Перамога Alpine, складанае вяртанне Peugeot і драма Glickenhaus. 6 гадзін Монцы былі цікавейшыя за 24 гадзіны Ле Мана

Фота: fiawec.com

Так, Alpine Team ELF дапамаглі карэктыроўкі балансу прадцукцыйнасці. Але сказаць, што Андрэ Нэгран, Нікаля Лап’ер і Мацьё Ваксів’ер перамаглі толькі дзякуючы ім нельга. З супернікамі з Таёты яны змагаліся і непасродна на трасе, і гонка была значна меней прадказальная, чым сутачны марафон у Ле Мане.

Нават чарговае злачынства, якое рускі фашызм здзейсніў учора ў Вінніцы, не робіць меней прадказальным зыход вайны ва Украіне. Яна сутыкнулася з сапраўдным злом без прымешак. Такое зло заўсёды прайгравала ў доўгай перспектыве, і так будзе ў гэты раз.

Тым не менш, у чарговы раз даводзіцца спачуваць усім, хто пацярпеў ад агрэсіі і страціў блізкіх. Нішто не можа быць апраўданнем гібелі дзіцяці, нават памылка. А ўчора была не памылка, а наўмысны ракетны ўдар па мірным горадзе. Шчыра зычу вінаватым – расійскай падлодцы, мяркуючы па ўсяму – лёсу крэйсера «Масква».

Тутэйшы калгасны фашызм існуе толькі дзякуючы расійскаму, таму знішчэнне апошняга вызваліць і нашу зямлю. Кожны сумленны беларус гэта разумее, а лепшыя з іх набліжаюць перамогу Украіны. Яна непазбежная дзякуючы мужнасці і гераізму яе грамадзян і дапамозе, якую яны атрымліваюць ад цывілізаваных краін. Слава Україні! Героям Слава! Верым! Можам! Пераможам! Жыве Беларусь!

Вайна ва Украіне вымусіла перанесці трэці этап ELMS з Хунгарарынгу ў Монцу, дзе ён і прайшоў у першы ліпеньскі ўік-энд. А вось чэмпіянат свету па гонках на цягавітасць роўна праз тыдзень, на мінулых выхадных, завітаў туды планава. І, як і ў выпадку з Еўрапейскай серыяй Ле Ман, правёў там цікавую гонку. Магчыма, самую цікавую ў сваім бягучым сезоне.

Галоўнай навіной было вяртанне ў WEC каманды Peugeot. Ужо не з дызельным прататыпам, а з гібрыдным гіперкарам 9X8. Яго тэхнічная канцэпцыя блізкая да такой у Toyota GR010 Hybrid: 2,6-літровы бензінавы матор V6, усталяваны ў базе, праз сяміступеністую скрыню перадач круціць заднія колы, пярэднія прыводзяцца электрычным. Максімальная магутнасць першага 680 к.с., другога – 272 к.с., аднак разам яны з максімальнай аддачай працаваць не могуць (дазволеная сукупная пікавая магутнасць сілавой устаноўкі складае каля сямісот сіл).

Затое дызайн у Peugeot 9X8 абсалютна арыгінальны, і менавіта ён выклікаў шмат пытанняў. Ці будзе працаваць канцэпцыя без задняга антыкрыла? Тэсты тэстамі, а ў гонках трэба спаборнічаць з машынамі канкурэнтаў. Ну і не варта забывацца, што гэта гонкі на цягавітасць – яны доўгія, і надзейнасць тут не меней важная, чым хуткасць.

Як мінімум хуткасць была ў Glickenhaus 007 LMH. Аліўе Пла, Рамэна Дзюма і Луіса Феліпэ Дэрані з семсот восьмага экіпажа амерыканскай каманды нават сталі лепшымі ў кваліфікацыі (поўл заваяваў Дзюма). Peugeot TotalEnergies чакана не бліснулі. Калі Лойк Дзюваль, Густава Менэзэс і Джэймс Росітэр з дзевяноста чацвёртага экіпажа яшчэ здолелі стаць апошнімі толькі ў гіперкарах, то на дзевяноста трэцяй машыне ўзніклі праблемы, праз якія Мікел Йенсэн, разам з якім выступаюць Пол дзі Рэста і Жан-Эрык Вернь, спыніўся на трасе, праз што кваліфікацыя была спыненая чырвонымі сцягамі. Экіпаж вымушаны быў стартаваць апошнім ужо ў абсалюце.

Не доўга для іх працягвалася і гонка. Ужо на першай гадзіне, калі за стырном быў усё той жа Йенсэн, машына раптам запаволілася на выхадзе са звязцы Ascari. Датчанін неяк даехаў да ўезду на піт-лэйн, дзе спыніўся ізноў. Аднавіць рух атрымалася толькі з дапамогай маршала. Затым быў доўгі рамонт, спроба вярнуцца ў гонку, але ў выніку дзевяноста трэці экіпаж з дыстанцыі сышоў.

