Каму можна расслабіцца? Мяркуючы па выніках мотакросавага Гран Пры Сардыніі, нікому

Фота: mxgp.com

На самой справе, Цім Гайсэр ліддзіруе ў чэмпіянаце старэйшай катэгорыі MXGP камфортна, але і для яго этап у Рыола Сарда стаў халодным душам, і славенец упершыню не патрапіў нават на подыум. У MX2 ж наогул усё толькі пачынаецца, і тут не да адпачынку нікому.

Не да адпачынку пакуль што і Украіне, якая ўжо амаль два месяцы падвяргаецца агрэсіі з боку расійскіх фашыстаў. Што яна пераможа, зразумела ўсім, але агрэсар спыняцца не збіраецца, і працягвае дасылаць усё новае і новае гарматнае мяса, якога мае яшчэ багата, як і цяжкай зброі.

Хапае ў ворага і злобы да суседзяў, якія абралі свабоду і пачалі будаваць утульную краіну для жыцця. Таму пакуты і выпрабаванні ўкраінцаў, нажаль, проста зараз не скончацца. Аднак можа ўпэўнена казаць, што яны годна перажывуць ліхі час, вызваляць захопленыя ворагам тэрыторыі і адбудуюць свае прыгожыя гарады.

Сумленныя беларусы дапамогуць сваім суседзям і сябрам усім, чым магчыма. Я не адмаўляюся ад свайго абяцання далучыцца да аднаўлення Украіны, іншыя нашы суайчыннікі ўжо зараз абараняюць яе са зброяй у руках або дапамагаюць украінскім бежанцам. Нам усім зараз патрэбна перамога над агульным ворагам, а ў будучыні спатрэбяцца добрасуседскія адносіны і сапраўдны саюз роўных краін разам з Польшчай, Чэхіяй і краінамі Балтыі. Слава Україні! Героям Слава! Верым! Можам! Пераможам! Жыве Беларусь!

Збудаваць трасу для мотакроса значна прасцей, чым для кальцавых гонак, таму не сумняваюся, што ў прыгожых Украіне і Беларусі будучыні знойдзецца месца і для чэмпіянату MXGP, які застаецца цікавым, нават калі здаецца, што ўсё ў ім ужо вырашана. Вось і Гран Пры Сардыніі ў мінулыя выхадныя прайшоў не зусім так, як можна было б чакаць, што тычыцца найперш старэйшай катэгорыі, дзе пануе завадскі гоншчык Хонды Цім Гайсэр.

У MX2 ж і так было ясна, што Яга Гіртсу з завадской каманды Monster Energy Yamaha Factory Racing расслабляцца зараз нельга. Яго галоўны канкурэнт з Red Bull KTM Factory Racing Том Віаль блізка, і таксама матываваны выйграць тытул, які яму не ўдалася абараніць у мінулым годзе. І хаця кваліфікацыйную гонку ў суботу выйграў бельгіец, у нядзелю француз не дазволіў яму развіць поспех і канвертаваць яго ў перамогу.

На старце першага заезда Том адкаціўся быў на шостую пазіцыю, але за два кругі падняўся на другую, абагнаўшы ў тым ліку партнёра Гіртса па камандзе і свайго суайчынніка Цібольта Беністана, які выйграў хол-шот, але хутка саступіў лідарства Яга. Якога потым доўгі час пераследваў Віаль, аказваючы на яго ўціск, але на апошніх кругах гоншчык KTM сам памыліўся і ўпаў. Другую пазіцыю, зрэшты, Том утрымаў, а трэцім фінішаваў Беністан.

Другую гонку Цібольт таксама пачаў хол-шотам, але ізноў хутка прапусціў Гіртса з Віалем, толькі ўжо спачатку француза, а потым свайго партнёра па Ямахе. Ужо лідар чэмпіянату меў ціснуць на свайго галоўнага канкурэнта, чым і займаўся да самага фінішу, але абагнаць так і не змог, задаваоліўшыся другой пазіцыяй. Трэцім ізноў фінішаваў Беністан. Віаль жа, фінішаваўшы першым, атрымаў і перамогу на этапе. Гіртс і Віаль і па яго выніках занялі другое і трэцяе месцы адпаведна.

Яга ўдалася ўтрымаць першую пазіцыю ў турнірнай табліцы, дзе ў яго 338 ачкоў, але гэта цяпер усяго на шэсць болей, чым у Віаля. Сімон Лангенфельдэр, які ў гонках на Сардыніі фінішаваў шостым і сёмым, захаваў трэцюю пазіцыю і мае 245 балаў. Yamaha з 360 ачкамі працягвае лідзіраваць у заліку вытворцаў MX2, на дванаццаць балаў апярджваючы KTM, які па-ранейшаму другі. GasGas, у якога 295 ачкоў, захоўвае за сабой трэцюю пазіцыю.

