Новы фармат, новыя лідары і старт на старым месцы новага сезону WTCR

Фота: fiawtcr.com

ЭТАП ПРАХОДЗІЎ 7-8 МАЯ. ПРАЗ ТЭХНІЧНЫЯ ПРАБЛЕМЫ, ШТО ЎЗНІКЛІ ПА ПРЫЧЫНЕ, ЯКАЯ АД АЎТАРА НЕ ЗАЛЕЖАЛА, АРТЫКУЛ АПУБЛІКАВАНЫ СА СПАЗНЕННЕМ. ШЧЫРА ВЫБАЧАЮСЯ ПЕРАД ЧЫТАЧАМІ.

Даўно сусветны Турынг не прыязджаў на гарадскую трасу ў французскім По! І менавіта на ёй Кубак свету ў мінулыя выхадныя распачаў свой новы сезон, які ўжо выявіў і новых лідараў.

24 лютага ў свеце выявіліся новыя героі. Імі сталі ўкраінцы, якія падвергліся агрэсіі з боку рускага фашызму. Дыктатар, з’ехаўшы з глузду ад таго, што яго суседзі абралі свабоду, пачаў помсціць украінцам незалежна ад мовы, на якой яны размаўлялі штодзённа. Рускі мір агрэсар узяўся абараняць ад тых, хто рускай валодаў лепей за яго.

Ужо амаль тры месяцы ўкраінцы пакутуюць ад знішчэння іх гарадоў і ад ваенных злачынстваў, якія чыняць прадстаўнікі другой арміі свету. Займаюцца яны гэтым па прычыне таго, што больш нічога не ўмеюць, і калі яны сустракаюць адпор з боку сапраўдных вольных людзей, якія паважаюць сябе і любяць сваю радзіму, увесь іх гераізм адразу некуды знікае.

Увесь свет абавязаны ўкраінцам, ён мусіць дапамагаць ім усім, чым магчыма, таму што адной Украінай апетыт дыктатара не абмяжоўваецца. Гэта добра разумеюць у Польшчы, Чэхіі, краінах Балтыі, дзе добра ведаюць, што бывае, калі да цябе прыходзіць рускі свет.

Ведаюць гэта і беларусы, чыю краіну гэтаму рускаму свету прадаў мясцовы калгасны дыктатар. Яны зараз ваююць і за нашу свабоду таксама, ахвяруючы сваімі жыццямі. Мы будзем вечна памятаць кожнага з іх, як і кожнага з украінцаў, якія загінулі на гэтай вайне. Слава Україні! Героям Слава! Верым! Можам! Пераможам! Жыве Беларусь!

Неяк слізка пры гэтым паводзяць сябе прэзідэнты Францыі, які працягвае наштосьці тэлефанаваць расійскаму дыктатару, і Вугоршчыны, які гэтаму дыктатару шчыра падыгрывае. Такія паводзіны не вартыя краін, якім іх грамадзяне здабываюць у тым ліку гоначную славу. Калі хто забыўся, то нагадваю, што дзейсны чэмпіён Кубку свету па аўтагонках у класе Турынг Ян Эрлашэ – француз. Хоць вось для яго новы сезон на яго радзіме пачаўся не дужа паспяхова.

Зрэшты, і мінулы, калі Ян абараняў яшчэ першы свой тытул, ён пачаў далёка не з перамогі, таму ў гэтым у яго дакладна яшчэ ўсё наперадзе. Хоць новыя імёны на першых пазіцыях не могуць не радаваць самі па сабе. Дакладней, імёны-та старыя. Мы добра ведаем абодвух аргенцінцаў з каманды All-Inkl.com Munnich Motorsport Нэстара Жыраламі і Эстэбана Гер’еры, чыі Honda Civic TCR у кваліфікацыі на гарадской трасе ў По былі найхутчэйшымі. У выніку Жыраламі заваяваў поўл, а Гер’еры раздзяліў з ім першы стартавы шэраг.

Першы ў першай гонцы, а не ў другой, як мы прывыклі за некалькі мінулых сезонаў. З гэтага ў рэверсіўным парадку першая па выніках кваліфікацыі дзясятка пачынае другі заезд. Змяніўся і фармат саміх гонак. Ён цяпер нагадвае такі ў Формуле Е, толькі час заездаў складае 45 хвілін, а ў WTCR 30 хвілін у першай і 25 у другой.

У абодвух выпадках, як і ў электраформуле, пасля гэтага трэба праехаць яшчэ як мінімум адзін поўны круг. Дыстанцыя можа быць і павялічаная ў выпадку выезду аўтамабіля бяспекі. Другая гонка адрозніваецца не толькі даўжынёй дыстанцыі, але і колькасцю ачкоў, што разыгрываюцца. Пераможца першай, напрыклад, атрымлівае 30 балаў, а другой – 25. Затое, ізноў жа ў абодвух выпадках, ачкі цяпер набіраюць першыя не дзесяць, а пятнаццаць гоншчыкаў, якія фінішавалі.