Шмат рамантаваліся і іх калегі з дзевяноста чацвёртага экіпажа, але яны хаця б фінішавалі, заняўшы ў класе гіперкараў чацвёртае месца. У абсалюце, праўда, яны фінішавалі трыццаць трэцімі, адстаўшы ад лідараў на дваццаць пяць кругоў. Тым не менш, задачу-мінімум у Peugeot TotalEnergies выканалі. Спадзяемся, карані сваіх праблем там цяпер ведаюць і хутка з імі разбяруцца, і ў Таёты з’явяцца моцныя канкурэнты.

Зрэшты, у Монцы яны і так былі – той жа экіпаж Glickenhaus Racing. Пла, Дзюма і Дэрані выступалі адны, без сястрынскай машыны. Затое выступалі выдатна, пралідзіраваўшы ўсю першую палову гонкі. Але на чацвёртай гадзіне экіпаж спачатку атрымаў штрафны праезд па піт-лэйне за парушэнне ў рэжыме жоўтых сцягоў па ўсёй трасе (Дэрані не адразу націснуў на клавішу ў какпіце, якая абмяжоўвае хуткасць машыны).

І добра б, калі толькі гэтым усё і абмежавалася, бо на штрафе экіпаж страціў каля дваццаці секунд, адкаціўшыся на чацвёртую пазіцыю. Можна было б як мінімум паспрабаваць вярнуцца на першую, калі б хутка пасля гэтага на семсот восьмай машыне не зламалася турбіна. На гэтым гонка для яе экіпажа скончылася.

Аднак не скончыліся канкурэнты ў Таёты. Задушаны прататып катэгорыі LMP1 трыццаць шостага экіпажа Alpine Team ELF, які стартаваў трэцім, пасля чарговага балансавання прадукцыйнасці не саступаў у хуткасці японскім гіперкарам, якія, пачынаючы з Монцы, пазбавіліся дыферэнцыялаў з блакіроўкамі – у такіх сур’ёзных гоначных машын яны цяпер адкрытыя. У тым ліку па гэтай прычыне з імі Нэгран, Лап’ер і Ваксів’ер некалькі разоў сыходзіліся на трасе. І амаль кожны раз гэта была жорсткая і часам нават кантактная дуэль.

Ну хіба што восьмы экіпаж пераможцаў Ле Мана Себасцьена Буэмі, Брэндана Хартлі і Рыа Хіракавы прайсці ўдалася адносна лёгка – на іх GR010 Hybrid пачаліся праблемы з кінетычным матор-генератарам, якія пацягнулі за сабой і праблемы з тармазамі. Пры нармальных умовах тармажэнне на гібрыдным гіперкары адбываецца і пры дапамозе электраматораў (вядомае ўладальнікам электрамабіляў рэкуператыўнае тармажэнне), і без іх нагрузка на гідраўлічныя тармазы ўзрастае.

Для сёмай машыны, якой кіруюць Майк Конвэй, Камуі Кабаяшы і Хасэ-Марыя Лопес, гонка праходзіла ў штатным рэжыме, але вось з ёй будучыя пераможцы біліся адчайна. Пад канец пятай гадзіны гонкі Ваксів’ер абагнаў Кабаяшы, але на галоўнай прамой, японец пайшоў у контратаку, пасунуўся ў бок француза і пашкодзіў заднюю правую шыну аб прататып канкурэнтаў.

Толькі цудам Камуі пазбег аварыі і здолеў дабрацца да боксаў. Аднак суддзі віну за гэты інцыдэнт усклалі менавіта на яго, за што сёмая машына атрымала 90-секундны штраф Stop&Go і фінішавала трэцяй. Восьмы экіпаж пад фініш даганяў машыну Нэграна, Лап’ера і Ваксів’ера, аднак так і не дагнаў, задаволіўшыся другім месцам. Ну а Alpine Team ELF перамаглі, ужо ў другі раз у сезоне пасля першага этапу ў Сэбрынгу.

Як заўсёды шчыльная барацьба за перамогу была ў катэгорыі LMP2. Паўдзельнічалі ў ёй і пераможцы Ле Мана Рабэрта Гансалес, Антоніу Фелікс да Кошта і Уіл Сцівэнс з трыццаць восьмага экіпажа каманды Jota, якія стартавалі перадапошнімі ў абсалюце пасля таго, як усе іх вынікі ў кваліфікацыі былі ануляваныя за небяспечны выезд з боксаў. Але гэта не перашкодзіла ім прарвацца на другое месца!

