martin Vantage каманды Oman Racing With TF Sport, які праз механічныя праблемы спыніўся на галоўнай прамой, лідарства ў дзявятым павароце перахапіў экіпаж United Autosports.

А ў яго ў сваю чаргу праблемы пачаліся на першым жа піт-стопе прыкладна праз 45 хвілін пасля старту. Пярэдняе левае кола знялося не адразу, механікі згубілі на гэтым час і дваццаць другі экіпаж адкаціўся на пятую пазіцыю. Адыграцца ў Хансана, Гамбла і Тапі не атрымалася, болей за гэта, яны па ходу гонкі страцілі яшчэ дзве пазіцыі і фінішавалі толькі сёмымі.

Барацьбу ж за перамогу пасля іх непрыемнасцей павялі экіпажы TDS Racing x Vaillant і Prema Racing. Габсбург прыкладна праз паўтары гадзіны пасля старту абагнаў Сімадамо і вывеў сваю каманду ў лідары, а француз пачаў губляць адну пазіцыю за адной. У выніку трыццаць першы экіпаж фінішаваў толькі дзясятым.

Будучыя пераможцы іншых супернікаў на сваім шляху не сустрэлі, і лідарства саступалі толькі на піт-стопах, у астатнім кантралюючы адрыў ад пераследнікаў. Дзевятнаццаты экіпаж каманды Algarve Pro Racing у складзе Сафіі Флёрш і Бэнта Віскааля, якія занялі другое месца, яны апярэдзілі амаль на дзесяць секунд. Трэцімі ў LM P2 фінішавалі Жульен Каналь, Нікаля Жамэн і Йоб ван Уйтэрт з шэсцьдзесят пятага экіпажа каманды Panis Racing.

Нікаля Лап’ер, Ніклас Круэтэн і Е Іфэй з трыццаць сёмага экіпажа Cool Racing па выніках 4 гадзін Ле Кастэле замкнулі першую пяцёрку у LM P2. Часткова рэабілітавалі каманду Морыс Сміт, Майкл Бэнман і Мальтэ Якабсэн з сямнаццатага экіпажа, якія перамаглі ў малодшай катэгорыі прататыпаў LM P3. Вось яны стартавалі ўжо з першай пазіцыі і па ходу гонкі спаборнічалі з трынаццатым экіпажам Inter Europol Competition у складзе Чарльза Круза, Нікаласа Піна і Гільермэ Алівейры і другім United Autosports, за які выступаюць Бэйлі Войсін, Джошуа Кайджыл і Фін Герсітц.

Пазіцыямі яны абменьваліся не толькі на піт-стопах, але і непасродна на трасе. І бойка тут ішла да апошніх хвілін, калі Якабсэн абагнаў спачатку другі экіпаж United Autosports і хутка ліквідаваў 10-секунднае адставанне ад Піна, у якога літаральна вырваў з рук перамогу. Як потым высветлілася, перамог бы экіпаж Cool Racing, фінішаваўшы і другім, бо прататып Ligier JS P320 трынаццатага экіпажа не адпавядаў тэхнічнаму рэгламенту. У выніку Круз, Піна і Алівейра былі дыскваліфікаваныя. На другім месцы пасля гэтага апынуліся Войсін, Кайджыл і Герсітц, а на трэцяе падняліся Міхаэль Йенсэн, Нік Адкок і Алекс Кападзіа з пятага экіпажа каманды RLR MSport.

Уладальнікі поўлу перамаглі ў Ле Кастэле і ў катэгорыі LM GTE. Трыумф адсвяткаваў трыццаць другі экіпаж каманды Rinaldi Racing на Ferrari F488 GTE Evo – П’ер Эрэт, Нікалас Варонэ і Мэма Гідлэй. Адчайную барацьбу за перамогу яны пры гэтым вялі не тое што да апошніх хвілін, а да апошняга круга і апошняга павароту!

Толькі ў ім Варонэ абагнаў семдзесят сёмы Porsche 911 RSR-19 каманды Proton Competition з Джанмарыяй Бруні за стырном, у адным экіпажы з якім выступалі Крысціан Рыд і Ларэнца Феррары. Фінішавалі два экіпажы з інтэрвалам у 0,12 секунды! У Proton Competition жа маглі задаволіцца тым, што і трэцяе месца заняў іх экіпаж – дзевяноста трэці ў складзе Майкла Фасбэндэра, Захары Рабішона і Рыхарда Літца.

Становішча ў чэмпіянаце пасля першай гонцы, вядома, адпавядае яе класіфікацыі. У LM P2 сярод каманд з 25 баламі лідзіруе Prema Racing, Algarve Pro Racing на другой пазіцыі, у іх 18 балаў, на тры болей, чым у Panis Racing, якія замыкаюць першую тройку. Роўна тая ж колькасць балаў у Габсбурга, Каломба і Дэлетраза, Віскааля і Флёрш і ван Уйтэрта, Каналя і Жамэна, а таксама у каманд і гоншчыкаў у LM P3: Cool Racing з Якабсэнам, Смітам і Бэнамам першыя, United Autosports з Войсінам, Герсітцам і Кайджылам другія, RLR MSport з Кападзіай, Йенсэнам і Адкокам трэція.

Толькі ў LM GTE праз дзіўнасці сістэмы класіфікацыі ў ELMS і WEC Proton Competition размясціўся адразу на другой і трэцяй пазіцыях. Адпаведна, Рыд, Бруні і Феррары знаходзячыся на другой пазіцыі, маюць 18 ачкоў і на тры апярэджваюць Фасбэндэра, Літца і Рабішона. Ну а лідзіруюць Rinaldi Racing з Эрэтам, Варонэ і Гідлэем.

Другі этап Еўрапейскай серыі Ле Ман пройдзе 13-15 мая ў італьянскай Імале, якая раней ужо прыняла ў сябе першы этап серыі GT World Challenge Europe, а ў гэты ўік-энд прымае Формулу 1, якая праводзіць там Гран Пры Эмільі-Раманьі, свой першы ў гэтым годзе этап з суботнім спрынтам. У панядзелак нам будзе пра што паразмаўляць!