Задача Жыраламі і Гер’еры ў першай гонцы ў По, такім чынам, была простай: добра стартаваць і не прапусціць супернікаў, а таксама не памыліцца і пазбегнуць непрыемнасцей потым. А памыліцца і страціць усё на вузкай трасе прасцей простага, што пазней, ужо ў другой гонцы, прадэманстраваў вугорац Норберт Міхеліс з каманды BRC Hyundai N Squadra Corse.

Аргенцінцы, зрэшты, не памыліліся, і Жыраламі адкрыў новы сезон перамогай, а Гер’еры заняў другое месца. Чатырохразовы чэмпіён яшчэ WTCC Іван Мюлер, дзядзя Эрлашэ і яго напарнік па камандзе Cyan Racing Lynk & Co замкнуў першую тройку, а сам Ян стаў адным з тых, хто знайшоў, дзе здзейсніць пару абгонаў і фінішаваў у выніку чацвёртым. Зрэшты, іх з дзядзям суайчыннік з каманды Comtoyou DHL Team Audi Sport Натанаэль Бертон сам доўгі час ішоў чацвёртым, але памыліўся і пашкодзіў сваю Audi RS3 LMS аб адбойнік, фінішаваўшы толькі шаснаццатым.

Ну а Міхеліс свой Hyundai Elantra N TCR пашкодзіў у другой гонцы ўжо на самым старце. Прычым пачынаў заезд ён з першай пазіцыі, а побач з ім на першым шэрагу размясціўся яго суайчыннік з каманды Liqui Moly Team Engstler Аціла Тасі. Які стартаваў лепей, і адразу пачаў абганяць чэмпіёна 2019 года, але той рашуча зачыніў брамку перад канкурэнтам, упячатаўшы яго Хонду ў адбойнік.

На дзіва, машына Тасі амаль не пацярпела, і ён гонку працягнуў, і нават фінішаваў у ёй трынаццатым. А вось Міхеліс з дыстанцыі сышоў амаль адразу. Пасля сутыкнення вугорцаў на трасе ўтварыўся невялічкі затор, паміж машынамі астатніх удзельнікаў таксама адбыліся кантакты. У выніку аднаго з іх падвеску свайго аўтамабіля пашкодзіў мараканец Медзі Бенані, які вярнуўся ў сусветны Турынг і цяпер выступае за каманду Comtoyou Team Audi Sport.

Пасля стартавага інцыдэнту ў лідары выбраўся іспанец Мікель Ацкона, які ў гэтым годзе стаў напарнікам Міхеліса, замяніўшы ў камандзе легендарнага Габрыле Тарквіні. Дакладней, замяніўшы яго ў адной з машын, бо італьянец цяпер займае ў камандзе адну з кіруючых пасадаў. На яго пасля рэстарту пачаў быў насядаць уругвайскі гоншчык калектыву Cyan Performance Lynk & Co Санцьяга Уруція, але яму прыйшлося задаволіцца другім месцам, бо Ацкона хутка ўзвінціў тэмп, адарваўся на бяспечную адлегласць і атрымаў перамогу.

Трэцім мог бы фінішаваць Эрлашэ, калі б за дванаццаць хвілін да сканчэння асноўнага часу ён не пашкодзіў правую пярэднюю шыну на сваім Lynk & Co 03 TCR. Таму замкнуў першую тройку ў выніку яшчэ адзін гоншчык, які ў гэтым годзе вярнуўся ў сусветныя турынговыя гонкі – кітаец Ма Цынь Хуа, які цяпер з’яўляецца партнёрам Уруціі па камандзе. Эрлашэ ж у выніку фінішаваў толькі пятнаццатым. А вось трыумфатары першай гонцы і другую правялі нядрэнна – Гер’еры фінішаваў пятым, Жыраламі сёмым.

Нэстар жа па выніках першага этапу WTCR з 49 ачкамі ўзначальвае асабісты залік. Гер’еры займае другую пазіцыю і мае 42 балы, што ўсяго на адзін болей, чым у Ацконы, які, адпаведна, замыкае першую тройку. All-Inkl.com Munnich Motorsport лідзіруюць сярод каманд, маючы 91 ачко. BRC Hyundai N Squadra Corse другія, у іх 48 ачкоў, што ізноў жа толькі на адно болей, чым у Cyan Racing Lynk & Co, якія займаюць трэцюю пазіцыю.

Другі этап сусветнага Турынга у апошні майскі ўік-энд, 26-28 мая, пройдзе на легендарнай Нордшляйфэ – Паўночнай пятлі Нюрбургрынгу.