Руі Андрадэ, Фердзінанду Габсбургу і Нарману Нато з сорак першага экіпажа Realteam by WRT было прасцей ад пачатку – яны стартавалі трэцімі і ў выніку перамаглі. Хаця пад канец і ім давялося абараняцца ад трыццаць восьмага экіпажа Jota, што, аднак, не стала цяжкай задачай для Габсбурга, які на фінальны адрэзак атрымаў шыны свяжэйшыя, чым у пераследнікаў. Выдатна выступіў і дзясяты экіпаж каманды-дэбютанта WEC Vector Sport. Гоншчыкі яго, праўда, зусім не навічкі – гэта Ніка Мюлер, Раян Кален і Себасцьен Бурдэ, таму іх трэцяе месца не павінна здзіўляць.

Вось перамога ў катэгорыі LMGTE Pro Томі Мілнэра і Ніка Тандзі з шэсцьдзесят чацвёртага экіпажа Corvette Racing – гэта сенсацыя. У Монцы іх Chevrolet Corvette C8.R не быў самай хуткай машынай у класе, Ferrari 488 GTE Evo каманды AF Corse былі хутчэй. Затое амерыканскі спорткар аказаўся больш эканамічным, і кароткага піт-стопу пад самы фініш яму, у адрозненні ад машын канкурэнтаў, яму не спатрэбіўся.

Таму Мігель Маліна і Антоніа Фуока з пяцьдзесят другога экіпажа фінішавалі другімі, а іх калегі Алесандра П’ер Гуідзі і Джэймс Калада з пяцьдзесят першага экіпажа замкнулі першую тройку. Ім па ходу гонкі давялося сысціся на трасе з Міхаэлем Крыстэнсэнам і Кэвінам Эстрэ з дзевяноста другога экіпажа каманды Porsche GT Team. Другі з іх, праўда, перастараўся, і за шматлікія кантакты і з Ferrari AF Corse, і з іншымі ўдзельнікамі гонкі быў пакараны штрафным праездам па піт-лэйне.

Была сенсацыя і ў катэгорыі LMGTE Am, у якой поўл напярэдадні заваявалі дзяўчаты з восемдзесят пятага экіпажа каманды Iron Dames. Рахель Фрэй, Мішэль Гацінг і Сара Баві, канечне, не жалезныя, але хуткія. Перамагчы ім у выніку не ўдалася, але апярэдзіць Ferrari здолелі толькі Крысціан Рыд, Себасяцьян Прыоль і Гары Цінкнэл з семдзесят сёмага экіпажа Dempsey Proton Racing на Porsche 911 RSR. Матэа Кайролі, Мікел Педэрсэн і Джанкарла Фізікела з сорак шостага экіпажа Team Project 1 фінішавалі трэцімі.

Прадстаўнікі LMGTE Am сталі ўдзельнікамі і самай сур’ёзнай аварыі ў Монцы. Калі да экватара гонкі заставалася меней чым паўгадзіны, на тармажэнні перад Variante della Roggia занесла трыццаць трэці Aston Martin каманды TF Sport, за стырном якога ў той момант быў Энрыке Чавес (разам з ім выступаюць Бэн Кіцінг і Марка Сорэнсэн). У выніку машыну падкінула на парэбрыках, пасля чаго яна двойчы перакулілася, праслізгаўшы пад сотню метраў. На шчасце, гоншчык не пацярпеў.

Што ж да стану ў чэмпіянаце, то ў заліку гоншчыкаў катэгорыі гіперкараў Нэгран, Ваксів’ер і Лап’ер лідарства не толькі замацавалі, але і крыху павялічылі – у іх 106 ачкоў супраць 96 у Хартлі, Хіракавы і Буэмі, якія засталіся другімі. Лопес, Кабаяшы і Конвэй з 76 баламі падняліся на трэцюю пазіцыю. Toyota засталася лідарам вытворцаў гіперкараў і мае 121 ачко. Alpine са 106 баламі займае другую пазіцыю, Glickenhaus, у якога 70 ачкоў, замыкае першую тройку.

Гансалес, да Кошта і Сцівэнс засталіся лідарамі заліку гоншчыкаў катэгорыі LMP2, у якім яны маюць 95 ачкоў. На другой пазіцыі з 76 баламі Джошу Пірсан і Олівер Джарвіс, якія ў Монцы занялі пятае месца ў класе і восьмае ў абсалюце. Габсбург, Нато і Андрадэ падняліся на трэцюю пазіцыю і маюць 68 ачкоў.

У заліку гоншчыкаў катэгорыі GT лідары змяніліся – імі сталі П’ер Гуідзі і Калада, у якіх 95 ачкоў, што ўсяго на адно болей, чым у Джанмарыі Бруні і на два, чым у Эстрэ і Крыстэнсэна. Пры гэтым Porsche па-ранейшаму лідзіруе ў заліку вытворцаў у GT, маючы 187 балаў. Ferrari са 173-ма на другой пазіцыі, Chevrolet з 65 ачкамі замыкае першую тройку.

Наступны этап чэмпіянату свету па аўтагонках на цягавітасць пройдзе амаль што праз два месяцы, 9-11 верасня на трасе Фуджы ў Японіі, куды вялікія гонкі нарэшце вяртаюцца пасля пандэміі.