Дубль і лідарства. Віртс і Вантор дабіліся максімуму на этапе серыі GT World Challenge Europe у Мізана

Фота: gt-world-challenge-europe.com

Гоншчыкі трыццаць другога экіпажа каманды Team WRT ужо перамагалі ў гэтым сезоне серыі GT World Challenge Europe. Але ў італьянскім Мізана яны ўпершыню зрабілі гэта двойчы за ўік-энд і захапілі лідарства ў чэмпіянаце для сябе і свайго калектыву.

Пакуль ва Украіне працягваецца вайна, кожны артыкул «Гоначнай псіхапатыі» будзе пачынацца з напаміну пра гэта. Пакуль пакутуюць і гінуць нашы суседзі, нічога больш важнага не існуе. Гэта наўпрост тычыцца і беларусаў, якіх расійскі дыктатар спрабуе ўцягнуць у сваё злачынства ўжо паўнавартасна.

Аднак як мінімум лепшыя з беларусаў свой выбар ужо зрабілі – яны абараняюць Украіну і таксама гінуць за яе. Змагаюцца яны і за вызвалення нашай радзімы, якую тутэйшы дыктатар прадаў саўковай імперыі, каб утрымацца на троне. Сядзіць ён на ім толькі дзякуючы расійскай пачвары, таму вельмі важна адсекчы ёй галаву. Толькі гэта прынясе свабоду двум народам і мір у Еўропе. Слава Україні! Героям Слава! Верым! Можам! Пераможам! Жыве Беларусь!

Мір – гэта ў тым ліку і гонкі, якія працягваюцца, як і жыццё, таму што яны і ёсць жыццё. У жыцці часам адбываюцца перамены, адбыліся яны і ў серыі GT World Challenge Europe, якая свой шосты этап правяла ў фармаце Sprint на трасе імя Марка Сіманчэлі ў італьянскім Мізана ў мінулы ўік-энд.

У прынцыпе, нічога новага не адбылося – колькі тых поўлаў заваявалі за сваю кар’еру Шарль Віртс і Дрыс Вантор? Вось і чарговы ў суботняй гонцы нікога не здзівіў, як і сам паспяховы ў іх выкананні заезд. Лідарства бельгійцы з Team WRT (дакладней, Шарль, які праводзіў першую палову) утрымалі і на старце, і на рэстарце пасля перыяду аўтамабіля бяспекі, які выехаў на трасу пасля інцыдэнту ў сярэдзіне пелатона на першым кругу.

Вось сто дванаццаты экіпаж каманды JP Motorsport, у якім на McLaren 720S GT3 выступаюць Вінсэнт Абрыль і Дэніс Лінд. Абрыль на старце прапусціў наперад Цімура Багуслаўскага, напарніка Рафаэле Марчэла па восемдзесят дзявятым экіпажы Akkodis ASP. Тады не пашанцавала Абрылю, Лінд сваю змену таксама праваліў, адкаціўшыся на сёмае месца, хаця памылак нарабілі і механікі на піт-стопе. Ну а на дэсерт Вінсэнт з Дэнісам яшчэ і штраф атрымалі, апынуўшыся ў пратаколе на чатырнаццатым месцы.

Марчэла, пераняўшы ў Багуслаўскага стырно іх Mercedes-AMG GT3, фінішаваў другім. Замкнулі ж першую тройку трыццаты экіпаж калег Віртса з Ванторам па камандзе Томас Нойбаўэр і Бенжамін Гётэ. Што ж да саміх пераможцаў, то іх Audi R8 LMS Evo II GT3 быў хуткім і ў нядзелю, калі гонку яны ізноў пачыналі першымі.

Адзначыць можна хіба што выдатна выступілі і самі бельгійцы, і іх механікі на піт-стопе, у выніку чаго трыццаць другі экіпаж перамог. А вось Багуслаўскаму з Марчэла прыйшлося прарывацца на другое месца з чацвёртага. Але і тут выдатна спрацавалі і абодва гоншчыкі, і іх механікі – Багуслаўскі, які цяпер праводзіў другую змену, пасля піт-стопу вярнуўся на трасу акурат другім.

Трэцяе месца занялі ў нядзелю Сімон Гашэ і Крыстафер Хаазэ з адзінаццатага экіпажа каманды Audi R8 LMS evo II GT3, якая застаецца трэцяй у турнірнай табліцы, дзе ў яе 74 ачкі. Лідары, праўда, далёка – Team WRT, якія захапілі лідарства, маюць 158,5 ачка. Akkodis ASP апусціліся на другую пазіцыю, але адстаюць усяго на паўтары балы. Віртс і Вантор цяпер лідзіруюць у асабістым заліку, маючы 135,5 бала, але Марчэла адстае толькі на палову ачка. Трэці цяпер Багуслаўскі, у якога 98 ачкоў.

Наступны этап серыі GT World Challenge Europe пройдзе ўжо ў фармаце Endurance 28-31 ліпеня. І гэта будзе доўгачаканы сутачны марафон на трасе Спа-Франкаршам, які заўсёды бывае цікавым.