Перавага Ціма Гайсэра ў чэмпіянаце перад яго бліжэйшым пераследнікам пасля папярэдняга Гран Пры Італіі складала 81 ачко. Вось хто, здавалася б, можа супакоіцца і нікуды не спяшацца. У прынцыпе, так яно збольшага і ёсць, але абагнаць славенца магчыма, што на Сардыніі прадэманстраваў той, ад каго гэтага мало хто чакаў.

Заяву на лідарства гоншчык прыватнай каманды Gebben Van Venrooy Yamaha Racing Кэлвін Влаандэрэн аформіў яшчэ ў кваліфікацыйнай гонцы, якую і выйграў, спрачаючыся з тым жа Гайсэрам, а таксама з іспанцам Хорхе Прада з Red Bull GasGas Factory Racing, які залячыў свае траўмы і вярнуўся ў чэмпіянат. Праўда, суботні заезд, у якім Хорхе доўга лідзіраваў пасля старту, для яго не абышоўся без падзення пад самы канец, калі ўпаў яшчэ і завадскі гоншчык Ямахі Глэн Колдэнхоф. Фінішаваў Прада толькі восьмым, а вось Влаандэрэн перамог.

Далейшы шлях да першай у кар’еры перамогі на Гран Пры быў для народжанага ў Паўднёвай Афрыцы нідэрландца больш звілістым. Пасля старту, які выйграў Гайсэр, Кэлвін апынуўся толькі на сёмай пазіцыі. Але ўжо на другім кругу Влаандэрэн на пару з прадстаўніком завадской Ямахі Джэрэмі Сіверам (швейцарац зрабіў гэта першым, бо быў наперадзе) абышоў бельгійца з каманды Riley Racing Брэнта ван Донінка, які на старце прарваўся на чацвёртую пазіцыю. На дзясятым кругу яны ізноў жа разам абагналі латвійскага гоншчыка Standing Construct Husqvarna Factory Racing Паўльса Йонаса, а хутка пасля гэтага Влаандэрэн справіўся і з Сіверам.

Лідзіраваў тым часам Гайсэр, якога пераследаваў Прада, які таксама выдатна стартаваў. Іспанца Кэлвін пакінуў ззаду на чатырнаццатым кругу, а лідара чэмпіяната – за два кругі да фінішу. Гайсэр у выніку фінішаваў другім, Прада трэцім. Хорхе паспрабаваў выправіць становішча ў другім заездзе, які пачаў хол-шотам, але ўжо на чацвёртым кругу ў яго ззаду апынуўся Влаандэрэн.

Да гэтага Кэлвін абагнаў суайчынніка Прада з Honda 114 Motorsports Рубэна Фернандэса і Йонаса. На самога Хорхе ён таксама выдаткаваў не зашмат часу, апярэдзіўшы таго праз чатыры кругі. Влаандэрэн наогул быў самым хуткім на трасе, і неўзабаве далёка ад’ехаў ад іспанца, якога праз пару кругоў абышоў і Колдэнхоф, які і фінішаваў другім – амаль у шаснаццаці з паловай секундах ад Влаандэрэна!

Прада прыйшоў да фінішу трэцім, адстаўшы ад пераможца на дваццаць тры з паловай секунды, а вось Гайсэр прайграў Влаандэрэну больш за хвіліну. Для яго другая гонка апынулася пакутай: шостая пазіцыя пасля старту, потым пропуск наперад французскага гоншчыка Ямахі Максіма Рэно, а яшчэ пазней – падзенне і, як вынік, фініш на дванаццатай пазіцыі і сёмае месца па выніках Гран Пры Сардыніі. Перамог на якім, адпаведна Влаандэрэн, які не хаваў слёз радасці. Прада заняў другое месца, Колдэнхоф падняўся на ніжнюю ступень подыуму.

Зразумела, у чэмпіянаце Влаандэрэн ад лідарства далёка – ён дзявяты са 178 ачкамі. Гайсэр жа, у якога 367 балаў, першую пазіцыю, канечне, захаваў, але як мінімум крыху падпусціў да сябе Рэно, які падняўся на другі радок і мае 288 ачкоў. Сівер апусціўся на трэцюю пазіцыю, з 264 ачкамі ён усяго на чатыры апярэджвае Прада. Honda мае 372 балы і таксама пакуль што першая, але Yamaha, якая засталася другой, цяпер не так і далёка – у яе 343 ачкі. GasGas, у якога 282 балы, па-ранейшаму замыкае першую тройку.

Працягнецца чэмпіянат свету па мотакросе ў апошні ўік-энд вясны, 27-29 мая Вялікім Прызам Іспаніі, які пройдзе на трасе intu Xanadú-Arroyomolinos у Мадрыдзе.