Няўстойлівая раўнавага. Пасля Гран Пры Партугаліі ў чэмпіянаце MotoGP лідара фактычна няма

Фота: motogp.com

Фабіа Куартарара, які перамог у Парцімане, лідар толькі фармальны. Ніякай перавагі ў яго няма, і сітуацыя можа кардынальна змяніцца ўжо на наступным этапе. Але ў партугальскай гонцы дзейсны чэмпіён з завадскога калектыву Monster Energy Yamaha MotoGP перамог чыста, выкарыстаўшы свае талент і хуткасць.

Украіна ў вайне супраць фашысцкай навалы пераможа дзякуючы адвазе і мужнасці сваіх грамадзян. Панёсшы неверагодныя і невымерныя страты, украінскі народ не страціў галоўнага – сваёй годнасці і любові да сваёй роднай зямлі. Вораг можа мучыць Украіну толькі сваёй колькасцю, перамагчы ёю шанцаў у яго няма.

«Гоначная псіхапатыя» заклікае тых сваіх чытачоў, якія зараз знаходзяцца за межамі Беларусі і Расіі, дапамагаць украінскім бежанцам і штодзённа нагадваць кіраўніцтву гэтых краін пра неабходнасць ваеннай дапамогі Украіне. Вораг не плануе спыняцца на ёй, яго мэта – зрабіць Мордарам увесь свет. Толькі поўная ваенная перамога Украіны стане гарантыяй міру і стабільнасці ва ўсходнееўрапейскім рэгіёне.

Усе мы таксама памятаем пра беларусаў, якія зараз дапамагаюць украінцам біць ворага, якія дапамагаюць украінскім бежанцам паўсюль, і якія сарвалі планы ворага дыверсіямі на беларускай чыгунцы. Усе разам яны набліжаюць момант, калі свабода запануе і на нашай зямлі, якая таксама ачысціцца ад імперскага бруду. Слава Україні! Героям Слава! Верым! Можам! Пераможам! Жыве Беларусь!

Калі перамога Украіны прадвызначаная, то што будзе ў гэтым годзе ў MotoGP (як, зрэшты, і ў Формуле 1), я прадказваць не бяруся. Яўнага фаварыта няма, за пяць мінулых этапаў двойчы перамагчы атрымалася толькі ў Энеа Басціаніні (на Гран Пры Катара і Амерык), але гэта яму не надта дапамагло. Таму што пра Гран Пры Партугаліі ён цяпер паспрабуе як мага хутчэй забыцца. Падзенне маладога італьянца з каманды Gresini Racing MotoGP ў першай частцы кваліфікацыі не дазволіла яму стартаваць вышэй за васямнаццатае месца. Гонка да дзясятага круга складалася для яго быццам бы нядрэнна, і акурат на дзясятую пазіцыю ён прарваўся, але ўпаў ізноў і ачкоў не набраў.

А вось Куартарара ўвесь уік-энд праводзіў моцна. Эль Д’ябла і кваліфікаваўся добра, пятым, і ў гонцы стартаваў не горш, ужо на першым кругу прарваўшыся на другую пазіцыю. Апроч іншых француз пакінуў ззаду і свайго суайчынніка з Pramac Racing Жоана Зарко, які стартаваў з поўлу, і ўжо на самым старце саступіў чэмпіёну 2020 года Хоану Міру, гоншчыку Team Suzuki Ecstar. Іспанца ў сваю чаргу хутка нагнаў і на чацвёртым кругу апярэдзіў Куартарара, каб болей нікому не аддаць лідарства да самага фінішу.

Мір на некаторы час уладкаваўся на другой пазіцыі, але да яго паступова падбіраўся Зарко, які абагнаў экс-чэмпіёна на сямнаццатым кругу. Але не гэта стала для Хоана сапраўдным расчараваннем. Можа нават здача трэцяй пазіцыі завадскому гоншчыку Ducati Джэку Мілеру на наступным кругу была б меней крыўднай, чым сход з дыстанцыі ў выніку памылкі таго ж Мілера ў першым павароце, у якім аўстраліец упаў і прыхапіў з сабой Міра. Гонка на гэтым скончылася для абодвух.

Напарнік Мілера Франчэска Баньяя ўпаў яшчэ ў кваліфікацыі, ледзь не паламаўшы сабе косці. У нядзелю ён на старт усё ж выйшаў, але гонку пачаў з апошняй дваццаць чацвёртай пазіцыі. Але хаця б даехаў да восьмага месца. Яшчэ больш неверагодны прарыў здзейсніў напарнік і суайчыннік Міра Алекс Рынс, які стартаваў дваццаць трэцім, а фінішаваў чацвёртым. Напарніку Зарко Хорхе Марціну ў суботу адносна пашанцавала, ён стартаваў, хоць і толькі трынаццатым, але ў гонцы таксама ўпаў і ачкоў не набраў. Затое сам Жоан заняў другое месца. Трэцім фінішаваў пераможца Гран Пры Аргенціны Алеш Эспаргара з каманды Aprilia Racing.

Лепшым прадстаўніком Партугаліі на партугальскім этапе MotoGP стаў прадстаўнік завадскога калектыву Red Bull KTM Factory Racing Мігель Алівейра, які замкнуў Топ-5, на адну пазіцыю апярэдзіўшы Марка Маркеса. Шасціразовы чэмпіён прэм’ер-катэгорыі так усіх здзівіў на папярэднім этапе ў ЗША, а вось гэтым разам канкурэнты аказаліся мацнейшымі за яго.

Чэмпіянат пасля гонкі ў Парцімане ізноў ператрэсла да непазнавальнасці. У лідары, як было адзначана ў пачатку артыкула, выбіўся Куартарара, але ў яго роўная колькасць балаў з Рынсам, які цяпер займае другую пазіцыю – па 69. Ім абодвум усяго тры саступае Алеш Эспаргара, ад якога ў сваю чаргу на пяць адстае Басціаніні

Вось у камандным заліку лідар вызначыўся яшчэ раней – гэта Team Suzuki Ecstar. Бірузовыя і пасля партугальскага Гран Пры засталіся на першай пазіцыі, у іх 115 ачкоў. Другая цяпер Aprilia Racing, у якой 91 бал, Monster Energy Yamaha MotoGP, якая адстае на пяць ачкоў, паднялася на трэцюю пазіцыю і ў сваю чаргу на пяць балаў апярэджвае Red Bull KTM Factory Racing, які цяпер чацвёрты.

Чакаць працягу непрадказальнага сезону прыйдзецца нядоўга. Наступны этап – Гран Пры Іспаніі – пройдзе на трасе імя Анхеля Ніета ў Херэсе ўжо ў бліжэйшы ўік-энд.